Səɓəlari 20

Tsawayeri Na Kuma

(Z. Sha 5:1-21)

1Aghəla nda təng vir laga Hyel pəla aka mjir Israila shanga ndərayeri ngəni,

2“I an MTHLAKU na Hyelər nga, na kəɓəla nga akwa mbwar mafakur akwa tsəɗi Masar.

3Ga aɗiya vəngkər səli aka haptayeri wa, tar ali I shira.

4Ga aɗiya namtə haptu aka kəra gə wa, wala kəlara su na dludzi ka su na amtazi, wala su na aghəyazi akwa duniya, wala na akwa yimi, wala na akira duniya, ka tsa ndzi haptu wa. 5Ga aɗiya zuzuri akəma ɗa wa, wala vəngkər səli ala ɗa wa, kamnyar I an MTHLAKU na Hyelər nga, antə I ata bara hirkur na swakti akəla ga. Antə ma ga ku nggəlar ra, I ata ɗi mjir nyarmbwar nga har ka mwanta akwa zaman na makərkur ka na nfwarkur. 6Amma ma ga ku hir ra ka ɓəlatə tsawurna, I ata ncantə hirkurərna na ana palidzi wa aka mjir nyarmbwar nga har zamanayeri dəpu dəpu.

7Ga aɗiya kathləma MTHLAKU na Hyelər nga gapangapani wa. Kamnyar MTHLAKU aɗi ata zhar ɗi mdə na ku kathləmari gapani wa.

8Ka gə ɗangtə Vir Ghərəmtaghəra ar sati kara hamta ni swakti ali. 9Vir ngkwa aɗi tə ga ata mzhi hara kəthlər, ka kuri shanga kəthlərayeri ar nga akwa. 10Amma vir na murfəkur an Vir Ghərəmtaghəra natə mdə ku vəi kamnyar na, I na MTHLAKU na Hyelər nga. Vir nda mda aɗi na ata hara kəthlər wala duku wa. Antə tsawu ngəni ku tsəkwar nga, ka ɓzər nga, ka ngkwar nga, ka buɗar nga, ka ngkwar kutakəyir nga, ka mwaɓiyayeri ar nga, har kəga mətəpi na adzə nga. 11Kamnyar akwa vir ngkwa antə MTHLAKU ku namtə vəi na amtazi, ka duniya, ka manda, ka shanga suayeri na akwa kuta ɗa, ka ghərəmtaghəra akwa vir na murfəkur. Antə MTHLAKU ku vədzə barka aka Vir Ghərəmtaghəra ka namtə vir na ola ali.

12Ka gə nar olkur aka baba' nga ka mama' nga, kamnyar ka far ngə fəi akwa tsəɗi tə I na MTHLAKU na Hyelər nga akwa na ala gə ni.

13Ga aɗiya tsi mdə wa.

14Ga aɗiya ləkə wa.

15Ga aɗiya həl wa.

16Ga aɗiya hara seɗar thlandər ata kəra ntəwulər ngə wa.

17Ga aɗiya nggukə kəyir ntəwulər ngə wa. Ga aɗiya bara mwalar ntəwulər ngə wa, wala ngguktə buɗarni wala ngkwar kutakəyirni, wala thlarni, wala kwararni, wala kəlara su madi na arni wa.”

Thlivər Ku Ngkəi Mji

(Z. Sha 5:22-33)

18Sakatə shanga mji ni ku nggatə kuraka dlərər hyel ka kuraka təmbəl, ka wutə wurkayeri, ka ɗer na akwa səɓəla akwa kəra gar ni, antə thlivər ku ngkəi ɗa, tə da thləthlatə ciju ka dza ɗa akwa kədza. 19Antə da pəla aka Musa, “Ar nga pəla ala yeru su tə Hyel pəla, yeru ata psi thləm. Amma Hyel aɗiya gari ala yeru wa, kamnyar yeru akwa thlivər abbər ma tsa ku gari ala yeru, yeru ata mta.”

20Antə Musa pəla aka mji ni abbər, “Giri aɗiya thlivər wa, Hyel si ni kamnyar ka tsa ngkərtə jirkurər giri, tsuwa ka tsa wuta abbər giri ku ndzi mjir thlivər ɗəffari, ta giri asə hara biku.” 21Antə mji ni ku thləthlatə tsu ata vəi nda cijuwa, sakatə Musa akwa ləkəma ka shahədzi kudzəhə ka dlamba na mənggəl thlərətu tə Hyel akwa ni.

Tsawayeri Ata Kəra Bagaɗi Saɗaka

22Antə MTHLAKU pəla aka Musa ka tsa pəla aka mjir Israila abbər, “Giri ka kəra giri ku wuta abbər I na MTHLAKU ku gari ala giri akwa kutar vəi na amtazi. 23Giri aɗiya namtə haptu ka adzərfa wala ka dinar, ka giri pəla giri ata vəngkər səli ala ɗa, ka jaktə vəngkər səli ali wa. 24Ka giri hənta ali bagaɗi saɗaka ka həi daci. Ata antə giri ata hamta ali təmayeri ar giri, kəga kwiyayeri ar giri, kəga thlayeri ar saɗaka mbamba, kəga saɗakar jakə mwardzi. Akwa kəlara vəi tə I ku carɓəla ala giri kamnyar haptə thləmi, I ata si adzə giri kəi vədza ala giri barka. 25Ma giri ata namta ali bagaɗi ka pelayeri, giri aɗiya namtə ka pelayeri tə mdə marmar wa, kamnyar sakatə giri akwa cikthlə pela ni, giri ata ɓzamtə kəcəkəcəkurərni. 26Tsuwa giri aɗiya hənta ali bagaɗi na ka vəi ndlətari wa, kamnyar ta ma sakatə giri ata ndlətari, mda asə wutə durakur ar giri.”

Currently Selected:

Səɓəlari 20: KNB

Highlight

Copy

Compare