SAM 8
8
Hla Hruaitu tân; Gittith-a sak tûr. Davida Fakna Hla.
Pathian ropuina leh mihring chanvo
1Aw Lalpa, kan Lalpa,
Lei chung zawng zawngah hian
i hming chu a va ṭha êm!
I ropuina chu vân chungahte
khian i dah a.
2Hmêlma leh phuba latu
tihdaihna tûrin,
Nangmah dotute avângin
Nausênte leh hnute hne laite
kâa chhuak chuan chakna
i tinghet a.#Mt 21.16
3I vân, i kutchhuakte,
Thla leh arsi i ruathote khi,
ka ngaihtuah châng chuan,
4“Mihring hi eng nge maw a niha,
i hriat reng ṭhin ni?
Mihring fapa pawh hi eng nge
maw a niha, i kan ṭhin ni?”
ka ti ṭhîn.#Job 7.17-18; Sam 144.3; Heb 2.6-8
5Ani chu Pathian aia hnuai deuh
chauhvin i siam a,
Ropuina leh chawimawina
i khumtîr si a.
6I kutchhuak chungahte hian
thu i neihtîr a;
A ke hnuaiahte engkim i dah a:#1 Kor 15.27; Eph 1.22; Heb 2.8
7Berâm leh bâwng zawng
zawngte nên,
A ni, ramsate nên pawh;
8Chunglêng sava leh
tuifinriat sangha,
Tuifinriat kawnga kal
apiangte nên.
9Aw Lalpa, kan Lalpa,
Lei chung zawng zawngah hian
i hming a va ṭha êm!
Currently Selected:
SAM 8: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
