Matthaia 4
4
Isua thlêma a awm thu
(Mk 1.12-13; Lk 4.1-13)
1Chumi zawhah chuan Isua chu Diabola thlêma awm tûrin thlalêrah Thlarau hruai luhin a awm ta a. #Heb 2.18; 4.15
2Tin, ni sawmli leh zan sawmli a nghei hnuin a ril a lo ṭâm ta a. 3Tin, thlêmtu chu a lo kal a, a hnênah, “Pathian Fapa i nih chuan hêng lung hi chhanga chang tûrin thu pe rawh,” a ti a. 4Nimahsela, ani chuan, “ ‘Mihring hi chhang chauhvin an nung lo vang a, Pathian kâa thu tin chhuakin an nung zâwk ang,’ tih ziak a ni,” tiin a chhâng a. #Deut 8.3
5Chumi zawhah chuan Diabolan khaw thianghlimah chuan a hruai lût a, Pathian biak in chhîp zumah chuan a dah a; 6tin, a hnênah, “Pathian Fapa i nih chuan tla thla rawh;
‘I chung thûah zawng
a vântirhkohte chu
thu a pe ang a,
An kutin an dâwm ang chia;
Chuti lo chuan, i kein lung
i chhuih hlauh dah ang e,’
tih ziak a ni si a,” a ti a. #Sam 91.11-12
7Isuan a hnênah,“ ‘Lalpa i Pathian fiah suh,’ tih ziak a ni ve bawk e,” a ti a. #Deut 6.16 8Tin, Diabola chuan tlâng sâng takah a hruai leh a, khawvêl ram zawng zawng leh a ropuina chu a entîr a. 9Tin, a hnênah, “Bawkkhupin chibai mi bûk la, hêng zawng zawng hi ka pe vek ang che,” a ti a.
10Chu veleh Isuan a hnênah, “Setan, kal bo daih rawh! ‘Lalpa i Pathian chibai bûk la, ama rawng chauh bâwl rawh,’ tih ziak a ni,” a ti a. #Deut 6.13 11Chumi hnuah chuan Diabola chuan a kalsan ta a. Tin, ngai teh, vântirhkohten a rawng an rawn bâwlsak ta a.
Isuan Galili ramah rawngbâwl a ṭan
(Mk 1.14-15; Lk 4.14-15)
12Tin, Johana an man tih Isuan a hriat veleh Galili ramah a kal ta daih a; #Mt 14.3; Mk 6.17; Lk 3.19-20 13tin, Nazareth khua a kalsan a, Kapernaum khuaah a awm ta reng a (chu chu Zebulon leh Naphtali biala, dîl kama awm a ni). #Joh 2.12 14,15Zâwlnei Isaia kâah,
“Dîl kamah, Jordan râlah,
Zebulon ram leh Naphtali ram,
Jentail-te Galili chu!
16Thim hnuaia ṭhute chuan
êng nasa tak an hmu a,
Thihna hmun leh a hlima
ṭhute chungah chuan,
Eng a lo chhuak ta a,”
tia a sawi kha a lo thlen theih nân. #Is 9.1-2
17Chuta chinah chuan Isuan, “Sim rawh u; vânram chu a hnai tawh e,” tiin a hril ṭan ta a. #Mt 3.2
Sangha mantu pali koh thu
(Mk 1.16-20; Lk 5.1-11)
18Tin, Galili dîl kama a lên pahin, unau pahnih, Petera tia koh Simona leh a unau Andria chu, dîlah chuan lên dêngin a hmu a; sangha mantu an ni rêng a. 19Tin, ani chuan an hnênah, “Mi zui rawh u; tichuan, mihring mantuah ka siam ang che u,” a ti a. 20Tin, lênte chu kalsanin an zui ta nghâl a.
21Tin, chuta ṭang chuan a kal zêl a, unau dang pahnih, Zebedaia fapa Jakoba leh a unau Johana chu, an pa Zebedaia hnênah lawngah an lênte siam ṭhain a hmu a; tin, anni chu a ko ta a. 22Tichuan, lawng leh an pa chu an kalsan a, an zui ta nghâl a.
Mi tam tak tihdam
(Lk 6.17-19)
23Tin, Isuan an inkhâwmna inahte zirtîrin, Ram Chanchin Ṭha chu hrilin, mite zînga natna tinrêng leh chak lohna tinrêng tidamin, Galili ram zawng zawng a fang vêl a. #Mt 9.35; Mk 1.39 24Tin, Suria ram zawng zawngah a chanchin a thang ta a; tichuan, mi damlo zawng zawng, damlohna leh natna tinrêng tuarte, ramhuai mante, thla em âtte, zengte a hnênah an rawn hruai a; a lo tidam hlawm a. 25Galili ram aṭang te, Dekapoli khua aṭang te, Jerusalem khua aṭang te, Judai ram aṭang te, Jordan râl aṭang te chuan mipui tam takin amah an zui bawk a.
Currently Selected:
Matthaia 4: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.