Luù 6:27-49

Wo Jisɛ̀ naŋ ɓɛìŋ woò wààŋ, “Tɔ̀ miŋ woò tɛɛ̀ koɓɛ̀ anyùùŋ nyaŋ gbiŋ kumiàìm nyaŋ, mànaìŋ aŋ jooiŋ nyàŋ, e kìlà niŋ tuwò tɛ̀ɛ̀ koɓɛ̀ anyùùŋ nyaŋ naiŋ wùɔ̀ŋ nyaŋ, Zòòloìŋ wo Dayà wèè wo kpuumàŋ anyùùŋ nyaŋ gboàìŋ nyaŋ, e kìlà niŋ zoolò wèè anyùùŋ nyaŋ nimilàìŋ nyaŋ. Sèè wo nyùùŋ gbiŋ woum hàà fɛ̀ɛ̀ nyààŋ, kilà wɔŋ fàa bàa wo haà wuŋ fɛ̀ɛ̀. Sèè wo nyùùŋ bà ɓemàŋ wɔŋ kotì mɔɔ̀ŋ, dàngèuŋ wo ɓemè wɔŋ kùmà mɔɔ̀ŋ wuŋ pɛɛ. Kìɛ̀ŋ wo nyùnɔ̀ɔŋ gbiŋ dawàùm wèè muŋ kiɛ̀uŋ e nɛ̀ŋ bà wɔ, e kìlà sèè wo nyùùŋ gbiŋ woum gè e nɛ̀ŋ sìwè, ɓɔ̀ mùŋ dawè wèè wo muiŋ ɓɛìŋ kɛlɛ̀ɛ̀. Tùwoìŋ tɛ̀ɛ̀ koɓɛ̀ anyuùŋ kpùuŋ dàwiiŋ nyàŋ màànààŋ nìŋ manaŋ wèè aiŋ tuwò lɛ.” Sèè nìŋ mɔnɔŋ nɔŋ anyùùŋ nyaŋ mànàìŋ nyaŋ, nìŋ gongà kɛ̀ wo Dayà doiŋ nàŋ tɛnɛ̀ŋ wèètii nìŋ naŋ yɛi nyɛ̀nɛ̀ŋ le? Anyùùŋ maŋ jùumù nyaŋ pɛɛ manaŋ anyùùŋ nyaŋ mànàŋ nyiìŋ nyaŋ. Sèè nìŋ nyinìàŋ nɔŋ e keì sìàŋ koɓɛ̀ anyùùŋ nyaŋ nyinìàìŋ e keì sìàŋ nyaŋ, nìŋ gongà kɛ̀ wò Dayà doiŋ nàŋ kìɛ̀ŋ e jìwààjɛ̀wɛ̀ ke sɛ̀ gèe siaŋ wèètii nìŋ naŋ yɛi nyɛ̀nɛ̀ŋ le. Anyùùŋ maŋ jùumù nyaŋ pɛɛ nyɛnɛŋ e keì sìàŋ koɓɛ̀ anyùùŋ nyaŋ nyiniàŋ nyìŋ e keì sìàŋ nyaŋ. Sèè mùŋ gbiɛŋ anyùùŋ e kpàŋ esaɓù kɛ̀ mùŋ do nàŋ mɔ̀nɔ̀ŋ wèè aum muiŋ kɛlɛ̀ɛ̀, màŋ gongò kɛ̀ wò Dayà doum nàŋ tɛnɛ̀ŋ wèètii? Anyùùŋ maŋ jùumù nyaŋ pɛɛ gbiɛŋ e kpàŋ koɓɛ̀ aŋ dàwi esaɓù kɛ̀ àŋ kuwa ke jii tùlia kɛ̀ àŋ do nyiŋ niŋ nàŋ kɛlɛ̀ɛ̀. Kɛɛ mànaìŋ aŋ jooiŋ nyàŋ e kìlà niŋ nyinìàŋ nyiŋ keì sìàŋ. Ɓɔ̀ nìŋ kiɛ̀ŋ nyiŋ fòfoo nìŋ manaŋ wèè aiŋ niŋ ɓɛìŋ kɛlɛ̀ɛ̀. Sèè nìŋ nyɛnɛŋ tii, wo Dayà doiŋ nàŋ kìɛ̀ŋ e jìwààjɛ̀wɛ̀ gbee. E kìlà nìŋ do nàŋ nɔ̀ŋ aŋ jɔ̀à wèè wo Dayà Gaàŋ Gbeeɔ̀. Esaɓù kɛ̀ wo Dayà tuwà tɛ̀ɛ̀ koɓɛ̀ wo nyuùŋ gò nyìmàŋ saɓùɔ yaà wo nyuùŋ nyɛ̀nɛ̀ŋ tùwo naanààaŋ. Kɛ̀ɛ̀nɛìŋ ke nyowo wèè aŋ dàwium nyàŋ, màànààŋ nɔŋ wo Dèdaiŋ nɔɔ̀ŋ kuwa ke nyowo lɛ̀. “Ɓɔ̀ nìŋ kilià è kiti ànyùùŋ diɛŋ wèè màŋ jùumù nyiŋ màŋ, kpeiŋ kɛ̀ wo Dayà naìŋ kìlìè kiti diɛŋ wèè màŋ jùumùiŋ màŋ nyɛ̀iŋ pɛɛ. Jùùyaìŋ aŋ dàwiiŋ nyàŋ hakɛ̀ wèè e keì naanààaŋ àŋ naiŋ jàà lɛ, kpeiŋ kɛ̀ wo Dayà wòiŋ jùùyà hakɛ̀ nyɛ̀iŋ pɛɛ. Sèè nìŋ kiɛ̀ŋ aŋ dàwiiŋ nyàŋ, yɛi wo Dayà doiŋ nàŋ kiɛ̀ŋ e dìa niŋ kpaŋ. È do nàŋ nɔ̀ŋ sɔ̀la niŋ wɔŋ pòum sùà e dià pi woiŋ niŋ kiɛ̀ŋ, e kìlà e kìɛŋ bi doiŋ nàŋ kpɛ̀lɛ̀ e mààŋ nyààŋ. E ɗèwè guùŋ nɛ nɔŋ nìŋ tuwà koɓɛ̀ aŋ dàwiiŋ nyàŋ lɛ, e ɗèwè guùŋ bi sùà nɔŋ wo Dayà do nàŋ tùwò ko nɛ̀ɛ̀iŋ niìŋ.” Wo Jisɛ̀ naŋ nyiŋ wòò ke kàɓanè yɛɛ̀ wààŋ, “Sèè wo nyuùŋ zììlè le fɛ̀ɛ̀ wo sìè wo dàwiuŋ nɔɔ̀ŋ feìŋ wèè wouŋ koà, nyiŋ tìyèe àŋ do nàŋ sɛ̀ɛ̀ ko golo. Aŋ kààjɔa gbiŋ kuwà è gààŋ àŋ do nìàŋ wò kààmɔɔŋ nyiŋ nɔɔ̀ŋ. Kɛɛ sèè aŋ kààjɔa aŋ gbeè e kìlà aŋ kpɛ̀ɛ̀yɛ̀ e gɔ̀ɔ̀yɛ nyiŋ nɛ̀, àŋ do nàŋ nɔ̀ŋ mààŋ wo kààmɔɔŋ nyiŋ nɔɔ̀ŋ. “Wèè kiìŋ mùŋ yɛmɛ̀ e kuùfìèɛ ko sòòfɛ̀ɛ̀ wùìya mɔɔ̀ŋ, kɛɛ muŋ fè jàà jii kɛ̀ wɔ̀ŋ kuùfòò gbee kòò wɔ̀ŋ yaà kò sòòfɛ̀ɛ̀ muàŋ biì? Dièsɔa mùŋ naŋ ɓɛ̀nɛ̀ŋ wòò wo wùìya mɔɔ̀ŋ maàŋ, ‘Tɔ̀ miŋ gòum e kuùfìèɛ ko sòòfɛ̀ɛ̀,’ kɛɛ muŋ fè yɛ̀mɛ̀ wɔ̀ŋ kuùfòòɔ kò sòòfɛ̀ɛ̀ muàŋ biì? Mùŋ yaà wo nyùùŋ fɛ̀ɛ̀ ɗòònààkeì. Gè wɔŋ kuùfòòɔ ko sòòfɛ̀ɛ̀ muìŋ jiɛ̀, kpeiŋ kɛ̀ màŋ ɓɛ̀nɛ̀ŋ yɛ̀mɛ̀ dìì tɛ̀ɛ̀ wèè maŋ gè e kuùfìèɛ ko sòòfɛ̀ɛ̀ wùìya mɔɔ̀ŋ. “Ke kuù bɔ̀u fè kòmàŋ kè kuù kòmàŋ naanààŋ, e kìlà ke kuù naanààŋ fè kòmàŋ kè kuù kòmàŋ sìàŋ. Nìŋ do nàŋ nyìmè e nɔ̀ŋ kìì ke kùlɛ̀ɛ e yìwìà ke komàŋ nyiŋ nɛɛ̀ŋ. Niŋ fè ɓɛ̀nɛ̀ŋ kpàà màŋ feè kòmàŋ ɔ̀ɔ̀ màŋ gbɛ̀mɛ̀ɛ̀ŋ komaŋ è yìwìà è ɓìè màŋ dɛiŋ sùà. Wo nyuùŋ sìàŋ hiàŋ maŋ nɛ̀ŋ kɛnɛ e yìwìà ko sùlò maŋ nɛ̀ŋ kɛnɛ ke jiiuŋ nɛɛ̀ŋ sùà. Wo nyuùŋ naanààŋ hiàŋ maŋ nɛ̀ŋ naanààŋ e yìwìà ko sùlò maŋ nɛ̀ŋ naanààŋ ke jiiuŋ nɛɛ̀ŋ sùà. Wɔŋ nyààŋ nàŋ woà e nɛ̀ɛŋ naum dìè ke jiio sùà lɛ. “Wèè kiìŋ nìŋ nyààìm ‘Kanaà, Kanaà,’ kɛɛ niŋ fè nyɛ̀nɛ̀ŋ è yèɛ mìŋ woàìŋ lɛ? Wo nyùnɔ̀ɔŋ gbiŋ hnàŋ ko nɛ̀ɛ̀ŋ miìŋ yèè wo kòmàŋ maŋ miè gbìaim màŋ e kìlà wo miŋ jɔ̀ɔ̀lɔ̀ dìì wɔ, mìŋ doiŋ nàŋ tɔɔ̀ kɛ̀ diè wò yaà. Wò yaà mààŋ wo felaaà wo yèɔ naŋ tòmò e dììɛ tɛ̀ɛ̀ wèè wo ɓɛnɛ̀ŋ tɔ̀ɔ̀tù nyɛ̀lɛ̀ e kpèè ke saauŋ nɛɛ̀ŋ wɔŋ duò tàà diɛŋ. Maŋ gɔ̀àà maŋ naŋ sɔ̀ɔ̀, e wùìyèɛ jòwà e kìlìà ke saaàŋ, kɛɛ ke gò wa mɛɛmɛ̀ɛ̀ŋ, esaɓù kɛ̀ wò naŋ nyiŋ wa nyɛ̀lɛ̀ tɛ̀ɛ̀ wɔŋ duò tàà diɛŋ. Kɛɛ wo nyùnɔ̀ɔŋ gbiŋ naŋ kòmò maŋ miè gbìaim mɛɛ̀ŋ yèè wò naŋ gè maŋhɛɛ wèè wo miŋ jɔ̀ɔ̀lɔ̀ dìì wɔ, wò yaà mààŋ wo nyùnɔ̀ɔŋ gò tòmàŋ e dììɛ wèè wo tɔ̀ɔ̀tù nyɛ̀lɛ̀ e kpèè ke saauŋ nɛɛ̀ŋ. Maŋ gɔ̀àà maŋ naŋ sɔ̀ɔ̀, e wùìyèɛ jòwà e kìlìà ke saaàŋ, eɓìèmàŋjɛ̀wɛ̀, ke saaàŋ naŋ gɔɛɛ ke sɔ̀àà dìì fukpù.”