१ थिस्सलोनिकि 1
1
1पानुदिङ् पा निङ्वाॽफुमाङ् नु दाङ्बा ये़सु ख्रिस्ते़न् नसान् के़जोःक्पा थिस्सलोनिका#१:१ थिस्सलोनिका—कन् ये़क्यक्किन् मे़सेदोनिया लाजेॽओबा ये़क्यक् वये़॥ खे़प्मो पावले़न् मनाहाॽ सुनाइङ् इङ्भोसे़ कुभा ये़म्लक् वये़॥ खे़न् ये़म्मो मनाहाॽरे़ नसान् के़जोःक्पाहाॽ तुक्खे मे़जाःत्तुसिर मे़वये़॥ ये़क्यक्समा सेसेहुप्लक्कोबा याप्मिहाॽओ, इङ्गाॽ पावल, सिलास नु तिमोथिलाम्बा#१:१ सिलास नु तिमोथि—कन् ने़त्छि मनाहाॽ पावलनु लाम्दिक् चोगे़त्छि हे़क्क्याङ् थिस्सलोनिकाओ सेसेहुप्लक् हेःक्मा खुने़ॽ फाॽरे़त्छु॥ सिलासे़न् ग्रिक पाःन्दाङ्ङो सिल्बानस मे़मे़त्तुॽ॥ कन् सक्इङ्घङ्ङिन् हाक्कासिगे़बारो॥ हाराॽ निङ्वाॽफुमाङ्लाम्बा सनारुङ् नु लुङ्गुम् के़घोसुम्लरो॥
थिस्सलोनिकिहाॽरे़ नसान् मे़जोगुबाओ नोगे़न्
2आनिगे तुवाओ खिनिॽ निङ्वाॽ इःत्तासिगे़र निङ्वाॽफुमाङ्ङिन् खिनिॽ लागि सदादिङ् नोगे़न् पिरुम्बे़ॽरो॥ 3आनिॽ पानुदिङ् पा निङ्वाॽफुमाङ्ङिल्ले़ कुनिमाओ नसाःन्लाम्बा के़जोगुम्बा खिनिॽ याःम्बक्किन्, वेॽहाॽ लुङ्माॽ के़दुक्तुम्सिम्माङ् स्याङ्मे़न्दाङ् के़जोगुम्बान् हे़क्क्याङ् आनिॽ दाङ्बा ये़सु ख्रिस्तरे़ याम्मो कुनुःङ्मा युमा निङ्साङ्लाम् के़दाबा निङ्वाॽ हाङ्गे़म्सिङ्मान् आनिगे चक्मे़ल्लॽए निङ्वाॽ इःत्तुम्बे़रो॥ 4निङ्वाॽफुमाङ्ङिल्ले़ लुङ्माॽ तुक्तुसिबा फुॽनुसाॽ नु ने़ॽनुसाॽसे, खिनिॽ आबाङे कुमना पोङ्से़ के़सेगिबा पाःन्निन् आनिगे निसुम्बे़रो॥ 5थेआङ्भे़ल्ले़ आनिगे सुनाइङ्ङिन् खिनिॽओ तारुम्बे़ल्ले़ पाःन्नोरक् मे़वये़न्, कर मुक्साम्मो वये़रो॥ हे़क्क्याङ् कङ्ग सेसेमाङ्लाम् आनिगे पाःत्तुम्बे़बा पाःन्निन् से़क्खासमा वये़ फाॽआङ् के़निसुम्लो॥ आनिगे खिनिॽनु वयिगे़ल्ले़ खिनिॽ लागि आनिगे हिङ्मन्निन् आक्तङ्बा वये़ के़लॽबान् नुरिक्काङ् के़निसुम्माङ् वाॽरो॥ 6आक्खे़न् तुक्खे के़ज्ये़ॽइसाङ् सेसेमाङ्ङिल्ले़ के़बिरिबा ओमुलॽमाओ सुनाइङ्ङिन् के़दाःक्तुम्॥ हे़क्केलॽरिक् खिनिॽग दाङ्बाल्ले़न् नु आनिगे चोःङ् के़इःत्तुम्माङ् के़वयिॽरो॥ 7हे़क्केलॽरिक् खिनिॽ मे़सेदोनिया नु अक्खैया थुम्मोबा के़रे़क् नसानिबाहाॽरे़ खुनिॽ कुबि के़बोःक्खिआङ् के़वयिॽरो॥ 8हे़क्क्याङ् खिनिॽलाम् दाङ्बाल्ले़ कुबाःन्जाक्किन् मे़सेदोनिया नु अक्खैयाओरक् मे़से़ःरे़न्, कर निङ्वाॽफुमाङ्ङोबा खिनिॽ नसाःन्निन्नाङ् काक् पिसाङ् मनाहाॽरे़ निङ्वाॽ मे़घोसुरो॥ हे़क्केःल्ले़ आनिगे वेॽ पान् पाःप्मा थेआङ् होप्, 9थेआङ्भे़ल्ले़ खिनिॽओ त्ये़ॽइगे़ल्ले़ याप्मि के़दाःक्तिबा पान् नु नावाइत्ला से़वा चोःक्मोलाम् के़नुःक्खिआङ् से़क्खा नु आजुनि निङ्वाॽफुमाङ्ङिन् से़वा के़जोगुम्बा पाःन्निङ्ग काक् मनाहाॽरे़ए मे़जे़क्खु मे़बाःत्तुॽरो॥ 10हे़क्क्याङ् निङ्वाॽफुमाङ्ङिल्ले़ सिमे़न्लाम् याम्मो हिङ्घुबा कुस्सा ये़सुरे़ साङ्ग्राम्पेदाङ्लाम् कुयुमे़न् के़हाङ्घुम्बान् मे़मे़त्तिगे़आङ् वाॽरो॥ खुने़ॽए के़दाबा निङ्वाॽफुमाङ्ङिल्ले़ कुघुम्दिङ्लाम् ताङ्आसे़ःप्लो॥
Currently Selected:
१ थिस्सलोनिकि 1: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.