BaFisa 2

Kutset kufas ayɛt Anet-Isheshek

1Iyin kin tsang kus yin ayɛt iras nkyɔrɔk nduk e nɛ anɛn yin, 2fi i kin tsang di sot yin yame, ni izen fi i tsang kuus yin nggɔn azatse kang, na agwɔm yɔng fɛ́ a ya igwɔm naton itseng azatse, kabik fɛ́ ka se ni kutomong yɔkɔnɔng ayɛt ayɛ bayɔng fɛ́ ba ras iduk e. 3Ngma yit in kin se yit ti iba yaame, in ras yit nkyɔrɔk fi nrɔm na ayɛ anɛn yit tsɛsɛk, nek nse kusot anɛn yit, i se gbing ni in nyim yit ne kafa kawe Adakunom kpaf ti nshɛrɛp banet.

4Awɛt nek kudot ishim fɛ́ Adakunom bɛ̀ nek iyit, nɛ kurúm angmishish wu, 5a ki nɔɔk yit kutset nɛ Anet-Isheshek, ngma fi in tsang kus yit ayɛt idun yit, ayet nek itek de fɛ́ ba ki sheshek yin mo. 6Nek kusot yit ayɛt Anet-Isheshek aYeso, Adakunom ki donong yit gung ni wu, a ki nɔk yit karɔ isonong ni wu azɔng azanɛn, 7nɔng ni kuzam fi ku bi bɛ́, a bi di tonong kurúm itek wu, ni irèn ishim fɛ́ a tonong ayɛt Anet-Isheshek aYeso. 8Nek ni itek de fi i di sɛ yin isheshek, ni inɔɔk atsak, a yet nek fi iyin awo, a yet kunang Adakunom, 9a yet nek kutomong ikikak awo, kɔng akak bi tsot kugwɔm. 10Nek iyit yet yit kutomong ibɔk Adakunom, a ki nye yit ayɛt Anet-Isheshek aYeso nek in ras yit ntomong ntek, nyɔng fɛ́ Adakunom man sak in di ras yit kutomong.

Bazining ayɛt Anet-Isheshek

11Nek anɔng, yiring yin fok iyin yet yin Ícɛn-iduk ni kutes, bayɔng fɛ́ baYahuda “bafɛ́ katse” ki yes yin, “bafɛ́ avit katse”, fi mbɔk banet ras kurɔm e. 12Yiring yin fok ni izen e yɔng, iyin kin se yin atsitse na Anet-Isheshek, vit ayɔng fɛ́ a ki fa yin ti nnon mben aIsrela, i kin yet yin batsen ayɛt irosom kushi fɛ́ Adakunom man nye, vit iyin ni ite iyɛ, vit iyin na Adakunom azatse kang. 13Awɛt kyɔrɔng fi i se yin ayɛt Anet-Isheshek aYeso, iyin fi i tsang se yin yik-yik, ba mi bɛ́ ni iyin bakat nek nasok Anet-Isheshek.

14Nek iwu ice wu yet kukyang yit, iwu fɛ́ a mi sak bafaa me sot azining, a mi yirik kubat, ni ikyɛng yɔng fi i kaba yit, fi ibɛ́s ni ifà, 15ni kurɔm wu, a di tun agap ntsi nɛ agbat ifɛ̀ ni nkyɔrɔk in se gbing na ba ras. A nye anɔng, nek a di nok banet bafaa me na ba sot anet azining afas, na anɔng kukyang di sɛ. 16Ni kurɔm kuzining e, a di bɛ ni inosong-ashi nek banet bafaa me sak na Adakunom ayɛt iku wu ni ikum, a di fɛt ifà me. 17A bɛ́ a ki shara yin kusot kukyang, iyin fi i tsang se yin yik-yik, nɛ bayɔng fɛ́ ba se bakat. 18Na Anet-Isheshek, baYahuda nɛ Ícɛn-iduk in di sɛ yit irèn sak na Ada ni irèn Kabik kazining e.

19Nek anɔng, yɔkɔnɔng, iyin ti i yet yin batsen nɛ bafɛ́ amatse awo, tit nnon mben gung nɛ banet Adakunom, bafɛ́ ari Adakunom, 20bayɔng fɛ́ ba nok iba azaton itis fɛ́ batom-aYeso nɛ batan ta, fɛ́ Anet-Isheshek aYeso ice wu yet kuta itsok itu kutek ayɛt inok e. 21Naton wu wu fi inok e ngma kusum kana moon mo, i di rasak sak isot kutu ajɛrɛ fɛ́ ba mi sak nek aTisa. 22Ni kusot fi i se yin ayɛt wu, ba tsin ki nok yin mok ni isot yin karɔ fɛ́ Kabik Adakunom dí sosok.

Currently Selected:

BaFisa 2: IbaasNT

Highlight

Copy

Compare