फिलिप्‍पी 1

1गिन येसु ख्रीसए ओय़ेन दोज़्‍याव ओनोकोरनी पावल स़ोनो तिमोथीनी गिन्‍ल्‍योनी, जे फिलिप्‍पीलाव येसु ख्रीसए छैंव उमींर स़ोनो जेलोम्‍बार जेस़ेररालाई आव चिथी परींद गिन्‍याचिज़्‍या। 2परमेस्‍वर गेबाबु स़ोनो गेप्रभु येसु ख्रीसनी जेल्‍योदा नियुँ गराँद जेयुँ होलाँ जैद ओयाचिरक।

जेलाई रँःद ङायुँ हुबो ज़ लिज़्‍या

3ङा जेलाई ङाचेतैचिउ पती परमेस्‍वरलाई धन्‍याबाद चरैःद, 4जेजूँनी परमेस्‍वरलाई ङापोंखारिक एकतार रेंद ज़ ङापोंखारिज़्‍या। 5काराव ल्‍यो ताकिन जे जेयुँ उहुबो छ्यामकिन ज़ परमेस्‍वरए चाव ओथा ङारासथैक ङालाई प़ाइँनी ज़ जेसघैनाके। 6आव तोबो पाँत ङायुँ हुप्‍द ले — परमेस्‍वरए जेयुँलाव थूद ओनैज़्‍याव चाव ओय़ेन भरी येसु ख्रीस फरी उहुन्‍या छ्याम सयो·द तुपैद्यान्‍या ले। 7जे ङालाई जेसघैनाज़्‍यावए जेगुनर ङा खर्क ज़ मामेंःन्‍या ज़्यासो लिज़्या। ङा झ्‍यालखानाल ङालिज़्‍याक ब, पाखात ङालिज़्‍याक ब, परमेस्‍वरए चाव ओथा ङारासथैज़्‍याक परमेस्‍वरए उयुँ ओय़ालोनी ज़ जे मनी ङादैव य़ेनत ङास सिप जेदोव मिताव ज़ ताके। 8ङा जेस खर्क गेदैसिके लिद येसु ख्रीसए ओमयानी ङायुँ थू ङाजैज़्‍याव परमेस्‍वर साची लिज़्‍या।

पावलए पोंखारिद ओरायो

9जेजूँनी परमेस्‍वरलाई ङापोंखारिक, ‘या याल तयुँ ताद झन ज़ ओखैनारक’ लिद पोंखारिउ ज़ ङानैज़्‍या। नो जेखैज़्‍याव अइज़ माःक, परमेस्‍वर किताव उलिज़्याव लिद सरेस्‍द, चाव माचाव छुतैद खैच्‍यो। 10हो ताकिन ची चाव पाँ भरी थ·रैद ख्रीस उहुक जेखत माल्‍यो छैंवर तान्‍या जेले। 11येसु ख्रीसनी ताज़्‍याव चाव य़ेन भरी जेक्‍याँत झन ज़ ओरैंःनाक। ननी ज़ परमेस्‍वरलाई ज़गै मगैव ताद उमिन ब झन ज़ घ्योःन्‍या ले।

पावल झ्‍यालखानाल

12अ ङानैं ङामेंर, ङाक्‍याँत ताव माचावरानी चाव था झन ज़ थास्‍नाके। 13ङालाई ख्रीसए ओय़ेननी झ्‍यालखानाल याझाःनाव दरबारलाव सिपाईं भरी स़ोनो छुत मिँराए ब थैद नैर। 14इताव ङासहिज़्‍यावनी फरी उपुर्काव गेदाज्‍यु भाइराए मनी प्रभुए ओल्‍योदा यायुँ झन ज़ सुहुप्‍द ओपाँ माछे·द ज़ यारासथैज़्‍यार। 15ख्वा ख्वाराए ते यामी जाँ तूद ङाकिन सघ्योःसिन्‍याए जूँनी ख्रीसए ओपाँ यारासथैज़्‍यार। ख्वाराए ते सोजोनी ज़ यारासथैज़्‍यार। 16नो सोजोनी सथैज़्‍यावराए, ‘चाव था सथैन्‍यात पावल खतैसिउ लिज़्‍या’ लिन्‍या सैंद ङालाई मया दाद ज़ दोज़्‍यार। 17नो ख्रीसए ओपाँलाई तँनी सथैज़्‍यावराए ते छैंव युँनी माःक, झ्यालखानाल ङालिज़्याक झन ङायुँ सुहुर्द्यान्‍याए जूँनी यातिर वाज़ दोज़्‍यार। 18हैदी ब ख्रीसए ओपाँ जो मितावनी यारासथैदी ब ङायुँ माचाव मादोव, रेंव ज़ ङालिज़्‍या। सोजोनी तादी ब, सघ्योःसिन्‍यानी तादी ब, ख्रीसए उमिन ओथास्‍किन, हो ज़ प़ाइँरानी घेप्‍पा लिज़्‍या।

पावलए उयुँ ऩेथोदा ओजैव

हैज़, ङा रेंव ज़ लिन्‍या ङाले। 19काराव ल्‍यो ताकिन जे ङाजूँनी पोंखारिद जेयाँज़्यावए स़ोनो येसु ख्रीसए उपुरूसए ब ङालाई ओसघैनाज़्‍यावए ङा तछा आनी पुलुस्न्‍या ज़ ङाले है ङालिज़्‍या। 20हैदी ब आव तोबो पाँत वाज़ ङायुँ थू ताद आस ङादोज़्‍या — ङा कातानी ब लाज मोर्नो ङामाताक लिद आथ पाला मनी एकतारकाव ङादोज़्‍याव मिताव माछे·द ज़ ङादोधुक। हो ताकिन ची ङाबाँचिदी ब, ङासिदी ब, ख्रीसए उमिन ङाक्‍याँत घ्योःन्‍या ले। 21ङाबाँचिदी ब ख्रीसए जूँनी ज़ ङाबाँचिज़्‍या। ङासिदी ब ङालाई झन पाथ ज़ लिज़्‍या। 22खाली आव ङाक्‍याँत जाँवा पै लिद ओय़ेन दाव ङादैकिन हो ब चाव ज़ लिज़्‍या। आव ऩेब्‍लोनी काताकाव रूजिन्‍या ङा ङामासैंए। 23ङायुँ ऩेथोदा ज़ लिज़्‍या। आव मानुवात लिज़्‍यावकिन ख्रीसए ल्‍योदा बान्‍या ङायुँ लिज़्‍या, नदा बान्‍या पाथ लिज़्‍या। 24खाली जे जेजूँनी ङा आव मानुवात लिन्‍या ओचाहित लिज़्‍या। 25नो पाँ ङा पक्‍का ङासैंज़्या। ङालिकिन जेलाई पाथ पारैद परमेस्‍वरलाई जेयुँ हुप्‍न्‍यात झन ज़ रेंद लिन्‍या ङाजैचिरिज़्‍या। 26हो ताकिन ङा जेल्‍योक फरी ङाहुक जे येसु ख्रीसए ङाक्‍याँताव ओदोव रँःद जेसुनी झन ज़ च्‍याँःसिन्‍या ले।

परमेस्‍वरए ओपाँत दुख सहिन्‍या

27खाली जे ख्रीसए ओपाँत लिज़्‍यावरालाई उसहिज़्‍याव मिताव दोच्‍यो। हो ताकिन ची जेल्‍योक हुद ङामीए ङारँःदी ब, आनी जेल्‍योक हुव ङामादैदी ब, ‘परमेस्‍वरए ओपाँत यायुँ हुप्‍द तयुँ जैद थ॰रिद लेर दी’ लिन्‍या थैन्‍या ङाले। 28स़ोनो, ‘याखिरी पसिज़्‍यावरालाई रँःद माछे·द परमेस्‍वरए ओपाँए जूँनी धामा दाव ज़ नैज़्‍यार दी’ लिन्‍या ब थैन्‍या ङाले। नो खिरी यापसिज़्‍यावत ऩेथो सरेस लिज़्‍या — खिरी पसिज़्‍यावरालाई परमेस्‍वरनिकाव सजा दैन्‍या सरेस लिज़्‍या, जे मिताव सहिज़्‍यावरालाई फरी परमेस्‍वरनी बाँचिन्‍या सरेस लिज़्या। 29ख्रीसलाई युँ हुप्‍न्‍या वाज़ माःक, जेलाई होए उजूँनी दुख सहिन्‍या असिक ब याद नैचिउ। 30आव ङादुखल जे ब ङास ज़ जेलिज़्‍या। नो ङादुखर ङ़ादाकिन ब जेरँःज़्‍याव, आज्‍याल मनी जेथैज़्‍या।

Currently Selected:

फिलिप्‍पी 1: NKham

Highlight

Copy

Compare