२ कोरिन्थी 2
2
1है जैद ङा जेल्योङ हुद जेयुँर सुहुर्द ङायाचिज़्याव देखा बुरू माबान्या पाथ लिज़्या लिन्या ङाथ·रैके। 2ङा जेलाई ङारिसए जेयुँर सुहुर्द ङायाचिकिन, नितावल जेकिन ङालाई सुए ची ङायुँर होलाँ जैद ओयाँरिज़्याव? 3है जैद जे ङालाई ङायुँ होलाँ जैद्याव परिन्याराए ‘ङाहुक ङायुँर माचाव जैद तायाँरक’ लिद आवकिन नो ङ़ादाङाव चिथी ङासर्क, ङायुँ होलाँ ओताकिन जे जेयुँ ब होलाँ ताया लिद ङायुँ हुप्द ओल्यो। 4खाली नो चिथी ङापरींज़्याव बेलाक माचाव जेय़ेनत ङायुँर घर्द ङाप़िलर ऱास्द ङार्सार सैःद ङापरींके। नो ङापरींव जेलाई जेयुँर केःद्यान्याए जूँनी माःक, बुरू जेलाई खा मया ङादाचिज़्याव हो घसैंरक लिद ङापरींव ची।
माचाव य़ेन दोवलाई ऱास्न्या
5जेसकाव नो माचाव य़ेन दोवए ङा ङायुँर माचाव जैद ओयाँकिन ङालाई वाज़ माःक, जेलाई ते झन जेयुँर ब सुहुर्द्याचिखेहो। 6जे जाँकोसैए नोलाई जेयो सजा यो·के। 7अब ते जे नोलाई ओगल्तीनी ऱास्द उयुँर होलाँ जैद्याव ताके, म़ानी ओसोगोए उयुँर क़्यान्या ओछ्यास लिज़्या। 8है जैद जे नो मिँए ओल्योदा फरी जेयुँ ओनाव सतैंद्याव ताके लिद जेलाई ङाघलैचिज़्या। 9नो ङ़ादाङाव चिथील ब ङापाँ यादोज़्याव सैं यामादोज़्याव लिद जेलाई जाँचिन्याए जूँनी ङापरींव। 10नोलाई ओगल्तीनी जेऱास्किन ङा मनी ङाऱास्ज़्या। है जैद जेल्योङावर ऱास्सिन्या मितावर यालिकिन ङा मनी जेजूँनी ख्रीसए ओयाँव हकनी ङाराऱास्ज़्या। 11म़ानी सैतान गेखार्ल पसिद बले·न्या ओछ्यास ब ओल्यो। नितावल गे सैतानए ओचाल मासैंधुन्यार ते गेमाले।
पावलए उयुँ थू ओताव
12ख्रीसए ओपाँ सथैन्याए जूँनी त्रोआस सहरल ङालिज़्याक नलावरालाई ख्रीसए ओपाँ सथैन्या प्रभुए बनै चाव मौका जोरैद्याँक्यो। 13खाली नल जेल्योनी हुन्या गेभाइ तीतसस गिन्मादैसिउए कै याताव लिद ङायुँ थू ताद नलावरास बिदा ऩिद माकेदोनियादा ङाबाके।
परमेस्वरए ओपाँ गेक्याँत सतैंसिउ
14हैदी ब परमेस्वरलाई बनै धन्याबाद लिज़्या, गेलाई ओय़ेनत आदा होदा ओजैसिक झेंःस्याराए झेंःस्या ख्रीसलाई एकम्न्या गेस नैद्यासिज़्याव। है जैद पो पोङ गेनी परमेस्वरए ओपाँ चाव सी ङरो माँःती रा·सिनाज़्या। 15गे ख्रीसए ओपाँ गेरासथैक अजम्बरी जुनील बाज़्यावराए खार्ल तादी ब, नर्गल बाज़्यावराए खार्ल तादी ब, गे परमेस्वरलाई चरैःसिउ सी ङरो स्यासोर गेलिज़्या। 16नो नर्गल बाज़्यावराए जूँनी चिची सी ङरो स्यासोर गेलिज़्या। फरी नो अजम्बरी जुनील बाज़्यावराए जूँनी ते चाव सी ङरो स्यासोर गेलिज़्या। गेनी निताव अचम्बलाव य़ेन माबिरैद दान्यार सु ची गेलिज़्यावदा? 17हैदी ब गे निताव य़ेन चबनै मासुदुम्धुन्यार गेतादी ब ख्वा ख्वाराए यादोज़्याव मिताव परमेस्वरए ओपाँ अइज़ दुलैज़्याव मितावर ते गेमाले। गे ते परमेस्वरनी परींसिउ मिताव जैसिद ओल ओङ़ाक छैंव युँस ख्रीसए ओसक्तीनी ओपाँ गेरासथैज़्या।
Currently Selected:
२ कोरिन्थी 2: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
