१ कोरिन्थी 16
16
पावलए यरूसलेमदा लाँव ओपैंज़्याव भिती
1परमेस्वरए यरूसलेमलाव छैंव उमींरालाई भिती दुप्द्यान्याए जूँनी ङा गलातियालाव मन्दलीरालाई है ङारादोज़्याव मिताव जे ब दोच्यो। 2साताकाव तखेप उस॰कताव छ्याम सु सु जेधुवाकाव दुप्द नैच्यो। ङा ङाहुवत स्यो·न्या ताताक। 3ङा ङाहुवत नो जेदुपो भिती यरूसलेमदा लाँन्याए जूँनी सु सु जेराखतैरिज़्याव ङा नोरालाई कागतर सर्द्याद ङारापरींरिज़्या। 4ङा ब बाव परिन्या स्यासो ओताकिन नोरास ङाबारिज़्या।
हुन्या बन्दोबस्तर
5ङा जेल्योदा माहुद ङ़ादा माकेदोनियालाव मन्दलीरालाई दैना ङाबाज़्या। नोरास ङादैसिउत वाज़ जेल्योङ हुन्या ङाले। 6ङाहुवत जाँवा जेस ङालिरिज़्या, ओताकिन य़ुँदा भरी ज़ ङालिरिज़्या। हो ताकिन ओल्द ङाबाक ङालाई जाँ जाँ जेसघैनाए सैं है ङालिज़्या। 7फरी जेस निताव तछा ऩेलाए जूँनी काता दैसिन्या है ब ङालिज़्या। खाली परमेस्वरए जोरैद ओयाँकिन जाँवा पै जेस ल्यो ङादैकिन ताखेहो है ङालिज़्या। 8खाली नो पेन्तिकोस पर्ब ओमाहुवा पै आल एफिससल ज़ ङालिरिज़्या।#लेबी २३:१५-२१; ब्य १६:९-११ 9आल परमेस्वरए ओपाँ वैंज़्यावर कुधु ज़ यालिदी ब ङालाई परमेस्वरए ओपाँ सथैन्या घ्योःव मौका जोरैद नैद्याँव।
10ङा ङामाहुद ङ़ादा जेल्योङ तिमोथी उहुकिन नोलाई उयुँ आँचा पाँचा जैद मायाद पाथस नैच्यो। नो मिँ ङा स्यासो ज़ गेप्रभुए ओय़ेन चावस ज़ दोज़्याव। 11है जैद नोलाई सुए ज़ तासोरक। बुरू नोलाई चावस सघैद ङाल्योदा परींद्याँच्यो। ङा नोलाई ओलस बाव ओनैंरास ओयेम चिऊव ज़ ङालिज़्या। 12गेभाइ अपोल्लोसलाई नोरास जेल्योदा परींन्याए जूँनी बनै कर ङालैक ते आथ पाला भैंः ज़ माभैंःके। ओताबोत जुनी ब हुन्या ले।
सम्जैन्या पाँर
13जोगोइसिद लिच्यो, जेयुँ जेसुहुबो पाँत थ॰रिद लिच्यो, माछे·द घ्योःव युँ जैद लिच्यो। 14जेदोज़्याव य़ेन भरी मयास दोच्यो।
15अ ङानैं ङामेंर, ङा स्तिफनास स़ोनो उझ़िमलावराए जूँनी तोबो है ङादाचिज़्या। जे ब जेसैंज़्या, अखैया खन्दलाव प़ाइँरानी ङ़ात परमेस्वरए ओपाँत हुवर नोर ज़। नोराए परमेस्वरए छैंव उमींराए यासेवा दान्यात ज़ याजिउ यायुँ भरी झाःद नैर। 16है जैद जे निताव मिँराए याधूँल लिद यापाँ भैंःच्यो। नोरालाई वाज़ माःक, परमेस्वरए ओय़ेन धामास दाज़्याव भरिलाई ब यामान नैद याराएच्यो। 17स्तिफनास, फोर्तुनातस स़ोनो अखाइकसर जे जेल्योनी याहुक ङा बनै ङारेंके। जे जेमालिकाव स्याँब्या स्योंबे नोराए पुरा जैद्याँकेर। 18जे जेयुँर होलाँ जैद यायाचिउ मिताव ङा ङायुँर ब होलाँ जैद्याँकेर। है जैद निताव मिँराए यागुन तामेंःच्यो।
जेरो दान्या पाँर
19एसिया खन्दलाव मन्दलीराए जेलाई जेरो है दाचिज़्यार। अकिलास स़ोनो प्रिस्किलानिस निझ़िमकाव दुप्सिज़्याव मन्दलीए ल्योनी ब ‘प्रभुए उमिननी बनै बनै जेरो लिज़्या’ है दाचिज़्यार। 20आङाव दाज्यु भाइ भरिए ब जेरो है दाचिज़्यार। है जैद जे जेल ब मयास#16:20 रोम १६:१६ चिऊन्या। जेरो दासिच्यो।
21आव चिथीत ङा पावलए ङाकुइनिकाव दस्कत ज़ झाःद ङानै, सरेस्च्यो। 22जोए उयुँ गेप्रभुए ल्योदा माले, होलाई सराप ओलागिस्क। अ प्रभु, चाँदो ज़ घुहुनी। 23गेप्रभु येसुए उयुँ जेल्योदा ओगराँक। 24येसु ख्रीसनी मया ङादाचिज़्याव जेक्याँत ओरैंःक। [आमेन।]
Currently Selected:
१ कोरिन्थी 16: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
