१ कोरिन्थी 14
14
परमेस्वरए उपुरूसनी पाँन्या स़ोनो छुत खामनी पाँन्या
1जे ब प़ाइँरानी ङ़ात छुतए ल्योदा मया दान्यात कलँ ल्यो ताके। हैदी ब परमेस्वरए उपुरूसए ओयासिज़्याव बरदानर ब खिम्न्यादा धामा दोच्यो। प़ाइँरानी ङ़ात परमेस्वरए उपुरूसनी पाँन्या खिम्च्यो। 2परमेस्वरए उपुरूसनी छुत खामनी पाँज़्याव मिँ ते मिँरास ओपाँज़्याव माःक, परमेस्वरस पाँज़्या। नो मिँए खर्क ज़ यामाथैताव पाँर छैंव पुरूसनी ओपाँवए सु मिँए ज़ माबुझिधुर। 3परमेस्वरए उपुरूसनी पाँज़्याव मिँए ते मिँराए जूँनी ज़ पाँज़्या। नो पाँए पाथ पारैव ब दोज़्याव, युँलाई सझेंःद्याव ब दोज़्याव, युँ होलाँ ब जैद्याव दोज़्याव। 4नो छुत खामनी माबुझिसिउ पाँ पाँज़्याव मिँ ते ओललाई वाज़ बनैज़्याव। परमेस्वरए उपुरूसनी बुझिसिउ पाँ पाँज़्याव ते मन्दली भरिलाई ज़ बनैज़्याव। 5जे परमेस्वरए उपुरूसनी छुत खामनी जेपाँज़्याव ते चाव ज़। खाली होकिन बुरू परमेस्वरए उपुरूसनी जेपाँधुकिन ताखेहो है ङालिज़्या। काराव ल्यो ताकिन नो पुरूसनी छुत खामनी पाँज़्यावए नो पाँए ओअर्थ पलास्द ओमाराएधुकिन मन्दलीलाई माबनैधुव। नोकिन बुरू परमेस्वरए उपुरूसनी पाँज़्याव मिँए ओचाहित घेप्पा लिज़्या।
6है जैद ङानैं ङामेंर, ङा ब जेस निताव सुए ज़ माबुझिधुन्या पाँर ङापाँकिन जेलाई काता ची ओतारिज़्याव? बुरू परमेस्वरए ल्योनिकाव साःरो पाँ ङापलास्धुकिन, सुए ज़ यामासैंताव पाँर ङासतैंधुकिन, परमेस्वरए उपुरूसनी ङापाँधुकिन, जेलाई ङापैचिधुकिन वाज़ जेलाई तान्या लिज़्या। 7किताव तप्न्या बाजार ब, बाँसुलीर सारङ्गर यातप्क यार्गा घेप्पा ज़िम्ज़ा यामाजैकिन आव गित ओल्यो लिन्या माथ·रैसिधुइ। 8लरैं दान्या झाःसिन्याए जूँनी भोंकर तप्ज़्यावए चावस ओमातप्किन सिपाईंराए आवए उजूँनी ओल्यो लिन्या कै जैद यासैंरिज़्याव? 9हो मिताव ज़ जेयाःनी प़ाइँए बुझिधुन्या पाँ जेमापाँकिन, ‘आव ज़ ओपाँज़्याव ओल्यो’ लिन्या सुए ची ओसैंरिज़्याव? नो जेपाँ ते बतासए ओलाँव मिताव ज़ ताज़्या। 10आव मानुवाताव मिँराए सु सु याखामर कुधु किसिम ज़ लिज़्यार, खाली ओअर्थ माल्यो खाम ते माले। 11हैदी ब ङा ङापाँ नोए ओमाबुझिकिन, नोए ओपाँ ङा ङामाबुझिकिन ओल काताङाव ङा काताङाव मिताव ज़ गिन्ताज़्या। 12है जैद परमेस्वरए उपुरूसनिकाव बरदानर खिम्न्यादा वाज़ युँ जेदोज़्यावए जे ब प़ाइँरानी ङ़ात मन्दलीलाई बनैन्या बरदानर खिम्च्यो।
13है जैद जोए परमेस्वरए उपुरूसनी छुत खाम ओदोकिन होए ‘नो पाँए ओअर्थ ब पलास्धुन्या बरदान ङादैक’ लिद परमेस्वरलाई ओपोंखारिउक। 14ङा छुत खामनी ङापोंखारिज़्या ल्यो ताकिन नो ङापुरूसए पोंखारिज़्याव, खाली ङाबुद्धी ते माचलिए। 15हिताव ताकिन कातानी दान्या लिक ते, ङापुरूसनी ङापोंखारिकिन ङाबुद्धीनी ब ङापोंखारिज़्या, ङापुरूसनी गित ङागैकिन ङाबुद्धीनी ब ङागैज़्या। 16म़ानी जेपोंखारिक माबुझिधुन्या पाँनी धन्याबाद चरैःद परमेस्वरए उमिन बनै ज़ ओथास्क है जेलिकिन, नो पाँ माबुझिधुन्या मिँए कै जैद जेपाँ जोर्द्याद, “हैज़ ओताक,” है उलिरिज़्याव? 17निताव जेपाँनी धन्याबाद चरैःन्या ते जेचरैःज़्याखेहो, खाली नो माबुझिन्या मिँलाई ते फाइदा माले। 18निताव छुत खामनी पाँन्या बरदान जेकिन ङास झन कुधु लिज़्या। होए जूँनी परमेस्वरलाई धन्याबाद ब ङाचरैःज़्या। 19हैदी ब मन्दलील यादुप्सिक माबुझिसिन्या खामनी दस हजार गोता पाँ पाँज़्याव देखा, पाँच गोता तादी ब प़ाइँए बुझिन्या खामनी ज़ ङापाँरिज़्या।
20अ ङानैं ङामेंर, जे निताव पाँर सैंन्यात भाउज़ा स्यासोर ताताच्यो। माचाव य़ेनत वाज़ भाउज़ा मितावर ताच्यो, बुद्धीत फरी छिबोर ताच्यो। 21धर्मसास्त्रल इताव सर्सिउ लिज़्या,
परमेस्वरए है लिज़्या, “ङा जेलाई तादाङावराए यायाःनी,
याखाम जेमाबुझिधुज़्यावराए ल्योनी,
ङापाँ ङासथैचिरिज़्या।
हितावत ब ङापाँ थैद ज़ यान्या जेमाले।”#यसै २८:११-१२
22निताव माबुझिधुन्या पाँर परमेस्वरए ओपाँ भैंःज़्यावराए जूँनी ते माःक, माभैंःज़्यावराए जूँनी सरेस लिज़्या। फरी परमेस्वरए उपुरूसनी पाँन्या ते ओपाँ माभैंःज़्यावराए जूँनी माःक, भैंःज़्यावराए जूँनी लिज़्या। 23है जैद मन्दलील जेदुप्सिक जे प़ाइँए परमेस्वरए उपुरूसनी सुए ज़ माबुझिधुन्या पाँर जेपाँक, नो बेलाक परमेस्वरए ओपाँत माहुवर मासैंतावर नक यालिकिन, “आवर ते बूलिउर ची सा,” है मालेर रो? 24खाली प़ाइँए परमेस्वरए उपुरूसनी जेपाँक परमेस्वरए ओपाँत माहुवर मासैंतावर नल याहुकिन नो जेपाँए याक्याँलाई जाँचिद, “गे ते पापीर ची गेल्यो,” लिन्या थ·रैन्या लेर। 25हो ताकिन नोराए यायुँलाव पाँर छर्लङ्ग रँःद नामक फुलुप्सिद, “परमेस्वर ते आवरास ची उलिज़्याव ओल्यो,” लिद या ब परमेस्वरए ओसेवा दान्या लेर।
दुप्सिकाव य़ेन
26ङानैं ङामेंर, जेदुप्सिक जे कितावर ताव परिके लिक ते, जेस ख्वार भजन गैन्यार, ख्वार पाँ पैन्यार, ख्वार परमेस्वरनी साःरो पाँ सतैंसिउ पलास्न्यार, ख्वार परमेस्वरए उपुरूसनी छुत खामनी पाँन्यार, ख्वार नो पुरूसनिकाव पाँर पलास्न्यार जेलिकिन, नो जेपाँ भरी प़ाइँलाई तान्या ओताक। 27परमेस्वरए उपुरूसनी छुत खामनी पाँन्यार यालिकिन ऩेब्लो स़ोम्लोराए वाज़ ओपाँरक, हो ब तखेप्त माःक, पालास पालास ओपाँरक। नोराए यापाँ फरी तोबोए पलास्द ओरायोक। 28नो पाँए ओअर्थ पलास्धुन्यार यामालिकिन नो पाँज़्याव मिँ मन्दलील च़िम दाद उलिक। उयुँल उयुँल वाज़ परमेस्वरस ओपाँक। 29परमेस्वरए उपुरूसनी पाँज़्यावर ब ऩेब्लो स़ोम्लोए वाज़ ओपाँरक। उपुर्कावराए नो पाँर थैद ओथ·रैरक। 30नो थैज़्यावराए खार्नी फरी तोबोए परमेस्वरए उपुरूसनी साःरो ओचाहित ल्यो पाँ ओदैकिन नो ङ़ादाङाव पाँज़्यावए च़िम ओदोवक। 31इतावनी ज़ परमेस्वरए उपुरूसनी पाँज़्यावर पालास पालास ओपाँरक। हो ताकिन ची नोराए यापाँ थैज़्याव भरिए परमेस्वरए ओय़ेनर सैंद यायुँर झेंःन्या ले। 32परमेस्वरए उपुरूसनी पाँज़्याव मिँए परमेस्वरए उपुरूसनी मापाँद ज़ मातान्या ते माले। 33काराव ल्यो ताकिन परमेस्वर अलमल जैज़्याव माःक, ओय़ेन भरी मेलास ज़ लाँज़्याव।
पो पोङ परमेस्वरए उमिनताव लिज़्यावराए मन्दलील यादोज़्याव मिताव, 34जे ब जेदुप्सिक जेसकाव मेंमार झ्याउँ झ्याउँ मालिद थैद ओनैरक। नोरालाई पाँन्या यासिउ माले। धर्मसास्त्रलाव सर्सिउ मिताव यारेराए पाँ धूँल उलिरक। 35नलाव पाँर तोबो ऩेब्लो यामाबुझिधुकिन याझ़िमक यारेरालाई है ओरादोरक। मन्दलील मेंमार निताव झ्याउँ झ्याउँ लिन्या लाज हुव लिज़्या। 36सैं परमेस्वरए ओपाँ जे जेल्योनी सुरू ओताव? सैं परमेस्वरए ओपाँ जे वाज़ दैद जेनैज़्याव?
तुपैन्या पाँर
37जोए ‘ङा परमेस्वरए उपुरूसनिकाव बरदानर दैव ङालिज़्या, ओल उपुरूसनी ब ङापाँधुज़्या’ है उलिकिन नो मिँए आव ङासरो पाँ ब परमेस्वरए ल्योनी हुव ज़ ओल्यो लिन्या ओथ·रैवक। 38ओमाथ·रैकिन ओललाई ब परमेस्वरए थ·रैन्या माले।
39है जैद ङानैं ङामेंर, जे प़ाइँरानी ङ़ात परमेस्वरए उपुरूसनी पाँन्यात कलँ ल्यो ताके। फरी परमेस्वरए उपुरूसनी छुत छुत खामनी पाँन्या ब तावैंच्यो। 40खाली जेदोज़्याव भरी तहस मेलास दाव ताके।
Currently Selected:
१ कोरिन्थी 14: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
