MIPUM SIALNAK 28
28
Nisial Biakpiaknak
(Suah 29:38-46)
1 Topa in Moses lakah, 2Israel miten a hunkimin thupia in, an luih a hun a kimin, namtui an luih biakpiaknak a piak haw ten hilh tuk phawkngil pahsun tin ti hi.
3 Topa i lakah an luih biakpiaknak na piak tuk uhmi cu hite hi, hi: nisialin halkang biakpiaknak tukin sonbang ngawl kum khat kim tuucangno pa nih, 4tuucangno pa khat cu zing lamah, adang pa khat cu taklamah pia un hi. 5Mah biakpiaknak tuah mun khatin, an tuah biakpiaknak vang bawl unna, olif situi phabel khuat khat tuah cawhhelmi cangho vam vawh khat hi tuk hi. 6Topa i lakah namtui biakpiaknak bawlmi hi a, Sinai Mualhum a, masabel biakpiaknak na bawl uh bangin hih biakpiaknak cu nisialin halkang biakpiaknak hi. 7Amasa tuucangno piakmi tuah intuk piaknak vang bawl unna, sabit khuat khat biaklandawhah leih un hi. 8Zinglam biakpiaknak na bawl uhmi bang bokin, a pa nihnak tuucangno cu taklamin bawl unna, intuk biakpiaknak vang bawl un hi. Hih hi cu an luih biakpiaknak hi a, Topa i ca in namtui hi.
Sabbath Biakpiaknak
9Sabbath ni-in kum khat kim sonbang ngawl tuucangno pa nih, an tuah biakpiaknak tukin olif situi tuah cawhhelmi cangho vam vawh khat le intuk biakpiaknak tuah pia un hi.#Mt 12:5; 10Hi halkang biakpiaknak cu nisialin bawlmi an tuah biakpiaknak le intuk biakpiaknak sial ngawl Sabbath nisial bawlmi biakpiaknak hi tuk hi.
Hasial Ni Masabel Biakpiaknak
11Ha sial, ni masabelin, Topa i lakah a nuailam bangin pia un hi. Khuicangno pa nih, tuucang pa khat, kum khat kim tuucangno salih, a venghawngin sonbang ngawl hi tuk hi. 12Olif situi tuah cawhhelmi an tuah biakpiaknak, khuicang pa khatah cangho vam vawh khat le a lang, tuucang pa khatah cangho vam vawh khat tuah 13kum khat kim tuucangno pa khatah cangho vam vawh lang tuah pia un hi. Hi halkang biakpiaknak bawlmi hi an luih biakpiaknak hi a, Topa ca in namtui hi. 14Bawl lelengmi sabittui biakpiaknak piakmi ahi tale khuicang pa khatah sabit khuat nih, tuucang pa khatah khuat khat le lang, kum khat kim tuucangno pa khatah khuat khat pia un hi. Kum khat sung ha sial, ni masabelin halkang biakpiaknak na bawl uhten zui tuk daan hi. 15Nisialin, halkang biakpiaknakah sabittui telh hi tuk a, sualhah biakpiaknak tukin keelcang pa khat piak hi tuk hi.
Naman Hel Ngawl Puai Biakpiaknak
(Thiam 23:5-14)
16 Topa upat pahcoihnak tuk bawlmi, ha masabel ni sawm le ni li ni-in, Kaltan Puai cu bawl hi tuk hi.#Suah 12:1-13; Daan 16:1-2; 17Ni sawm le ni nga ni pen biaknak puai pat hi tuk a, ni salih sung hi tuk hi. Mah sung hempoh cu naman hel ngawl cangho ei un hi.#Suah 12:14-20; 23:15; 34:18; Daan 16:3-8; 18Puai ni a, ni masabel ni-in, imah dek pahsuh un. Pathian biaknakah khawm saw un hi. 19Halkang biakpiaknak bawl unna, mahmi cu Topa i lakah piakmi an luih biakpiaknak hi tuk hi. Khuicangno pa nih, tuucang pa khat, kum khat kim tuucangno salih, a venghawngin sonbang ngawl hi tuk hi. 20An tuah biakpiaknak kom zetin bawl unna, olif situi tuah cokhel un, khuicang pa khatah cangho vam vawh khat le lang, tuucang pa khatah vawh khat, 21tuucangno pa khatah vawh lang ten hi tuk hi. 22Mah hum pen sualhah biakpiaknak tukin keelcang pa khat pia unna, mipi tei thianthohnak tukin thianthoh biakpiaknak cu bawl hi tuk hi. 23Hihi cu nisial bawlmi halkang biakpiaknak i humah pia un hi. 24Mahti bang lelengin, ni salih sung Topa i lakah an luih biakpiaknak tukin namtui cu pia un hi. Hite hi cu nisial na piak uhmi halkang biakpiaknak le intuk biakpiaknak i humah pia un hi. 25Ni salih ni-in, a thiangthomi biakpiaknak nei unna, imah dek pahsun hi.
Ancop Puai Biakpiaknak
(Thiam 23:15-22)
26Na ancop Puai uh ni masabel ni-in, Topa i lakah cangthak na piak uhten Pathian bia tukin khawmdun unna, imah dek pahsun un.#Suah 23:16; 34:22; Daan 16:9-12; 27Topa i ca in namtui le halkang biakpiaknak bawl unna, khuicang pa nih, tuucang pa khat le kum khat kim tuucangno salih, a venghawngin sonbang ngawlmi tuah pia un hi. 28Olif situi tuah cawhhelmi anthak tuah komno in bawlmi an tuah biakpiaknak bawl unna, khuicang pa khatah cangho vam vawh khat le lang, tuucang pa khatah vawh khat le, 29kum khat kim tuucangno pa khatah vawh lang hi tuk hi. 30Mah bang lengin sualhah biakpiaknak tukin keelcang pa khat pia unna, mahten mipi thianthohnak tukin thianthoh biakpiaknak bawl un hi. 31Hi biakpiaknak le intuk biakpiaknak cu nisialin, na bawl uhmi halkang biakpiaknak le an tuah biakpiaknak humah pia un hi.
Currently Selected:
MIPUM SIALNAK 28: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
