MIPUM SIALNAK 27
27
Zelofehad Canute
1Josef i capa Manasseh, Manasseh i capa Makhir, Makhir capa Gilead, Gilead i capa Hefer, Hefer i capa Zelofehad hi. Zelofehad in canu bek nei in, amuh cu Mahlah, Noah, Hoglah, Milkah, le Tirzah hi. 2Mah a canute cu Moses, thiampi Eleazar, puitute le mipi tei maiah Puanbuk kongka ah hawh haw in, 3“Ka pa uhin, ngamkhing pen thihsanin, capa pa khat hei nei ma hi. Topa a langpangtu Korah i nungzuitu lak pen amah cu tel ma hi. A ma sualnak hangin thi hi. 4Capa a neih ngawl hangin maw ka pa uh i min cu a innkua tei lak pen a paih thong thei tuk cu? Ka pa uh i unau lak pen kohte vang covo pia bok un hi” tin ngen haw hi.
5Moses in Topa lakah mah thu cu hilh hi. 6Topa in, a lakah, 7“Zehofehad canu tei ngetmi cu man hi. A pa haw i unau tei lak pen amuh vang covo pia bokin hi. A pa haw i lo le lam cu amuh ten co haw hen.#Mipum 36:2; 8Israel mite cu hilh inna, mi pa kha khat capa nei ngawlin a thi ahi tale, a lo le lam cu a canu in co tuk hi. 9Canu a nei ma ahi tale, a unau in co tuk hi. 10Unau a nei haw ma tale, a pa i unau ten co haw hen. 11A pa vang unau a nei ma tale, a unaupih lak pen a naibelin co tuk a, amata in suak tuk hi. Topa keima thupiakmi hi a, Israel tei zui tuk daan hi,” ti hi.
Moses Ai-awh In Joshua Teng
(Daan 31:1-8)
12 Topa in Moses lakah, “Abarim Mualah hawh inna, Israel tei lak a, ka piak tukmi ngam cu zo tulin hi.#Daan 3:23-27; 32:48-52; 13Na zoh ceng ten na u Aaron a nunnak a bo bangkekin nang vang bo bok tuk hi. 14Itahim titale Zin ngam lakah ka thupiakmi na pa nih uhin, na el uh hang hi. Meribah ah Israel mi honpi in, a langpang haw ten keima thianthohnak huham cu dinpih nuam ma uh ci,” ti hi. Meribah cu Zin ngamkhing sung a, ummi Kadesh ciktui hi.
15Moses in, 16“Topa aw, nunnak hempoh i bulpatnak Pathian,#1Kum 22:17; Ezk 34:5; Mt 9:36; Mk 6:34; 17na mihingte hi tuucingtu nei ngawl tuuhon bang a hih ngawlnak haw tukin, mipui thiamtu le ngaldo ten mi hoha zo tukin mi pa khat teng zazalin,” tin ngen hi.
18 Topa in Moses lakah, “Thil tihtheihnak neitu Nun i capa Joshua cu sam inna, a lu humah na khutsuanin hi.#Suah 24:13; 19Thiampi Eleazar le mi honpi maiah dingtik inna, a venghawng haw i maiah nangma ai-awhtu hi, tihnak thuthanin hi. 20Israel mi honpi ten a thu a zui hawnak tukin na thuneihnak a lang cu amah pia in hi. 21Joshua in thiampi Eleazar cu muansanzet tuk a, Eleazar in keima deihnak thei tukin Urim le Thummim mang tuk hi. Joshua le Israel mi honpi cu Eleazar in hoha tuk a, ihempoh cu ama thu bangin um haw tuk hi” ti hi.#Suah 28:30; 1Sam 14:41; 28:6; 22Topa i thupiakmi bangkekin Moses in bawl khawng hi. Joshua cu thiampi Eleazar le mi honpi maiah dingtik hi. 23Joshua i lu humah a khutsuanin ama ai-awhtu tukin sialsiahnak bawl hi.#Daan 31:23;
Currently Selected:
MIPUM SIALNAK 27: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
