MIPUM SIALNAK 26
26
Mipumsial Vei Nihnak
1Natsia a bo nungten Topa in, Moses le Aaron capa Eleazar lakah,#Mipum 1:1-46; 2“Israel mipi, kum sawm nih humlam, ngalkap a dek thei tuk hempoh innkua pa khat nung pa khat mipum sialnak bawl un,” ti hi. 3-4Topa i thupiakmi cu Moses le Eleazar ten ngai in, kum sawm nih humlam pano hempoh cu munkhatah sam khawm haw hi. Jerikho el, Jordan Ngun ngal a, Moab munlawnah tawkdun khawm haw hi.
Izipt ngam pen a hawh tulmi Israel mite cu a nuailam bangin hi:
5Reuben hinnam pen Reuben cu Jakob i capa upabel hi: Hanok, Pallu, 6Hezron le Kar hin haw hi. 7Hih hinnam tei sung pen mihing thawng sawm li le thawng thum, za salih le sawm thum kim haw hi. 8Pallu i casuante cu Eliab le, 9a capa Nemuel, Dathan, le Abiram hi. Hih Dathan le Abiram cu mipi tei ten mite haw hi. Moses le Aaron tei thu elin, Topa a langpan haw ten Korah i nungzuitu tei lakah tel bok haw hi. 10A dinnak haw lei cu a kamkau in, thon khawngta hi, mahten mei tuah mihing za nih le sawm nga a halhup khawng ten Korah le a nungzui tei lakah thi haw hi. Mipi ca ngallinnakin suak hi. 11Mahnaven Korah i capate cu thi haw ma.
12Simeon hinnam sung pen Nemuel, Jamin, Jakhin, 13Zerah le Shaul hin haw hi. 14Hih hin tei sung a, mihing cu thawng sawm nih le za nih kim haw hi.
15Gad hinnam sung pen Zefon, Haggi, Shuni, 16Ozni, Eri, 17Arod le Areli hin hi. 18Hih hin tei sung pen mihing thawng sawm li le za nga kim haw hi.
19Judah hinnam sung pen Judah capa lak pen Erle le Onan cu Kanaan ngamah thi zo haw hi. 20Shelah, Perez, Zerah, 21Hezron le Hamul hin hi. 22Hih hin tei sung pen mihing thawng sawm salih, thawng luk le za nga kim hi.
23Issakhar hinnam sung pen Tola, Puah, 24Jashub le Shimron hin hi. 25Hih hin tei sung pen mihing thawng sawm luk, thawng li le za thum kim haw hi.
26Zebulun hinnam sung pen Serd, Elon le Jahleel hin hi. 27Hih hin tei sung pen mihing thawng sawm luk le za nga kim haw hi.
28Josef hinnam sung pen Manasseh le Efraim hinnam hi.
29Manasseh hinnam sung pen Manasseh i capa Makhir cu Gilead i pa hi, a nuailamte cu Gilead i cikhaih mite hi. 30Lezer, Helek, 31Asriel, Shekhem. 32Shemida le Hefer hin haw hi. 33Hefer i capa Zelofehad cu capa nei ma hi. Canu bek nei in, a min haw cu Mahlah, Noah, Hoglah, Milkah le Tirzah haw hi. 34Hih tei hin sung pen mihing thawng sawm nga, thawng nih le za salih kim haw hi.
35Efraim hinnam sung pen Shuthelah, Bekher le Tahan hinnamte hi. 36Eran hin cu Shuthelah i cikhaih mite hi. 37Hih hin sung pen mihing thawng sawm thum, thawng nih le za nga kim haw hi.
Hi cu Josef i cikhaih mite haw hi.
38Benjamin hinnam sung pen Bela, Ashbel, Ahiram. 39Shefufam, le Hufam hinnamte haw hi. 40Ard le Haman hin cu Bela i cikhaih hi. 41Hih hin sung pen mihing thawng sawm li, thawng nga le za luk kim haw hi.
42Daan hinnam sung pen; Hushim hinnamte haw hi. 43Mihing thawng sawm luk, thawng li le za li kim haw hi.
44Asher hinnam sung pen; Imnah Ishvi, le Beriah hin haw hi. 45Heber le Malkhiel hinnamte cu Beriah i cikhaihte haw hi. 46Asher in Serah tihmi canu pa khat nei hi. 47Hih hin sung pen mihing thawng sawm nga, thawng thum le za li kim haw hi.
48Naftali hinnam sung pen Jahzeel, Guni, 49Jezer, le Shillen hinnamte haw hi. 50Hih hin sung pen mihing thawng sawm li, thawng nga le za li kim haw hi.
51A venghawng haw in, Israel pano hempoh cu thawng za luk, thawng khat, za salih le sawm thum haw hi.
52 Topa in Moses lakah,#Mipum 34:13; Josh 14:1-2; 53“A tam le a dem zo in, ngam cu hih hinnam na semin hi. 54-56Ngam cu aisanin, khen inna, ngam khen a ngeng deuh cu mitam deuh hin tei lakah pia inna, ngam khen a neu deuh cu mi dawm deuh hin pia in,” ti hi.
57Levi hinnam sung pen Gershon, Kohath, le Merari hin haw hi. 58Adang Levi hinnamte cu Libni, Hebron, Mahli, Mashi le Korah i cikhaih mite haw hi. Kohath cu Amram i pa hi, 59Amram in Izipt ngam pen a hin mi Levi i canu Jokhebed huai hi. Jokhebed in Amram cu capa pa nih, Aaron, Moses le canu pa khat Miriam hing hi. 60Aaron in capa pa li nei in, Nadab, Abihu, Eleazar le Ithamar hi.#Mipum 3:2; 61Nadab le Abihu cu Topa i lakah a thiangtho ngawlmi biakpiaknak a bawl haw hangin thi zo haw toh hi.#Thiam 10:1-2; Mipum 3:4; 62Levi mite cu pano ha khat hum siah a venghawngin thawng sawm nih le thawng thum haw hi. Levi mite cu Israel ngam sungah ngam covo piakmi a hih haw ngawl hangin Israel hinnam dang tuah cokhel ngawlin a dangno in cazin lak mite hi haw hi.
63Hih hin hempoh cu Moses le Eleazar in Jerikho el, Jordan Ngun ngal, Moab munlawn a, Israel mite mipum a sial laihin, cazin alak haw mi hi. 64Moses le thiampi Aaron ten Sinai phillawnah cazin alak haw laihin, mihingte cu pa khat hei tangleh haw ma toh. 65Topa in, a venghawng haw in ngamkhingah thi khawng haw tuk hi, a tih bangin, Jefunneh i capa Kaleb le Nun i capa Joshua sial ngawl cu thi khawng ngangai haw hi.#Mipum 14:26-35;
Currently Selected:
MIPUM SIALNAK 26: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
