MIPUM SIALNAK 24
24
1 Topa in Israel mite muicu pia tukin deih hi tih cu Balaam in, a theih zo hangin masa lam bangin kungkhai tukin hawh lehma toh hi. Phillawn lam hekkikin, 2Israel mite a hin haw tekin, ngiak haw tih mu hi. Pathian i hawvang cu a lakah hengin, 3hi bangin awn hi.
“Beor capa Balaam i thuphuan mi,
ciang zetin
amu theitu pa i awn kam,
4Pathian hilhmi a theitu pa i
thucahmi cu ka mit
hakin mu ing.
Cungnungbel
Pathian i langnak cu,
5Israel tei puanbuk cu
mawi zetin,
6A thuang a cinmi ung kung bangin,
ngun mawk a, huan bang hi,
Topa i cinmi namtui kung bang,
tuimawk a, sidar thing
bang haw hi,
7Van nguah catngawlin
ngah haw tuk hi.
Tui a kawtmi lo sungah
anci cing haw tuk hi.
A kumpi haw cu Agag sangin,
a ukmi ngam cu
zal saw ngangai hi.
8Pathian in Izipt ngam pen
tulpih hi, amuh cu
khuicang hang bangin pan hi;
A ngal cu thon khawng
haw hi.
A nguh ngawivamin,
a thalcang haw
ektuah khawng haw hi.#Pian 12:3; 49:9;
9Israel mi cu a ngil zetmi
kiosa bang hi,
A hihbu laihin, kuamah in
phong ngam haw ma.
Israel muicu a piatu cu
muicu piak hi bok tuk hi.
Israel a tamsia tu cu tamsiat
hi bok tuk hi,” ti hi.
10Balak a thinuk hangin a khuttumin, Balaam lakah, “Ka ngal tamsia tukin sam ing, mahnaven vei thum pikpek muicu pia ci. 11Atu manlangin innah kikin hi. Laksawng pia tukin tiam naveng Topa in, na laksawng ngah tuk cu kham,” ti hi.
12Balaam in, “Ka nelah palai na hahmi lakah ka hilh zo toh bangin, 13na kumpi i inn sungah ummi sui le ngun a venghawngin, na pia hei in, Topa i thupiakmi elin, a pha ahi vang, a sia vangin, keima thu bek tuah nung thei tuk mang hi,” ti hi.
Nungdawlbel Balaam Otmi
14Balaam in Balak lakah, “Atu-in ka mihing tei lakah kik tuk toh ing. Mahnaven ka hawh laih ngawlin, mailamah Israel miten na mihing tei humah a bawl haw tukmi ngallinnak tukin hilh ham nuam ing” ti hi. 15hilh panin, profet awnin hi bangin awn hi.
“Beor capa Balaam i thuphuan mi,
ciang zetin
amu thei pa i awnkam,
16Pathian i hilhmi a zatu le,
A sangbel a ummi lakah
cihnak a cotu in, ka mit
hakin mu ing,
Cungnungbel Pathian i langnak cu,
17Mailam hun can ka zoh ten,
Israel mite mu ing.
Mah minam sung pen
Aksi bangin a vakmi,
kumpi suak tuk hi.
Ni konghong aksi bangin,
Israel hinnam sung pen
suak tuk hi.
Moab hotu cu vat tuk a,
Seth mite cu vat vawk tuk hi.
18Edom ngam a, ngalte cu
nehin, a ngam haw cu
amata in cang tuk hi.
19Israel cu nehtu hi leleng tuk hi.
A suakca mitei lak pen
a nungdawlbel tianin
that tuk hi,” ti hi.
20Balaam in muhnak a neihmi ah,
Amalek mite mu in
hi ti bangin awn hi.
“Amalek cu hinnam lak pen
a ngilbel hi.
Mahnaven a nungdawlbel ten
kumkhua in pailalta tuk hi,” ti hi.
21Muhnak a neihmi ah, Ken mi mu in, Balaam in hi bangin awn leleu hi.
“Na umnak cu himdamzet hi,
Liang sangzet suangpi hum a,
vano bu bang hi.
22Mahnaven noh Ken mite cu
bolal tuk uh ci.
Na ngal uh Assiria ten
a mat haw ten,” ti hi.
23Balaam in hi bangin awn hi;
“Saklam a, tawkdun khawm hi
akua kaw?
24Saipras pen mi a dotu
timbaw tuah hung haw tuk hi.
Assiria le Eber neh haw tuk hi;
Mahnaven amuh vang
kumkhua in
pailal haw tuk hi,” ti hi.
25Balaam cu tho in, a khua ah pinin; Balak vang pin bok hi.
Currently Selected:
MIPUM SIALNAK 24: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
