YouVersion Logo
Search Icon

ໂຢ​ຮັນ 16

16
1“ນ້າຍ ເຕີ໋ຍ ຫວ່າ ເຢຍ ບົ໋ວ ເມີ່ຍ ບົວ ເຫວີ່ຍ ປຸນ ເມີ່ຍ ບົວ ໄມ້ ຖຸຍ ໂປ່ວ. 2ນິ່ນ ບົວ ອ໋ອຍ ຕສຸ່ນ ເມີ່ຍ ບົວ ທສວດ ຫວຸ່ຍ ຕ້ອງ. ຕສຢັ້ງ ໂຫ່ ອ໋ອຍ ເຖົາ, ຫາຍ ເຕົ້າ ໄຕ໋ ເມີ່ຍ ບົວ ຕສ່ຽວ ຫລ່າຍ ໂຕສ໋ວ ເຫວີ່ຍ ຟູ-ສູ ທິນ-ຮູ່ງ. 3ນິ່ນ ບົວ ອ໋ອຍ ຮນັ້ງ ນ້າຍ ໂຕສ໋ວ ເຫວີ່ຍ ຕສຸ ນິ່ນ ບົວ ໄມ້ ຮິ້ວ ຕຸ໊ ຕສັ່ງ ເຕ໋ຍ, ຢ່າ ໄມ້ ຮິ້ວ ຕຸ໊ ເຢຍ. 4ນ້າຍ ເຕີ໋ຍ ສີ່ ເຢຍ ບົ໋ວ ຕສຢັ໋ງ ເມີ່ຍ ບົວ. ຫາຍ ຕສັ່ນ ປວັ້ງ ນ້າຍ ເຕີ໋ຍ ສີ່ ເມີ່ຍ ບົວ ຕສ່ຽວ ໄຮ່ ຈັ໋ງ ຕຸ໊ ເຢຍ ບົ໋ວ ເຈ໋ຍ ເມີ່ຍ ບົວ ໝີ່ ອ໊ະ.
ສີງ ລີ່ງ ໂຕສ໋ວ ເຍີຍ ກົງ
“ນ້າຍ ເຕີ໋ຍ ສີ່ ຕສິ້ນ ດ່າງ ເຢຍ ໄມ້ ບົ໋ວ ເມີ່ຍ ບົວ, ເຫວີ່ຍ ຕສຸ ເຢຍ ຖສໍ່ ເຖສົາ ເມີ່ຍ ບົວ ຢຽມ. 5ມປ່າ ອີ້ ຕສັ່ນ ເຢຍ ອ໋ອຍ ຕສຸ ດສ໋ວນ ເຖົາ ພ້າຍ ເຢຍ ຕ້າຍ ວົ້ວ ເຕົ້າ. ເມີ່ຍ ບົວ ຢ່າ ໄມ້ ມ່າຍ ຫາຍ ເຕົ້າ ໜ່າຍ ເຢຍ, ‘ເມີ່ຍ ມີ່ງ ຫາຍ?’ 6ເຫວີ່ຍ ຕສຸ ເຢຍ ກ໊ອງ ນ້າຍ ເຕີ໋ຍ ສີ່ ບົ໋ວ ເມີ່ຍ ບົວ, ເມີ່ຍ ບົວ ເຍີຍ ໂຮຍ້ວ ຕສະເກ້ງ ເດສົ້າ ໄຫ່ ອ໊ະ. 7ມປ່າ ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ເຢຍ ດສ໋ວນ ມີ່ງ ເຊ ເຫວີ່ຍ ປຸນ ເມີ່ຍ ບົວ ເກົ້າ ຕຸ໊ ຫລົງ. ເຊ ກ໊ອງ ເຢຍ ໄມ້ ດສ໋ວນ, ເຖງ ມ່ຽນ ວົ້ວ ເຕົ້າ ໄມ້ ຕ້າຍ ລໍ໌ ເມີ່ຍ ບົວ. ເຢຍ ດສ໋ວນ ມີ່ງ, ເຢຍ ຕສ່ຽວ ພ້າຍ ນິ່ນ ຕ້າຍ ລໍ໌ ເມີ່ຍ ບົວ.
8“ເຖງ ມ່ຽນ ວົ້ວ ເຕົ້າ ຕ້າຍ ວົ້ວ ຕສັ່ນ, ນິ່ນ ອ໋ອຍ ປິ໋ວ ເມ່ງ ປຸນ ປ້າມ ມ່ຽນ ຮິ້ວ ຕຸ໊ ນິ່ນ ບົວ ຕ່ອງ ເຖົາ ຕສຸ໌ຍ ເຍີຍ ເຈົ໊າ, ເຖົາ ໂຕສ໋ວ ຫອບ ເຍີຍ ເຈົ໊າ, ແອ໋ງ ເຖົາ ຊ້ຽມ ຕສຸ໌ຍ ເຍີຍ ເຈົ໊າ. 9ເຖົາ ຕສຸ໌ຍ ເຍີຍ ເຈົ໊າ, ຫລາຍ ນິ່ນ ບົວ ໄມ້ ສຽນ ເຂົາ ເຢຍ. 10ເຖົາ ໂຕສ໋ວ ຫອບ ເຍີຍ ເຈົ໊າ, ເຫວີ່ຍ ຕສຸ ເຢຍ ມີ່ງ ເຢຍ ເຍີຍ ເຕຍ ວົ້ວ, ເມີ່ຍ ບົວ ອກະຮ້າ ໄມ້ ປວັດ ເຢຍ ໝີ່ ອ໊ະ. 11ເຖົາ ຊ້ຽມ ຕສຸ໌ຍ ເຍີຍ ເຈົ໊າ, ເຫວີ່ຍ ຕສຸ ກຸ໊ນ ປ້າມ ເກນ ວົ້ວ ເຕົ້າ ຕສູ໊ງ ຕສຸ ຕີ່ງ ຕສຸ໌ຍ ອ໊ະ.
12“ເຢຍ ຖສໍ່ ມ່າຍ ສີ່ ທສ້ຳ ເຍີຍ ບົ໋ວ ເມີ່ຍ ບົວ ມປ່າ ເດສົ້າ ເຫີຍ ເມີ່ຍ ບົວ ອີ້ ຕສັ່ນ ເຕ໊ຍ ໄມ້ ຕຸ໊. 13ປຸນ ມ່ຽນ ຮິ້ວ ຕຸ໊ ຕສຽນ ເລີ໌ຍ ວົ້ວ ເຕົ້າ ສີງ ລີ່ງ ຕ້າຍ ວົ້ວ ຕສັ່ນ, ນິ່ນ ອ໋ອຍ ປຸນ ເມີ່ຍ ບົວ ຮິ້ວ ຕຸ໊ ເດສ່ງ ຕສຽນ ເລີ໌ຍ. ນິ່ນ ກ໊ອງ ເຍີຍ ຫວ່າ ໄມ້ ເຕສີ໌ຍ ນິ່ນ ກັ້ນ ຮນ້ຳ ທສວດ ຕ້າຍ ກ໊ອງ. ນິ່ນ ຂູງ ອ໋ອຍ ກ໊ອງ ຕົ້ງ ນິ່ນ ຕຸ໊ ໄຮ໌ ເຈ໋ຍ ເຍີຍ ຫວ່າ ຮນັ້ງ, ຢ່າ ກ໊ອງ ອກະຮ້າ ຮີ້ງ ອ໋ອຍ ທສວດ ຕ້າຍ ເຍີຍ ສີ່ ບົ໋ວ ເມີ່ຍ ບົວ. 14ນິ່ນ ອ໋ອຍ ປຸນ ມ່ຽນ ທ່າຍ ເຢຍ ຕສ່ຽວ ຕໍ້ ເຢຍ ເຍີຍ ຫວ່າ ຕ້າຍ ກ໊ອງ ບົ໋ວ ເມີ່ຍ ບົວ. 15ຕສັ່ງ ເຕ໋ຍ ມ່າຍ ເຍີຍ ຢຽດ ຕສູ໊ງ ເຊ ເຢຍ ເຍີຍ. ເຫວີ່ຍ ນ້າຍ ເຢຍ ຖສີງ ຕ້າຍ ກ໊ອງ ສີງ ລີ່ງ ອ໋ອຍ ເຕສ໊າະ ເຢຍ ບົ໋ວ ນິ່ນ ເຍີຍ ຢຽດ ຕສູ໊ງ ບົ໋ວ ເມີ່ຍ ບົວ.
ໂຢວ-ເດສົ້າ ທິ້ວ ເປ໋ນ ອຈຽນ-ໂຢ້ວ
16“ໄມ້ ໜັ່ງ ເລົ່າ ເມີ່ຍ ບົວ ໄມ້ ຕຸ໊ ປວັດ ເຢຍ. ອກະຮ້າ ໄມ້ ໜັ່ງ ເລົ່າ ເມີ່ຍ ບົວ ແອ໋ງ ຕຸ໊ ປວັດ ເຢຍ.”
17ມ່າຍ ເຕີ໋ຍ ນິ່ນ ເຍີຍ ໄຊ-ກໍ໋, ລ່ານ ໜ່າຍ ລ່ານ, “ນ້າຍ ເອີ໋ຍ ເລີ໌ຍ ຮນັ້ງ ຫາຍ ນໍ? ໄຊ-ເຕ໋ຍ ກ໊ອງ, ‘ໄມ້ ໜັ່ງ ເລົ່າ ເມີ່ຍ ບົວ ໄມ້ ຕຸ໊ ປວັດ ເຢຍ. ອກະຮ້າ ໄມ້ ໜັ່ງ ເລົ່າ ເມີ່ຍ ບົວ ແອ໋ງ ຕຸ໊ ປວັດ ເຢຍ.’ ນິ່ນ ຢ່າ ກ໊ອງ ‘ນ້າຍ ເຊ ເຫວີ່ຍ ຕສຸ ເຢຍ ດສ໋ວນ ຕສັ່ງ ເຕ໋ຍ ວົ້ວ.’” 18ນິ່ນ ບົວ ຢ່າ ໜ່າຍ, “ນິ່ນ ກ໊ອງ ‘ອກະຮ້າ ໄມ້ ໜັ່ງ ເລົ່າ’ ວົ້ວ ໂຈ໋ວ ຫວ່າ, ເອີ໋ຍ ເລີ໌ຍ ຮນັ້ງ ຫາຍ ນໍ? ເຢຍ ບົວ ໄມ້ ຮິ້ວ ຕຸ໊ ນິ່ນ ກ໊ອງ ຫາຍ ຫຍູ່ງ.”
19ເຢ​ຊູ ຮິ້ວ ຕຸ໊ ນິ່ນ ບົວ ອ໋ອຍ ໜ່າຍ ນິ່ນ, ນິ່ນ ຕສ່ຽວ ກ໊ອງ ບົ໋ວ ນິ່ນ ບົວ, “ເຢຍ ກ໊ອງ, ‘ໄມ້ ໜັ່ງ ເລົ່າ ເມີ່ຍ ບົວ ໄມ້ ຕຸ໊ ປວັດ ເຢຍ. ອກະຮ້າ ໄມ້ ໜັ່ງ ເລົ່າ ເມີ່ຍ ບົວ ແອ໋ງ ຕຸ໊ ປວັດ ເຢຍ.’ ຕົ້ງ ນ້າຍ ໂຈ໋ວ ຫວ່າ ເຍີຍ ເອີ໋ຍ ເລີ໌ຍ ເມີ່ຍ ບົວ ລ່ານ ໜ່າຍ ລ່ານ ໄມ້ ເຕສີ໌ຍ? 20ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ເມີ່ຍ ບົວ ອ໋ອຍ ຕສຸ ງຸ໌ຍໆ ເຍີຍ ຍ້ຽມ, ມປ່າ ປ້າມ ມ່ຽນ ອຈຽນ-ໂຢ້ວ, ອະເຮນີ້ຍ ເຍີຍ. ເມີ່ຍ ບົວ ອ໋ອຍ ເດສົ້າ, ມປ່າ ເມີ່ຍ ບົວ ເຍີຍ ໂຢວ-ເດສົ້າ ອ໋ອຍ ທິ້ວ ເປ໋ນ ອຈຽນ-ໂຢ້ວ. 21ມເຊັຍ ຕອນ ອ໋ອຍ ດຸ໊ດ ຊິນ ເຍີຍ ຕສຢັ້ງ ໂຫ່ ເຖົາ, ນິ່ນ ເດສົ້າ ໄຫ່ ຫລາຍ ອ໋ອຍ ຕສຸ ເຕ໊ຍ ມຸນ. ມປ່າ ຢູ໌ງ ລິ໌ວ ກູ້ ງວ໌າ, ນິ່ນ ໄມ້ ຈັ໋ງ ຕສຸ ນິ່ນ ເຕ໊ຍ ມຸນ, ເຫວີ່ຍ ຕສຸ ນິ່ນ ຕຸ໊ ເຕົ້າ ກູ້ ງວ໌າ ຢຽມ ລູ່ງ ເດ໊ຍ ຕສ່ຽວ ອະເຮນີ້ຍ ໄຫ່.
22“ເມີ່ຍ ບົວ ຢ່າ ຮນັ້ງ ນ້າຍ ນໍ. ອີ້ ຕສັ່ນ ເມີ່ຍ ບົວ ໂຮຍ້ວ ເດສົ້າ, ມປ່າ ເຢຍ ແອ໋ງ ອ໋ອຍ ຕ້າຍ ລໍ໌ ເມີ່ຍ ບົວ, ເມີ່ຍ ບົວ ຕສ່ຽວ ອຈຽນ-ໂຢ້ວ ອອນ-ເຫລາະ. ນ້າຍ ຫຍູ່ງ ອອນ-ເຫລາະ ໄມ້ ມ່າຍ ຫາຍ ເຕົ້າ ໄຮ່ ເຕສ໊າະ ຕຸ໊ ທສວດ. 23ເຖົາ ວົ້ວ ຮນອຍ ເມີ່ຍ ບົວ ໄມ້ ໜ່າຍ ຫາຍ ຫຍູ່ງ ເຢຍ. ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ເມີ່ຍ ບົວ ເຕ໊ງ ເຢຍ ເຍີຍ ບົ໋ວ ເຖງ ຕສັ່ງ ເຕ໋ຍ ໂທ້ ຫາຍ ຫຍູ່ງ, ນິ່ນ ຕສ່ຽວ ປຸນ ວົ້ວ ຫຍູ່ງ ເມີ່ຍ ບົວ. #16:23 ມ່າຍ ເຕີ໋ຍ ໂລ໌-ຮນອຍ ໂຊວ ກ໊ອງ “ເມີ່ຍ ບົວ ເຖງ ຕສັ່ງ ເຕ໋ຍ ໂທ້ ຫາຍ ຫຍູ່ງ, ນິ່ນ ຕສ່ຽວ ເຕ໊ງ ເຢຍ ເຍີຍ ບົ໋ວ ປຸນ ວົ້ວ ຫຍູ່ງ ເມີ່ຍ ບົວ”. 24ເຖົາ ອີ້ ຕສັ່ນ ເມີ່ຍ ບົວ ໄມ້ ແກ້ງ ເຕ໊ງ ເຢຍ ເຍີຍ ບົ໋ວ ໂທ້ ເຈ໋ຍ ຫາຍ ຫຍູ່ງ. ກຸ໊ນ ໂທ້ ມ່າະ! ເມີ່ຍ ບົວ ຕສູ໊ງ ອ໋ອຍ ຕຸ໊, ຕສ່ຽວ ອຈຽນ-ໂຢ້ວ ເຖົາ ຕ້າວ.
ເຢ​ຊູ ຮີ່ງ ປ້າມ ເກນ ໝີ່ ອ໊ະ
25“ນ້າຍ ເຕີ໋ຍ ຢຽດ ຕສູ໊ງ ສີ່ ເຢຍ ຫລົ່ງ ຫວ່າ-ເປີ໊ຍ ບົ໋ວ ເມີ່ຍ ບົວ. ຕສຢັ້ງ ໂຫ່ ອ໋ອຍ ເຖົາ, ເຢຍ ໄມ້ ຫລົ່ງ ຫວ່າ-ເປີ໊ຍ ອ໊ະ. ເຢຍ ເຍີຍ ເຕຍ ເຍີຍ ເຈົ໊າ ເຢຍ ອ໋ອຍ ກ໊ອງ ເມ່ງ ບົ໋ວ ເມີ່ຍ ບົວ. 26ເຖົາ ວົ້ວ ຮນອຍ ເມີ່ຍ ບົວ ອ໋ອຍ ເຕ໊ງ ເຢຍ ເຍີຍ ບົ໋ວ ເຖງ ຕສັ່ງ ເຕ໋ຍ ໂທ້ ຫາຍ ຫຍູ່ງ. ເຢຍ ໄມ້ ເຕສີ໌ຍ ກ໊ອງ ເຢຍ ເຖງ ເມີ່ຍ ບົວ ໂທ້. ເຢຍ ໄມ້ ຕສຸ ເຖງ ໂທ້, 27ເຫວີ່ຍ ຕສຸ ຕສັ່ງ ເຕ໋ຍ ກັ້ນ ຮນ້ຳ ເມີ່ຍ ບົວ. ນິ່ນ ຮນ້ຳ ເມີ່ຍ ບົວ ເຫວີ່ຍ ຕສຸ ເມີ່ຍ ບົວ ຮນ້ຳ ເຢຍ ຢ່າ ສຽນ ເຢຍ ຢຽມ ຕສັ່ງ ເຕ໋ຍ ຕ້າຍ. 28ເຢຍ ຢຽມ ຕສັ່ງ ເຕ໋ຍ ຕ້າຍ ເປັຍ ປ້າມ ເກນ. ອີ້ ຕສັ່ນ ເຢຍ ອ໋ອຍ ເລີ່ຍ ປ້າມ ເກນ ດສ໋ວນ ຕສັ່ງ ເຕ໋ຍ ວົ້ວ.”
29ນິ່ນ ເຍີຍ ໄຊ-ກໍ໋ ບົວ ແອ໋ງ ກ໊ອງ ບົ໋ວ ນິ່ນ. “ອີ້ ຕສັ່ນ ໄຊ-ເຕ໋ຍ ກ໊ອງ ເມ່ງ ເຍີຍ ບົ໋ວ ເຢຍ ບົວ ຢ່າ ໄມ້ ຫລົ່ງ ຫວ່າ-ເປີ໊ຍ. 30ອີ້ ຕສັ່ນ ເຢຍ ບົວ ຮິ້ວ ຕຸ໊ ເມີ່ຍ ຮິ້ວ ເດສ່ງ ໝ່ານ ສີ່, ຕສູ໊ງ ໄມ້ ຖຈຽມ ຕສຸ ຫາຍ ເຕົ້າ ໜ່າຍ ຫາຍ ຫຍູ່ງ ເມີ່ຍ. ເຫວີ່ຍ ນ້າຍ ເຢຍ ບົວ ສຽນ ເມີ່ຍ ຢຽມ ທິນ-ຮູ່ງ ຕ້າຍ.”
31ເຢ​ຊູ ເຕົາ ນິ່ນ ບົວ, “ເມີ່ຍ ບົວ ອີ້ ຕສັ່ນ ສຽນ ອ໊ະ? 32ຕສຢັ້ງ ໂຫ່ ອ໋ອຍ ເຖົາ, ຕສູ໊ງ ເຖົາ ຕ້າຍ ອ໊ະ. ເມີ່ຍ ບົວ ຢຽດ ຕສູ໊ງ ອ໋ອຍ ເປຢົ໋າ ດສ໋ານ ເດສ່ງ. ເກ໊າະ-ມ່ຽນ ອ໋ອຍ ເປຢົ໋າ ດສ໋ວນ ເກ໊າະ-ມ່ຽນ ເຍີຍ ເປຢົ໊າ, ຂູງ ກວັ່ງ ເຢຍ ກັ້ນ ດຸ ລ່ານ ມ່ຽນ ຢຽມ ຮນັ້ງ. ມປ່າ ໄມ້ ເຕສີ໌ຍ ຕສະເກ້ງ ຂູງ ເຢຍ ກັ້ນ ເຫວີ່ຍ ຕສຸ ມ່າຍ ຕສັ່ງ ເຕ໋ຍ ເຖສົາ ເຢຍ ຢຽມ. 33ເຢຍ ຮນັ້ງ ນ້າຍ ບົ໋ວ ເມີ່ຍ ບົວ, ອ໋ອຍ ເມີ່ຍ ບົວ ເຖສົາ ເຢຍ ຈວັ່ງ ແໝ່ງ ຕສຢັ້ງ ຕສ່ຽວ ຕຸ໊ ແປ້ງ ອອນ. ຢຽມ ນ້າຍ ປ້າມ ເກນ ເມີ່ຍ ບົວ ມ່າຍ ໂຄ້ວ ໜ່ານ, ມປ່າ ກຸ໊ນ ປູ໋ງ ໂຮຍ້ວ. ເຢຍ ຮີ່ງ ເຈ໋ຍ ປ້າມ ເກນ ໝີ່ ອ໊ະ.”

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy