Hiob 30
30
Sien vondoagschet Älent, Veachtunk derch Menschen, Gott siene fientliche Jesennunk – Berajchtjunk to Kloagen
1Un nu lachen äwa mie de jinja aun Doag sent aus ekj, dän äare Vodasch ekj veacht, de Hunj von miene Häad bietotale. 2Toowaut sull mie uk de Krauft äare Henj nutzen? De Jugentkrauft es bie an veschwungen. 3Derch Mangel un Hunga aufjemoagat, see gnoage daut drieeje Launt auf, daut lenjst vewust un utjedrieecht es; 4see plekjen Soltkrut bie däm Struck, un de Wartlen de Jinsta es äare Speise. 5Ut de Menschen Medd woaren see vejoacht; maun schricht äwa an aus äwa eenen Deef. 6En grausome Kluften motten see wonen, en Ieedlajcha un Felsheele. 7Tweschen däm Struck schrieen see, unja Hachelstruck sent see hanjestrakjt. 8Kjinja von Veschmätne, jo, Kjinja von Nomeloose, sent see ut däm Launt rutjejoacht!
9Un nu sie ekj äa Spottleet jeworden, un an toom Jeräd jeworden. 10See äakjlen sikj äwa mie, gonen von mie wajch, un see veschoonen mien Aunjesecht nich met Kjwiel. 11Dan hee haft mien Strank jeleest un mie jeboagen; soo loten see ver mie däm Täajel schluten. 12Too miene Rajchten erhäft sikj daut Broodsel; see steeten miene Feet wajch un moaken jäajen mie äare vedoawens Wäaj reed. 13See rieten mienem Stich opp, wellen mienen Unjagank, see, dee selfst onen Help sent. 14See komen aus derch eene breede Rets, unja Onwada schmieten see sikj aun mie. 15Schrakjnise ha sikj jäajen mie jedreit; see vefoljen aus de Wint mien Odel, un mien Heil es vebie jetrocken aus eene Wolkj.
16Un nu jitt sikj en mie miene Seel ut; Älentsdoag ha mie jejräpen. 17De Nacht derchboat miene Knoakes un leest an von mie auf, un dee aun mie gnoagende Weedoag ruen nich. 18Derch äare groote Krauft veendat see mien Kjleet, daut ommschlit mie aus de Haulssoom von mienem Liefrock. 19Hee haft mie em Drakj jeschmäten, un ekj sie soo aus de Stoff un Ausch jeworden. 20Ekj schriee to die, un du auntwuadst mie nich; ekj sto doa, un du kjikjst mie stiew aun. 21Un du vewaundelst die ver mie to eenem Grausomen, met diene stoakje Haunt best du mie fientlich ennjestalt. 22Du häwst mie opp däm Wint nohecht, du latst mie doahan foaren un veranen em Stormjetees. 23Dan ekj weet daut, du west mie en däm Doot trigj fieren un en daut Vesaumlungshus aule Läwendje.
24Doch strakjt maun biem Faul nich de Haunt ut, ooda erhäft maun bie sienem Unjagank doaropp nich een Jeschrecht om Help? 25Hield ekj dan nich äwa däm, dee hoade Doag haud? Wia miene Seel nich om däm Oamen bekjemmat? 26Dan ekj luad opp Goodet, un daut kaum Beeset; un ekj luad opp Licht, un daut kaum Diestanis. 27Mien Ennalichet es derchenaunda un rut nich; Älentsdoag sent mie entjäajen jekomen. 28Truarich go ekj omhäa, onen Sonn; ekj sto enne Vesaumlunk opp un schriee. 29Ekj sie de Schakale een Brooda jeworden, un een Frint de Strausse. 30Miene Hut es schwoat jeworden un leest sikj von mie auf, un miene Knoakes sent vonne Hett vebrent. 31Un soo es miene Hoap too Truakloag jeworden, un miene Fleet to eenem Hielenden siene Stemm.
Currently Selected:
Hiob 30: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
