Hiob 28
28
Natieedelja Toogank to de Schaza de Ieed, oba kjeen Toogank to Weisheit aus bloos derch Gottesforcht
1Dan fa daut Selwa jeft daut een Funduat, un eene Städ fa daut Golt, daut maun reinicht. 2Iesa woat ut de Ieed jeholt, un Steen schmelt maun too Koppa. 3Hee [de Mensch] haft de Diestanis een Enj jemoakt, un derchforscht bat aune butaschte Jrens de Steena de Diestanis un de Doodesschauten. 4Hee brakjt eenen Schacht wiet von däm Wonenden; dee vom Vejätnen Foot rauf henjen, wietauf von de Menschen schwäwe see. 5De Ieed, - ut äa kjemt Broot väa, un äa Unjaschtet woat veweelt aus vom Fia. 6Äa Jesteen es de Uat von Safier, un Goltstoff es doabennen. 7Eenen Stich, däm de Raupvoagel nich kjant, un däm daut Hofkjeuag nich jeseenen haft; 8däm de wille Tieren nich bestieen, un äwa däm de Leiw nich jegonen es. 9Hee [de Mensch] lajcht siene Haunt aun daut hoade Jesteen, weelt de Boaj om - von de Wartel aun. 10Jenj schleit hee derch de Felse, un aulalei Kostboaret sitt sien Uag. 11Hee jrenst daut Wota en, daut see nich veranen, un Vestoaknet brinjt hee väa aun daut Licht.
12Oba de Weisheit, woa woat see jefungen? Un woa es de Städ vom Vestentnis? 13Kjeen Mensch kjant äarem Wieet, un em Launt de Läwendje woat see nich jefungen. 14Daut Deepe sajcht: See es nich en mie, un daut Mäa sajcht: See es nich bie mie. 15Jereinichtet Golt kaun nich fa ar jejäft, un Selwa nich aus äa Pries aufjewoage woaren. 16See woat nich aufjewoage met Golt von Ofir, met kostboarem Onniks un Safier. 17Golt un Glauss kaun maun met ar nich vejlikjen, noch enntuschen jäajen Jereetschoft von reinem Golt. 18Korale un Kristal acht maun jäajen an nich; un de Ieejentum von Weisheit es mea wieet aus Parlen. 19Topas von Kusch kaun maun nich met ar jlikjstalen; met fienem Golt woat see nich aufjewoage. 20De Weisheit wuahäa kjemt see, un woa es de Städ vom Vestentnis? 21Dan see es ver de Uagen aule Läwendje veborje, un ver de Himmelsväajel vestoaken. 22De Aufgrunt un de Doot sajen: Met onse Uaren ha wie een Jeräd von ar jehieet.
23Gott vesteit äarem Wajch, un hee kjant äare Städ. 24Dan hee sitt de Enj de Ieed; unja däm gaunzen Himmel sitt hee. 25Aus hee däm Wint een Jewicht bestemd, un daut Wota met däm Mot faust sad. 26Aus hee däm Räajen een Jesaz bestemd un eenen Wajch däm Donnastrol; 27doa sach hee an un deed an to weeten, hee sad an en un derchforscht uk an. 28Un toom Mensch säd hee: Kjikj, de Angst fa däm Harn es Weisheit, un vom Beesen ranen es Vestaunt.
Currently Selected:
Hiob 28: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
