Hiob 24
24
Gott siene onbejriepliche Jedult met de Gottloose
1 Wuarom sent nich Tieden [toom Jerecht] toopjespoat vom Aulmajchtjen, un wuarom seenen dee, dee am kjanen, siene Doag nich? 2See veschuwe de Jrensen, see roowen de Häad un weiden an. 3See joagen däm Äsel vonne Weise wajch, nämen daut Rind de Wätfrues aus Auntolinj; 4see steeten de Oame vom Wajch. De Älentje em Launt vestäakjen sikj aula toop: 5Kjikj, aus de Wiltäsel enne Wieste gonen see aun äa Woakj ut, tiedich no Raup too sieekjen; de Stap jeft an Broot fa de Kjinja. 6Oppem Flekj schnieden see sien Fooda auf un läsen däm Wienboajch von Gottloosen no. 7Noaktich äwanachten see, onen Kjleeda, un ha kjeene Dakj enne Kold. 8Vom Plauzräajen de Boaj woaren see naut, un obdachsloos omklaumre see de Felse. 9See rieten de Weis vonne Brost, un waut de Älenta aunhaft, nämen see aus Auntolinj. 10Noaktich gonen see omhäa, onen Kjleeda, un hungrich droagen see de Goawen; 11tweschen äare Mia prasse see Eelj, klunjen de Wienprass un darschten. 12Von de Staut häa stänen de Stoawenden, un de Seelen de Jeschloagnen schrieen. Un Gott räakjent daut nich aus Orrajcht aun.
13Jane jehieren to de Fiend vom Licht, see kjanen siene Wäaj nich un bliewen nich opp siene Stiej. 14Met daut Licht steit de Merda opp, moakt däm Älenden un däm Oamen doot; un de Nacht es hee aus een Deef. 15Un de Uagen de Ehebräakja luaren opp de Dunkelheit, endäm hee sajcht: Kjeen Uag woat mie seenen; un hee lajcht eenen Schleia aun. 16En de Diestanis brakjt maun en de Hiesa en. Äwadach schluten see sikj en, daut Licht kjanen see nich. 17Dan de Morjen es an aula toop de Doodesschauten, dan een jiedra von an es bekaunt met däm Schrakj vom Doodesschauten.
18Hee es schwind opp däm Wota, veflucht woat äa Akastekj oppe Ieed; hee schleit nich mea däm Wajch toom Wienboajch en. 19Drieeje Tieden un Hett roopen daut Schneewota wajch: Soo de Scheol, dee jesindicht ha. 20Daut Muttalief vejat am, de Warm freien sikj äwa am, aun am woat nich mea jedocht: Un daut Orrajcht woat vebroaken aus een Boom, 21hee, dee de Onfruchtboare berooft, dee nich jebäaren kaun, un de Wätfrues kjeen Goodet deit. 22Un Majchtje roopt hee [Gott] doahan derch siene Krauft; hee [de Gottloosa] steit opp, wan hee uk aum Läwen vetwiewelt. 23Gott jeft am Sechaheit, un hee woat raufjeschmäten. Oba siene Uagen sent äwa äare Wäaj. 24See sent huach jestäajen: Om een Kjlienet, un see sent nich mea; un see sinkjen han, woaren toopjeroopt aus aule aundre; un aus de Kopp vonne Oaren woaren see aufjeschnäden. 25Un wan daut nich soo es, wäa woat miene Läajes strofen un miene Räd tonicht moaken?
Currently Selected:
Hiob 24: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
