Jesaja 29
29
De Angst un Radunk von Jerusalem woat bekauntjemoakt
1Wee Ariel, (Gottes-Held) Ariel, Staut, woa David loagad! Doot Joa toom Joa doatoo, lot de Faste enne rund gonen! 2Un ekj woa Ariel bedrenjen, un daut woat Seften un Stänen jäwen. Un see woaren mie sennen aus een Ariel. 3Un ekj woa die runtom ommloagren, un die met Wachposte enschluten, un Woakjen toom Beloagren jäajen die opprechten. 4Un doljedrekjt woascht du ut de Ieed räden, un diene Sproak woat doljedrekjt ut de Ieed to hieren sennen; un diene Stemm woat aus dee von eenen Jeist ut de Ieed väakomen, un diene Sproak woat ut däm Stoff fuschle.
5Oba aus fiena Stoff woaren de Menj diene Fiend sennen, un aus wajchjepuste Sprie de Menj de Jewaultje; un en eenem Uagenblekj, plazlich, woat daut passieren. 6Von de Sied Gottes de Häaschoa woat see bestroft woaren met Donna un met Ieedbäben un grootem Jetees, – Stormwint un Jewitta un vebrennennde Fiaflaum. 7Un aus een Droomjesecht enne Nacht woat de Menj aul de Nazionen sennen, dee Kjrich fieren woaren jäajen Ariel, un aule, dee an un äare Fastinj bestiee un an bedrenjen. 8Un daut woat passieren, soo aus de Hungaja dreemt, un kjikj, hee at – un hee woakt opp, un siene Seel es ladich; un soo aus de Darschtja dreemt, un kjikj, hee drinkjt – un hee woakt opp, un kjikj, hee es meed un siene Seel darscht: Aulsoo woat de Menj aule Nazionen sennen, dee Kjrich fieren jäajen däm Boajch Zion.
Veblindunk un Vewaundlunk vom Volkj derch Gott
9Stutst un staunt! Veblent junt un woat blint! See sent bedrunken, doch nich von Wien; see schoklen, doch nich von stoakjen Jedrenkj. 10Dan de Har haft eenen Jeist met deepen Schlop äwa junt utjegoten un haft june Uagen veschloten; de Profeeten un june Heipta, dee Jeheemnisen Seena, haft hee bedakjt. 11Un jiedret Jesecht es junt aus de Wieed von eene vesäajelde Schreft jeworden, dee maun eenem jeft, dee läsen kaun, endäm maun sajcht: Läs doch dit! Hee oba sajcht: Ekj kaun nich, dan daut es vesäajelt; 12un maun jeft de Schreft eenem, dee nich läsen kaun, endäm maun sajcht: Läs doch dit! Oba hee sajcht: Ekj kaun nich läsen. 13Un de Har haft jerät: Wiels dit Volkj met sienem Mul noda kjemt un met siene Leppen mie ieet, un sien Hoat wiet von mie helt, un äare Angst ver mie aunjelieedet Menschenjeboot es: 14Doarom, kjikj, well ekj wiedahan wundaboa met disem Volkj haundlen, wundaboa un sondaboa; un de Weisheit von siene Weise woat tonuscht woaren, un de Vestaunt siene Veständje sikj vestäakjen.
15Wee dän, dee äare Pläne deep vestäakjen ver däm Harn, un dee äare Woakjen em Diestren passieren, un dee doa sajen: Wäa sitt ons, un wäa kjant ons? 16Oo, äwa june Vekjieetheit! Saul dan de Toppmoaka aus de Leem jeacht woaren? Daut dit Woakj von sienem Meista sajcht: Hee haft mie nich jemoakt! Un daut Jemoakte von sienem Erschaufa sajen: Hee vesteit daut nich!
17Es daut nich noch goa een Kjlienet, daut de Libanon sikj en een Fruchtfeld vewaundelt un daut Fruchtfeld däm Woolt jlikj jeacht woaren woat? 18Un aun janem Dach woaren de Duwen de Wieed utem Buak hieren, un ut Dunkel un Diestanis woaren de Uagen de Blinje seenen. 19Un de Älendje woaren äare Freid en däm Harn vemieren, un de Oame unjre Menschen woaren froo sennen en däm Heiljen Israels. 20Dan een Enj haft de Jewault doonenda, un de Spata veschwinjt; un aula woaren utjerot, dee opp Onheil bedocht sent, 21dee eenen Mensch om een Wuat schuldich erkjläaren wellen un däm Schlenjen lajen, dee em Dooa Rajcht sprakjt, un fa nuscht däm Jerajchten ut sienem Rajcht vedrenjt. 22Doarom, soo sajcht de Har, dee Abraham erleest haft, toom Hus Jakob: Jakob woat nich mea beschämt woaren, un sien Aunjesecht woat nich mea blauss woaren. 23Dan wan hee, wan siene Kjinja daut Woakj miene Henj en siene Medd seenen woaren, soo woaren see mien Nomen heilje; un see woaren däm Heiljen von Jakob heilje un ver däm Gott Israels sikj enjsten. 24Un dee veerrte Jeistes sent, woaren Vestentnis erlangen, un Murrende woaren Lia aunnämen.
Currently Selected:
Jesaja 29: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
