Lucas 1
1
1Némunarukene Teófilo, nukajurevi puiti apaesa pecha píti apanaware eta juka néchakeneana'i nuti. Ichapemuriana'i ena tiájuekene'ana'i eta máicharakawa'i ema Viákenu eta ani te vitaraku, 2Tamutu eta nájuekene'aira'i, taicha tamutu'i nukayasesereru naye'e ena tinekapaekene'ana'i, tíma'ana'i eta apaikape te táepanirawa'i eta máitaresira'i ema Viákenu. 3Tetavikawa eta tauriwa eta nimaira'i te taekenepa eta nukayesereruira'i te taepaninewa eta vichakene'i, taka'e najuchinaviya eta juka apaesa pimatiekene'a yatupina tamutu piti Teófilo, 4nuwara'a nímimatichavi apaesa yátupina pecha tamutu eta juka piárawa'uana'i.
Ema ángele makámetarapi eta máuchusirayare ema Juan tikachasirikara'i
5Kape juka viásinekene'i te émaicha'a ema Aluresi akenuka'i, rey'i taye'e te Judea, matiari'i'iware ema achane tikaijare Zacarías. Ema, náumuriwana'i ena tikaijareana Abías. Eta náematanerepi ena, náechapajirika eta námawa'uasana ena achaneana taye'e eta templo. Esu mayena ema Zacarías tikaijaru'i Isabel, mámariekeneni'i esu ema víyara'aini Aarón. 6Ema Zacarías ésupa esu mayena, tájina náichirawaina'ini te mamira'u ema Viya. Tamutu'i naitaucha eta mawanairipiana ema Viákenu, taka'e tájina náechejisiekenena'ini naye'e ena achaneana. 7Nájinasera nachichaina'ini, macheru'i esu Isabel eta suítaresira. Wáipaware tikachichanaima'i, taicha tinunanaipa ichavikanaipa'i.
8Te jena sache, náichu'apa ema Zacarías eta masiapirayare taye'e eta templo. 9Taka'e, tikátuparakasipa ema. Émapa táetupiaka'i eta máematanerepiyare'i máijuchayare'i eta incienso te táina'u eta mesa náijuchirare'i. 10Máijuchapa eta incienso. Ena apamuriana achaneana nanasipa te aneka, tiyujarakanaipa ena. 11Tiáramikarepa tímerekawa ema ángele te mamira'u ema Zacarías. Mawaneru'i ema Viákenu. Titupi'aipa ema te waure taye'e eta namawa'u náijuchirare'i eta incienso. 12Tiáramekaine'i ema Zacarías eta máimaira'i ema ángele. 13Émasera ema ángele máichapa:
–Zacarías wa'i pikupika, taicha ema Viya masama'i eta piyaseserepi'i píti eta maye'e. Puiti esu piyena Isabel tikachichayare. Juan eta máijareyare ema echichayare. 14Ichapeyare eta piúrisamurewayare te máuchukapa ema echichayare. Énaipa ena achaneana, ichapeyarewa eta náurisamurewaya eta máuchusirayare. 15Ema pichichayare, ichapeyare eta makunachakarewayare maye'e ema Viya. Wa'i písapaima'i tera eta vino, étaipa eta apamuriana térakareana murakakeneana. Taicha ema, eta máuchusirayare, máwa'áruyarepa'i ema Machanewa Viya. 16Ema tétupirikayare eta táuriwayare eta napanereruana ena pijaneanana israelítana, tachavirayare eta nasuapirayare ema Viya. 17Ema maka Juan, ema tínapumirauchayarepa'i ema Viya. Makutiyare eta máitupajijiasirawaini ema víyara'aini profeta Elías. Ichapeyare eta máitusirayare eta makajimuyasirayare eta nasamureana ena achaneana, apaesa tachawa eta nasuapiraina ema Viya, tákuti eta nasuapajiraiwaini'i ena náchukanaveanaini'i. Énaipa ena Wínarajipanereruana, tisuapajira'ianayarewa máicha. Mametakawakayare ena achaneana natsekawaipa eta najakapirayare ema Viákenu.
18Ema Zacarías mayarekapa ema ángele:
–Ichavika'avipa víti ¿Nicharakawa eta nusuapiraina yatupi? Eta juka vikachichairayarepuka.
19Émasera ema ángele majikapawarepa:
–Nuti nukaijare Gabriel. Nuti mawanerunu'i ema Viya. Nutuparakasiwaichu'i eta numetasiraviyare eta juka Arairu techakare. 20Puítisera úpaviyare. Eta ekutiarareyare piye'e, taicha eta pimasuapiranu'i. Tiámainukawa te táitauchawapa eta juka numetaruvi'i, péchejikainawarepa.
21Taka'e, ena achaneana nanasikeneana'i te aneka nakuchaparairikaipa'i ema Zacarías, náramipa eta mayerewaipa'i te taju'e te templo. 22Jé'esareine'i, te tiúchukapa ema Zacarías, waipa máechejika'ini. Náimatiakapasera ena, eta máechejisira'i ema Viya te taju'e. Tisuveverekapaipa'i ema eta mawaraira'i máimikutiarachawaka ena achaneana, eta yátupira'i masamakene'i. Úpapaipa'i ema.
23Te títauchawapa tamutu eta jena sácheana'i eta matuparakasiwa'i, tiyanapa ema Zacarías te mapena. 24Tási'a, esu mayena Isabel, tikajaripa esu. Wáipasera súchuchureka'ini te supena. Wá'iware sumetajirika'ini. Tiámainukawapa te títauchawayarepa eta sinkukene'i kaje eta sukajarira'i. 25“Ichape eta ñijapanuiranu'i eñi Viya, tíjarakanu'i eñi nuchichayare. Wáipasare nayunakaima'i ena achaneana eta numacheruwa'i.
Ema ángele makametarapi eta máuchusirayare ema Jesús
26Te saisikenepa kaje, ema Viya mápechaware mawaneka ema ángele Gabriel tiúkupaika taye'e eta awasare Nazaret te Galilea. 27Máukupauchapa esu amaperu esena tikaijaru María. Esu, tájina suímatiya'ini ema ajaira, matiari'ipasera ema suímayare'i, ema tikaijare José. Téjakaipa'i eta natratune. Ema, mámariekeneini'i ema víyara'aini rey David. 28Taka'e, ema ángele máukupauchapa esu taye'e eta suávi'a'i. Máichapa esu:
–Pícharakawa, María. Piti manerejiruvi'i ema Viya. Tétavikawa'i eta piúrikakarewayare, taicha ichape eta majapanuiravi'i ema Viya. Pikachurika'i namutu ena apamuriana esenana.
29Ésusera tiáramekaine'i eta máechejisira'i ema ángele. Supanerekene'aine'i tája'a'ipuka takayema'i eta máechejisira'i ema ángele. 30Émasera ema ángele máichawarepa:
–Wa'i pikupika, María. Piti manerejiruvi'i ema Viya. 31Numetapanavi'i puiti eta pikajarirayare. Ajairayare ema pichichayare. Jesús eta máijareyare. 32Tétavikawaya eta napikauchirayare ena achaneana taicha Machichayare'i ema Viya. Ichapekeneyare eta akenukairayare ema taicha ema Viya manakayarewa eta máwakureyare akenukayare. Makutiyare'i eta akenukaira'i ema máchukaini David, 33ema téchayare'i namutu eta awasare mawasa ema Jacob. Máepenakakayare eta akenukairayare.
34Tási'a, esu María, suyaserekapa:
–¿Tája'asika táicharakawayare eta juka Taicha nuti nájinaicha'a nímaina'ini?
35Émasera ema ángele máichawarepa:
–Pikachichayare taicha eta máitupajijiasirawa'i ema Viya. Timikáuchaviyare eta majaraiwa, tási'a, tisiapa'akavinapa ema Machanewa Viya. Eta taka'e, ema amuya pínaruyare, santuyare ema, taicha machichayare'i ema Viya. Náimatiyare namutu eta machichaira'i ema Viya. 36Pikutiyare esu pijaneana Elisabet, éneichuware tikajaripa'i esu. Tayanapane'i ichavikachichaipa'inéni esu, macheruini'ineni. Saisiripasera kaje eta sukajarira'i puiti. 37Taicha ema Viya, tájinakene máemaituka ema.
38Taka'e, esu María sujikapapa:
–Nuti ñiwanaranuichu'i eñi Viya. Nutiari'i puiti. Ñíma'anuinepa eñi, eta ñícharakanuyare te ñiwanairipiana.
Taka'e, eta masamira'i ema ángele, tiyanapa tichawa'i.
Esu María suéjirapanapa esu Isabel
39Taka'e, te jena sácheana titátajipa esu María tiyana taye'e eta awasarechicha te tatarakukujiana'i eta máriana taye'e eta tinapaika te Judea, 40te títekapapa esu María taye'e eta mapena'i ema Zacarías, suéchejikapa esu Isabel. 41Te susamapa esu lsabel eta sua'u esu María suéchejisira'i, tiyamurikaine'i eta amuya te suju'e esu lsabel, énewanepa máwa'aka'i esu ema Machanewa Viya. 42Taka'e, téchejikapa muraka esu lsabel, suíchapa:
–¡Píti, tétavikawa'i eta piúrikakarewa'i ñicha eñi Viya. Pikachurika'avi'i vimutu viti esenana. Éñiripa eñi pichichayare, tétavikawa'iware eta ñikunachakarewaya! 43Nusapi'asamipa nuti péjirapananu'i piti ñénaviyare'i eñi Nákenu. 44Te nusamapa eta pia'u eta péchejisiranu'i, tiyamurikaine'i te nuju'e eñi nuchicha, taicha eta ñurisamurewa'i eñi. 45¡Tétavikawa eta piúrikakarewaya píti taicha eta pisuapajiraiwa'i ñiye'e eñi Viya. Títauchawainapa tamutu eta ñimetarapi'i eñi Viákenu eta piye'e!
46Taka'e, esu María suka'epa:
“Ichapemuri'i te náchanewa eta nukunachira'i eñi Viákenu,
47taicha tétavikawapa eta táurisamurewa eta nusamure
ñicha eñi Viya tikatiura'ikene eta nuye'e.
48Taicha eñi Viya tinerejikanu'i
nuti páurenu'ineni ñiwanara'i,
taicha namutu ena achaneana natiari'ikeneana'i puiti,
tási'a énapa ena arajuruanayare,
tetavikawainapa eta nakunachiranuyare
49taicha eñi tétavikawapa eta Ñítupajijiasirawa'i
tíjarakanu'i eta núriwayare'i ñicha.
¡Je'eware eñi Santukene'i eta ñijare!
50Eñi Viya ñijapanuwaka'i
nákani tipikauchanayare eñi,
nachichanaya ena arajuruanayare.
51Taicha ñicha'i eta ñítupajijiasirawaya:
ñikaerajikawakaya eta napanereruana ena tikasiñawawairikana.
52Nákani reyeana ñikapakechawakayare'isera eñi
nasapi'apa ena páureanasami'i,
ñinerejiruanaya ena ñijupa'anayare.
53Ñíjarakawakapa ena teku'anapa'i
tási'a ena rikuana ñikaerajikawakapa
mawawa'uanapaipa.
54Ñímikataka'i eta awasare Israel, eñi ñichanera,
tási'a wa'i ñemitisika'ini
eta ñijapanuirawaka'i.
55Eta taka'e'i eta ñimetasira'i
ena viáchukanavanaini,
eñi Abraham, tási'a énapa ena
náekenereruana arajuruana.”
56Sunasipanapa esu María te supena esu lsabel, mapana kaje eta suyerewa'i, tási'a tichawapa te supena.
Eta máuchusira ema Juan Tikachasirikara'i
57Taka'e, títauchawapa eta sukajera esu lsabel, suínakapa ema suchicha. 58Tiyananapa ena sujaneanana, énapa ena suchakayapenana'i náejirapana'i, tiúrisamureanaine'i namutu ena, táicha ema Viya majapanu'i esu. 59Te uchukenepa sache eta máuchusira'i ema amuya, námapa, nanakayarepa eta maikutiarayare, eta naechatikuerechanayare'i eta taparumakuerena eta make'e ema amuya. Tási'a nawara'apa nanakayare'i eta máijareyare Zacarías, mámapikayare'i eta máijare ema máiya. 60Ésusera esu maena suíchawakapa:
–Wa'i. Juan eta ñíjareyare.
61Najikapapa ena:
–Nájina tikaijarena eta Juan, ena pijaneanana.
62Taka'e ena, náimikutiarachinapa eta nayaseresira'i ema Zacarías, tája'apuka eta máijareyare'i maicha ema amuya. 63Ema Zacarías mayaseakapa eta táblamechicha, májuchi'ayare'i eta máijareyare'i ema machicha: ‘Juan eta máijareyare.’ Náramine'i ena, taicha eta máijareyare'i ema amuya. 64Tási'a, tíja'uchawapa tichawapa eta máechejisira ema Zacarías. Makunachapa ema Viya eta máurisamurewa'i. 65Ichape eta tiáramikare'i naye'e ena natiari'ikeneana'i. Nasamairikawanepa namutu ena tikawasana'i te awasarechichana te Judea. Náechejisi'apa eta juka nasamairiruana'i. 66Namutupa napanerekene'a'i. Nákani tisamairikanapa'i, tiyaserejirikakanaipa. “¿Kañari'i takayemakene'i eta juka máuchusira'i ema amuya?”
Táicha ema amuya, tétavikawa'i eta majaneasira'i ema Viya eta majurusirapaipa'i.
Eta majirarapi ema Zacarías
67Ema Zacarías, maiya ema amuya, makunachaipa ema Viya, taicha máwa'akaipa ema Machanewa Viya, tási'a tikametarairupa. Ánipa maka'e'i:
68“¡Kunachakare ema Viákenu, ema Viya naye'e ena Israelitana,
taicha ema titeka'i makuchuku'apana eta mawasa!
69Mawaneka'i ema yátupikene Makatiuraiwa,
ema émana'i mámariekene'i ema David,
ema mawanaraini'i ema Viya.
70Etaipa'i eta juka maikure'avi'i eta akane
naye'e ena santo profetanaini:
71ema tikatiucha'aviyare'i naye'e ena vianaramuriana
tási'a namutu ena tikaticha'aviana'i,
72taicha ema majapanuirawakayare'i
ena viáchukanaveanaini
tási'a wa'i maemitisikaima'i eta matratune'i.
73Tási'a eta'i eta juka,
eta maechejiriruwa,
maye'e ema tata Abraham:
eta maisapira'aviyare,
74wa'i vikupika eta vitaresira,
taicha ema tikatiucha'aviyare'i
naye'e ena vianaramuriana,
taka'e vitatinapa ema
75eta víchiraya eta taurikeneana,
tási'a vika'erayare'i te mamira'u ema
tamutu eta vítaresira.
76Píitisera nuchicha,
píchuarekasiwa'i maye'eviyare profeta ema Ichape Vikaiyakene,
taicha piti pinapumirauchaya ema Viya
petupirikaya eta achene,
77apaesa pimimaticha eta mawasa
eta makaepa'airaya ema Viya eta napekaturana
tási'a maijaraka'i eta nauchukuiraya.
78Taicha ema Viya
ichapekene'i eta majapanuira'avi'i,
mamina'avipa'i te anuke'e
takuti'i eta sache te yatikara'i,
79ema maijaraka'i eta majaraiwa ena tiavi'ana'i
te ichapekene mapiku'ana,
tási'a timecha'aviya eta tauriwaya eta vipaisira
te taurikakarekene achene.”
80Ema amuya eta majurusira'i, tiámawaipa'i eta masuapajiraiwa'i maye'e ema Viya. Wá'iware étaina'ini te taju'e eta awasare eta majurusine'i. Wáma'ikuru'a'i eta majurusira'i. Tiámainukawapa te ajairapa, tímerekawapa naye'e ena israelítana, tépanawapasera tikametarairu.
Currently Selected:
Lucas 1: IGB
Highlight
Share
Copy
Want to have your highlights saved across all your devices? Sign up or sign in
Nuevo Testamento Ignaciano © Sociedad Bíblica Boliviana, 2004.