1 Bakolinto 16

Byakubenga bya bantu ba Lesa

1“Lino kwamba sha makani a kubenga mali akunyamfwilisha baklistu banetu bali mu Yudeya, ndambangeti mwinse mbuli ncondalambila mibungano ya mucimpansha ca Galatiya.” 2Uku okwambeti sondo ne sondo muntu uliyense abikenga pambali mali kwelana mbuli ncabele mwine pang'anda, kwambeti kakutakaba kubenga ne kubunganya mali cindi ncotinkese kwenu uko. 3Lino ndakashika, nkacane mwasala bantu beshi bakatwale bipo byenu ku Yelusalemu pamo ne makalata alabapandululunga. 4Na cikayandika kwambeti nenjame nkenga, ninkenga pamo nabo.

Paulo layeyenga sha bulwendo bwakendi

5Pakwisa uko ninkapitile ku Makedoniya pakwinga enkondayeyenga kuya kupitila. 6Ninkekale nenu kwa cindi citali, mpani cindi ca mupewo conse, kwambeti mukanyamfweko bintu bilayandikinga mubulwendo ndakafumanga uko ne kuya kulikonse nkoti nkayande kuya. 7Nkansuni kumufwakashila kwakacindi kang'ana sobwe, nsuni kwambeti na Lesa akasuminishe nkekaleko kwacindi citaliko.

8Kuno ku Efenso ninjikaleko mpaka cindi ca Pentekosite. 9Pakwinga kuno incito ilakonempe nikukabeti kuli bantu bangi bantotekenga.

10Na Timoti akese uko mukamutambule cena kwambeti katakanyumfwa buyowa, pakwinga neye lasebensenga incito ya Mwami iyo njondasebensenga. 11Kamutakaleka bantu nabambi pakati penu kumunyansha sobwe, mukamunyamfwe mubulwendo bwakendi bwakwisa kuno kulinjame mulumuno, pakwinga ndamupembelelenga kwisa kuno.

12Ndelekeshe tunkanda twingi kumuyuminisha mwanse wetu Apolo kwambeti amufwakashile pamo ne banse nabambi, nomba nkasuni pacino cindi, nakese akacana cindi.

Maswi akulayana

13Kamubani bantu babangamana cindi conse, bemana cituloba mu lushomo. Kamubani babula buyowa bakute lushomo lwayuma nta! 14Bintu byonse mbyomulenshinga, binshikenga mulusuno.

15Mucishi cena kwambeti Stefano pamo neba mung'anda yakendi ebalatanguna kulesha lushomo muli Klistu cimpansha ca Akaya. Balibenga kusebensela baklistu banabo, neco ndamusengenga mobanse bame, 16kamunyumfwilani batangunishi balico, ne bantu bonse balasebensenga cangofu pamo nendibo.

17Ndakondwa kuboneti Stefano, Fotunato, ne Akayasi balesa kuno, cilabeti mwense nkomuli. 18Kwisa kwabo kulantontosho moyo, mbuli ncobalamutontosha myoyo ne njamwe. Kamushako mano ne kubalemeka mubintu mbyobalamwambilinga bantu aba.

19Mibungano ya bantu ba Lesa ya mucimpansha ca Asiya ilamupanga mitende. Akula ne Prisila pamo ne baklistu bakute kubungana mu ng'anda yabo balamupanga mitende mu Lina lya Mwami Yesu uyo latwikatanyanga pamo.

20Banse bonse kuno balamupanga mitende. Kamupanani mitende yakasala. 21Kamutambulani mitende njondalembenga ndemwine ame Paulo.

22Na pali muntu utasuni Lesa, muntuyo abe washinganwa. Ee! Kamwisani linolino Mwami. 23Kwina moyo kunene kwa Mwami Yesu kube nenjamwe. 24Lusuno lwakame lube kuli bonse bashoma Klistu Yesu.

Currently Selected:

1 Bakolinto 16: SBT

Highlight

Copy

Compare