Sakaria 4
4
Ala Bɔnu Kɔlɔndi Akɛnku Asogya Kasiakɔ Ku Nnɔ Egyii Lɛlɔ
1Ɔtu ɔni nnye muudie ala amɛni kalɔ teete-mi ɔ́kunku-mi na lɛ́ta na ɔ́bla-mi aani si bɔlɛɛ na nda. 2Amu na úye-mi ɔnini, “Bi na ánu?”
Mmɔ na lídie kenye nnini, “Asogya kasiakɔ sika ugyiedi ugyii na kalɛkɛ kani kemmo na beewi nnɔmii bɔsia-nwu katɔ kakɛ. Na ugyii ɔmmɔ lɛlɔ ni, lɛsogya maatɛ lise lɛɛda, na asogya biala uudie ogya linyemi maatɛ. 3Nnɔ kugyii kunwi kunye nnɔ kalɛkɛ kammɔ kɔdianu kakɛ na kunwi lɛnɔ kunye kɔmiinu kakɛ. 4Nsu ni, Ati, bi na ala ani mɔɔnu mɛni adanku?”
5Amu na anwu lɛnɔ únwini na úye-mi ɔnini, “Aaagyi lɛla lɛni na adanku?”
Amu na lídie kenye nnii, “Oowo.”
6Anwuɔsu ɔtu ɔmmɔ ɔ́su-mi ɔnii, “Lɛla lɛmmɔ lɛdanku kenye kani na Unwoti ɔ́su Serubabel ɔnini, ‘Ami ndi Unwoti Ɔyikune Ƒui. Utalɛ ka eti ƒula anu asia ƒula ɔyikun iye kenyekɔ kadi lɛlɔ, mmomu mina kɔyu ɔyikun lɛlɔ.’
7“Na kɔbi kɔni na aanu na ƒula anumi mmɔ ni, badubo-ku bɔbwɛ búwi kalɔ kpɛtɛ kpɛtɛ. Na edie kakpakɔ lɛtabi lɛni náƒɔ kuye geen litulo ƒui mmɔ alɛku, na bɛdububo kudu momoomo bɛnini, ‘Unwoti ɔ́bla-bu lɛƒɔndia, na lɛtabi lɛmmɔ lɛdia geen!’ ”
8Ɔmmɔ kama ni, Unwoti ɔ́sɔ ɔ́tɛmiku-mi na ɔ́su-mi ɔnini, 9“Serubabel nákya kakpakɔ kammɔ kowodu ɔka kalɔ buse, na anwu kani ndubo-nwu bɔwɔlɔ. Na ɔmmɔ ndubɔya na bekyuli ƒui banu bati ka ami, Unwoti Ɔyikune Ƒui, nátala-a lɛ́kya-ma. 10Na bekyuli bani ƒui nátanu limeyi lɛmɛni bátabu na kalɛ na ala amɛni eesié kalɔ blii mɛni ɔsu ni, ama ndubo babadi limeyi uwi ɔni na badubɔnu ka Serubabel ɔda lɛtabi lɛni náƒɔ kuye geen mɛni. Na lɛsogya maatɛ lɛmmɔ linye lite ami Unwoti anumi ani náka ámana kalɔ kammɔ ƒui, na aanu lɛla biala kemmo nwaa.”
11Mmɔ na líye ɔtu ɔmmɔ nnini, “Na nnɔ egyii ani nnye mmɔ anya nɔɔ? Bi na enye ete? 12Na bi na egyii kɔgba kɔni kemmo na nnɔgyie bɔni nse aani sika ugyiedi bɔɔgbá taalɛ lɛkpɛmii kemmo mmɔ aku kunye kute?”
13Amu na úye-mi ɔnini, “Aaagyi lɛla lɛni na kunye kute?”
Amu na lídie kenye nnini, “Oowo, Ati, lɛɛɛgyi.”
14Amu na ɔ́su-mi ɔnini, “Kɔgba kɔmɛni kunye kute batɔnkune inyɔ bani na béwi-ma lili nnɔmii na báƒuna-ma mmɔ na benye bayawine ƒui Unwoti kudɔ.”
Currently Selected:
Sakaria 4: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
