Bumomo Bɔka 4
4
Béte Lewiƒuɔ Bani Nási Kehat Kaba Kemmo Kabla
1Amu na Unwoti ɔ́su Mose ku Aaron ɔnini, 2“Bɛka Lewiƒuɔ bani ndi Kehatƒuɔ na bana adua ku atɔƒi kenye. 3Na bɛka banana bani ƒui náaƒɔ akwa avlaatɛ útédu akwa liti bani muubo taababla kabla na Adi Kevo kammɔ kemmo.
4“Kehatƒuɔ bammɔ kabla na Adi Kevo kammɔ kemmo ndi ka bataanu ala kedee ani nse mmɔ ƒui lɛlɔ. 5Na si úbo úte ka bɛta mmɔ bisie kesii bamba ni, ɔlɛka Aaron ku nwuna bebi bananabi besie na batáƒami kakpakɔ bule kɔdi kɔni mɔɔbala Bunyimi Adaka ɔmmɔ na beti benyimi adaka ɔmmɔ lɛlɔ bamana ƒui. 6Na beti ketu kemmo bebuo benengudi lɛku buni bebi-nwu eli, na beti kɔdi buluu bebi-nwu lɛlɔ, na beti ligyii lɛni beeti teeti kevo kammɔ bakya-nwu lɛƒɛnyi.
7“Na ala kasiakɔ kani nlɛ-mi anumi ni, beti kɔdi buluu bewi-nwu lɛlɔ. Na beti akyami eblidi ku enengudi lidu basia. Na beti lɛsii lɛni kemmo na beewi akpala ntɛ ku bodobodo ɔni ndubɔsia mmɔ uwi ndi uwi basia-nwu lɛlɔ. 8Na beti kɔdi kugyiedi bewi ala ammɔ lɛlɔ na beti ketu kemmo bebuo benengudi lɛku buni bebi-nwu lɛlɔ. Na beti ligyii gyɔlɔɔ lɛni na beeti taagyu-nwu bakya-nwu lɛƒɛnyi.
9“Ɔmmɔ kama na beti kɔdi buluu benyimi asogya kasiakɔ ugyii ɔmmɔ ku lɛla lɛni na beeti teenyene lɛsogya kɔbuli kɔmmɔ ku ntɔ kuwikɔ ku lɛsogya nnɔmii kuwikɔ lɛsii lɛmmɔ ƒui. 10Na benyimi-nya ku ana lɛlɔ kabla ala ƒui bakya ketu kemmo bebuo benengudi lɛku kemmo na beti basia ligyii lɛni lɛlɔ na beeti teeti ala ammɔ lɛlɔ.
11“Na sika ugyiedi lɛkpabi lɛmmɔ ni, beti kɔdi buluu bebi-nwu lɛlɔ na beti bebuo ɔku bebi kɔdi kɔmmɔ lɛlɔ na bakya-nwu ligyii lɛni na baagyú-nwu lɛƒɛnyi.
12“Na kakpakɔ kabla lɛlɔ ala ƒui na katɔma kedee kammɔ kemmo ni, benyimi ala ammɔ ƒui bakya kɔdi buluu kemmo, na beti bebuo ɔku bebi-nya lɛlɔ ƒui, na bagyu basia ligyii lɛni lɛlɔ na beeti teeti-nya lɛlɔ.
13“Bedie ntɔ na lɛbualagyie lɛkpabi lɛmmɔ kemmo na beti kɔdi kɔni náƒɔ kuye geen bebi-nwu lɛlɔ. 14Na beti anwabui ku akyami ani lɛlɔ kabla na baabla na lɛkpabi lɛmmɔ lɛlɔ basia-nwu lɛlɔ. Ala ammɔ adanku ogya kuwikɔ ku kɔvili kɔni na baatu lɛna ku alakpi kɔlɛkɛ ku akyami bonwu ani kemmo na baakya ntu teewi bekyuli. Beti bebuo lɛku bebi ala amɛni lɛlɔ benyimi na beti ligyii lɛni na beeti taagyu-nwu bakya-nwu lɛƒɛnyi.
15“Ɔƒɛni si uwi ɔni na Aaron ku nwuna bebi bananabi báwɔlɔ ala buti teebi Kevo kammɔ, na báwɔlɔ ala kedee ammɔ ku kana kemmo ala ani nse kedee mmɔ ƒui ala bubi, na báwɔlɔ lɛlɔ bɔklibi ƒui ka bata ni, na Kehat bebi bananabi bani na ɔ́lɛka beti ala ammɔ bebo na bebeti-nya. Nsu bana ɔdi kɔnu kutetuku ala ani nse kedee mmɔ amu badubo bukpi. Kehatƒuɔ bammɔ beti ala ani nse Kevo Kasakɔ kemmo mmɔ.
16“Aaron ubidi Eleasar ɔni ndi ɔkpane ni, nnɔmii bɔni na beewi asogya ku oloƒui ƒɛƒɛɛ ku limeyi ndi limeyi edula ebi akpala ku likpose nnɔmii ni, nwuna lɛkɔkɔ na ɔ́lɛka akya. Na anwu na ɔlɛka utaanu katɔma kammɔ ku kana lɛlɔ ku kakpakɔ lɛlɔ ala kedee ammɔ ƒui lɛlɔ.”
17Amu na Unwoti ɔ́su Mose ku Aaron ɔnini, 18“Bɛnu ka bétekulo Kehat adua ku bana kaba bekyuli bítedie Lewiƒuɔ lɛlɔ. 19Kalɛ na belekpi si báni beedé ala ani na ese kedee ƒui mmɔ. Anwuɔsu ɔlɛka Aaron ku nwuna bebi beduo katɔma kammɔ kemmo na bele kabla kammɔ bete ɔdi biala ku ala ani na ɔlɛka beti. Ɔmmɔ na ɔlɛka bɛbla bite-ma. 20Nsu Kehat bebi bammɔ beeebo kuƒi ka beduo mmɔ na benye banu ala ani nse kedee mmɔ ina uwi klukwii ɔdi, si ɔɔɔdi lɛni badubukpi.”
Gersonƒuɔ Lɛlɔ Kɔtɛ
21Amu na Unwoti ɔ́su Mose ɔnini, 22“Ka Gersonƒuɔ bammɔ na bana adua ku atɔƒi kenye. 23Ka banana bani náaƒɔ akwa avlaatɛ útédu akwa liti na beebo taababla kabla na Unwoti Kevo Kasakɔ mmɔ.
24“Na kabla kani na Gersonƒuɔ badubo bɔbla bubunku ala buti kabla kammɔ ndi amɛni, 25Ama ndubo buteeti Adi Kevo kani ndi Kevo Kasakɔ kammɔ ala ani béti bákya ɔtɔ ɔmmɔ kemmo ku ala ani béti bébi ɔtɔ ɔmmɔ kama ku ebuo ɔku buni ɔni béti bébi ɔtɔ ɔmmɔ eli ku lɛdiku lɛni nƒa Unwoti Adi Kevo kammɔ kayakun, 26ku aduni ani nƒa kaduli kammɔ ámana Adi Kevo kammɔ ku lɛkpabi lɛmmɔ ku kayakun kɔdi kɔmmɔ ku kɔbuli kɔmmɔ ku kabla kammɔ lɛlɔ kɔlɛmii ƒui. Na Gersonƒuɔ bammɔ na ɔlɛka babla kabla biala na kadanku ɔtɔ ɔmmɔ lɛlɔ ala amɛni ƒui. 27Na Aaron ku nwuna bebi bananabi na ɔlɛka banu Gersonƒuɔ bamɛni lɛlɔ na babla ala ammɔ ƒui si ala buti na bɔdi iye kabla bamba na kadi. Na ɔlɛka ete-ma ala ani na badubo buti aani bana kabla. 28Gersonƒuɔ bammɔ bana kabla kadi mmɔ na Unwoti Adi Kevo kammɔ kemmo. Na ɔkpane Aaron ubidi Itamar ndubo bana kabla lɛlɔ bɔnu.
Merari Kaba Bekyuli Kabla
29“Ka Merariƒuɔ bammɔ na bana adua ku atɔƒi kenye. 30Na edie banana bani nákɛ ɔ́si akwa avlaatɛ útédu akwa liti na bámanku ka babla kabla na Unwoti Adi Kevo mmɔ. 31Na bana kabla ndi ka ama ndubo ɔtɔ ɔmmɔ ligyii ku lɛtalagyii ku akpa ammɔ ku ligyii lɛni nda kakpakɔ bule kɔdi ana lɛka ƒui buteeti. 32Na ama kani ndubɔlɛ kaduli kammɔ ƒui ligyii ku akpa ku ana lɛka ku Kevo kammɔ ewele ku kɔbuli ku kevo kammɔ lɛlɔ ala ani ndanku-ka ƒui. Na ete ɔdi biala ku lɛla lɛni na ɔdi ka uti. 33Kabla kammɔ na Merari adua ammɔ badubo butaabla na Unwoti Adi Kevo mmɔ. Na ɔkpane Aaron ubidi Itamar ndubo kabla kammɔ lɛlɔ bɔnu.”
Báka Lewiƒuɔ Bammɔ Bánu
34Amu na Mose ku Aaron ku Israelƒuɔ baduɔti bammɔ báka Kehatƒuɔ bammɔ na bana adua ku atɔƒi kenye. 35Na banana bani ƒui nákɛ akwa avlaatɛ útédu akwa liti na beebo taababla kabla na Unwoti Adi Kevo mmɔ 36bebo nkyuli mpim inyɔ ku eti leevu-alɔ (2,750) ka báka-ma na bana adua kenye. 37Na bani ƒui nási Kehat ɔtɔ kemmo na baabla kabla na Unwoti Adi Kevo kemmo bumomo na bɔdi mmɔ. Mose ku Aaron báka bekyuli bammɔ kalɛ kani na Unwoti úbo-ma ɔda.
38Báka Gersonƒuɔ na bana adua ku atɔƒi kenye. 39Na banana bani ƒui nákɛ akwa avlaatɛ útédu akwa liti na baabla kabla na Unwoti Adi Kevo kemmo mmɔ 40na bana adua ku atɔƒi ammɔ kenye bebo mpim inyɔ ku eti leevu-anyɔ ku avlaatɛ (2,630). 41Gersonƒuɔ bani mɔɔbla kabla na Unwoti Adi Kevo kemmo bumomo na bɔdi mmɔ na Aaron ɔ́ka-ma kalɛ kani na Unwoti úbo-nwu ɔda.
42Báka Merariƒuɔ na bana adua ku atɔƒi kenye. 43Na banana bani ƒui nákɛ akwa avlaatɛ útédu akwa liti na beebo taababla kabla na Unwoti Adi Kevo kemmo mmɔ 44bebo nkyuli mpim ɛtɛ ku eti ene (3,200). 45Merariƒuɔ bammɔ bumomo na bɔdi mmɔ na bana adua ammɔ kenye. Na Mose ku Aaron báka-ma aani kalɛ na Unwoti úbo Mose ɔda.
46Anwuɔsu Mose ku Aaron ku Israelƒuɔ baduɔti bammɔ báka Lewiƒuɔ ƒui na bana adua ku atɔƒi kenye. 47Na banana bani ƒui nákɛ akwa avlaatɛ útédu akwa liti na beesié taatábla kabla na Unwoti Adi Kevo kemmo 48bumomo bɔdi mpim maane eti leevu-unwi ku avlaatɛ (8,580). 49Na béte ɔdi biala nwuna lɛla lɛni na ɔdi ka ɔbla iye uti.
Lɛni na báka bekyuli bammɔ aani kalɛ na Unwoti úbo Mose ɔda.
Currently Selected:
Bumomo Bɔka 4: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
