Lewiƒuɔ Ɔda Bubo 24
24
Nnɔ Ku Bodobodo Ɔni Ɔlɛka Beti Bese Unwoti Anumi
1Amu na Unwoti ɔsu Mose ɔnini, 2“Su Israelƒuɔ na beboku nnɔ bɔni na bédie básiku nnɔ egyii kemmo na buse kede kede ute asogya ɔmmɔ kalɛ na utaada uwi biala. 3Asogya ɔni nlɛ Unwoti anumi na kesii kani na kakpakɔ bule kɔdi kɔmmɔ kɔƒa Bunyimi Adaka kama mmɔ ni, Aaron utaatu asogya ɔmmɔ na utaasia-nwu anu ɔsi useyi uwi útédu ɔtanta. Na ɔda bubo bɔmɛni buse bute bina bawɔ. 4Na asogya ɔni nsia sika ugyiedi ugyii asogya kasiakɔ na Unwoti anumi mmɔ ɔlɛka utaada uwi biala.
5“Ti akyami leevu-inyɔ ɔni na ana ƒui ese unwi na eti ɔlaaƒɔ na anwu bodobodo akya-nya kemmo na eƒi. 6Na eti bodobodo atásia ala kasiakɔ kani béti sika ugyiedi bakwa-nwu lɛlɔ. Na atɛ-nwu ɔgaala inyɔ na ɔgaala biala ɔbla ɛku. 7Na ɔgaala biala kudɔ na atu oloƒui alɛ-nwu kudɔ na uti ɔtina ka Unwoti adila adi mmɔ. 8Lɛnwunameyi biala ni, ɔlɛka bodobodo ɔmmɔ ɔdi use Unwoti anumi aani lɛla lɛni Unwoti únyimi úte Israelƒuɔ ka bataabla. 9Na bodobodo ɔmmɔ ɔdi Aaron ku nwuna kaba ɔdi. Na ɔlɛka badi bodobodo ɔmmɔ na kesii kani nse kedee. Ɔsika bodobodo ɔmɛni ɔdi adila ani nse kedee na beti bete Unwoti ka bakpane badi.”
Ukyuli Ɔdi Útemi Úwi Katɔti Na Bébo-nwu Atabi
10-11Limeyi lɛdi ni, kadɔ kadi kalɛ ɔnana ɔni ɔti ndi Egyipteni na unyɔdi ɔni ndi Israelni geen ntɛ. Na Egyipteni ubi ɔmɛni ɔ́tɛmi úwi Unwoti na ewida kemmo. Anwuɔsu béti-nwu besienku Mose kudɔ. Na ɔnana ɔmmɔ uni baalɔ banii Selomit na ɔ́si Dibri na Dan kaba kemmo. 12Amu na Mose ɔ́su-ma ka beti-nwu batákya ɔtɔ na benye bagya Unwoti utédu ka wasu-ma lɛla lɛdi.
13Mmɔ na Unwoti ɔsu Mose ɔnini, 14“Biti ɔnana ɔni nétemi anyikpi mmɔ bɛlɛku bina kakyakɔ. Na bekyuli bani ƒui nénu nwuna enyekpi etemila ammɔ beti bana enu basia-nwu kuli na Israelƒuɔ ƒui bebo-nwu atabi badu.”
15Na Unwoti ɔ́sɔ ɔ́su Mose ɔnini, “Su Israelƒuɔ anini, ‘Si ukyuli ɔdi úwida nwuna Katɔti badubo-nwu kɔtu bɔni. 16Na si ukyuli ɔdi ɔtɛmi enyekpi na Unwoti lɛlɔ ɔlɛka badu-nwu. Na Israelƒuɔ ƒui bebo-nwu atabi badu. Si ukyuli ɔmmɔ ɔdi ɔƒɔ o-o iye Israelni geen o-o ni, si útemi enyekpi na Unwoti lɛlɔ ɔlɛka badu-nwu.
17“ ‘Si ukyuli ɔdi ɔ́du nwuna ukyulikpana ɔlɛka badu-nwu anwu lɛnɔ.
18“ ‘Na si ukyuli ɔdi ɔ́du nwuna ɔkpanadi ebuo ɔdi ni, ɔlɛka ɔwia ebuo ɔmmɔ udu ute ɔlati. Lɛla lɛni ndi ngba ku ngba.
19“ ‘Si ukyuli ɔdi ɔ́pila ɔkpanadi kalɛ kani na ɔpila-nwu mmɔ lɛni kani na ɔlɛka beti babla ukyuli ɔmmɔ lɛnɔ.
20“ ‘Na si áƒɛ ukyuli ɔdi likubi ni, na baƒɛ awɔ lɛdi lɛnɔ basia. Si ábwɛ ƒula ukyulikpana lɛnumi ni, babwɛ awɔ lɛdi lɛnɔ. Na si áƒɛ ƒula ukyulikpana lɛnyi ni, baƒɛ awɔ lɛdi lɛnɔ. Kalɛ kani na úti ɔ́bla ɔkpanadi ni, lɛni kani na ɔ́lɛka beti babla-nwu.
21“ ‘Si ukyuli ɔdi ɔdu ɔdi ebuo na ɔwia ɔbamba ɔsia-nwu kenye. Nsu si ɔdu ukyulikpana na badu-nwu anwu lɛnɔ.
22“ ‘Na ɔda bubo bɔmɛni buse bute Israelƒuɔ ƒui ku baƒɔ bani nkya-mii akɔ. Ami ndi bina Unwoti Katɔti.’ ”
23Mmɔ na Mose ɔ́su Israelƒuɔ na beti ɔnana ɔni nátɛmi enyekpi na bétébo-nwu atabi bádu. Na Israelƒuɔ bábla básia aani kalɛ kani na Unwoti úbo-ma ɔda.
Currently Selected:
Lewiƒuɔ Ɔda Bubo 24: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
