Yî-sî-kiet Sû 21

Song-chú ke Kiam

1Song-chú lâu ngài kóng-fa; 2Kì kóng: “Ngìn-chṳ́ â, ngì oi mien-hiong Yâ-lu-sat-lâng, chṳ́-chit ke-têu sṳn-só, kóng yi-ngièn kín-ko Yî-set-lie̍t-thi. 3Ngài — Song-chú án-ngiòng kóng: Ngài oi cho ngì-têu ke tui-thi̍t; Ngài oi pâng-chhut kiam lòi-chhṳ̀ ngì-têu, mò-lun hó-ngìn fái-ngìn chhiòn-phu oi chhṳ̀ chhiang-chhiang. 4Ngài oi yung Ngài ke kiam chhṳ̀ ngìn, tui-nàm to-pet kûng-kit yit-chhiet ke ngìn. 5Só-yû ke ngìn chhiu voi tî, Ngài — Song-chú pâng-chhut kiam, yit-thin m̀-voi sû chón-lòi.

6“Ngìn-chṳ́ â, ngì oi tho-than, chhiong sông-sîm sṳt-mong ke ngìn; ngì oi chhai thai-chung mien-chhièn tho-than. 7Kì-têu mun ngì cho-má-ke tho-than, ngì chhiu lâu kì-têu kóng, ngì tho-than he yîn-vi thâng-tó fái sêu-sit. Yit thâng-tó ke fái sêu-sit, kì-têu chhiòn-phu voi sîm-kôn lon chhiang-chhiang, lióng-sú ngiôn-ngiôn, chhit-thèu pi̍t-pi̍t-chhat, mò pan-si̍t yúng-hi. Sṳ̀-kiên yit-to, châi-nan chhiu to!” Chṳ-kô ke Song-chú án-ngiòng siên-pu lé.

8Song-chú lâu ngài kóng: 9“Ngìn-chṳ́ â, ngì oi kóng yi-ngièn, oi lâu ngìn-mìn kóng, Ngài — Song-chú án-ngiòng kóng:

Yit-kî kiam, yit-kî tông-li hâu-kông ke kiam,

10nò-li yî-heu oi chhṳ̀ ngìn,

chhu̍t-kîm to voi hâu-kông chhiong ngiap-lang.

Ngài ke chṳ́-mìn m̀-thâng kín-ko, m̀-kiâng chit-fa̍t;

kì-têu ngióng-voi yû khoai-lo̍k nè#21:10 “Ngài ke chṳ́-mìn ... khoai-lo̍k nè” Hî-pak-lòi-vùn ke yi-sṳ mò chhîn-chhú.!

11Kiam yí-kîn chhu̍t-to kîm-kîm, cho-tet yung lé;

kiam yí-kîn nò-to li-li, cho-tet kâu-pûn chhṳ̀-ngìn ke ngìn lé.

12Ngìn-chṳ́ â, oi chhin-kieu chhin-hêm!

Liá he vi Ngài chṳ́-mìn nò-li ke kiam;

liá he vi Yî-set-lie̍t ke liâng-chhiu chhu̍t-kîm ke kiam.

Kì-têu lâu Ngài ke chṳ́-mìn voi khiung-ha pûn-ngìn chhṳ̀-sí.

Ngì voi chhie̍t-mong to chhùi sîm-kôn lé.

13Kháu-ngiam yit-thin voi lòi;

na-he Yù-thai-vòng ke méu-sṳ ke khièn-chhóng mò-thet lé,

yu ngióng-pân nè?#21:13 “Kháu-ngiam ... ngióng-pân nè?” ya-he yi̍t-cho “Ngài chhai kháu-ngiam Ngài ke chṳ́-mìn; na-he kì-têu m̀ fí-kói, châi-nan yit-thin voi lìm-to kì-têu.” Hî-pak-lòi-vùn ke yi-sṳ mò chhîn-chhú.”

Chṳ-kô ke Song-chú án-ngiòng siên-pu lé.

14“Só-yî, ngìn-chṳ́ â, ngì oi kóng yi-ngièn. Ngì oi phok-sú, liá-kî kiam chhiu voi kín chhiuk-ngìn. Liá he yit-kî chhṳ̀-ngìn ke kiam, voi sṳ́ ngìn chho̍k-kiâng ke kiam. 15Liá-kî kiam voi sṳ́ Ngài ke chṳ́-mìn sṳt-chṳ, tiet-tó. Ngài oi yung liá hâu-kông chhiong ngiap-lang, chún-phi chhṳ̀-ngìn ke kiam lòi-hak kì-têu ke sàng-sṳ. 16Tông-li ke kiam â, yù-chhai ngì chó-phién chhṳ̀ yu-phién chhṳ̀! Sióng-oi chhṳ̀ nai-vi, chhiu hiong nai-vi chhṳ̀ ko-hi. 17Ngài ya oi phok-sú, Ngài ke thai fat-khién chhiu voi so̍t-thet. Ngài — Song-chú án-ngiòng siên-pu lé.”

Pâ-pí-lùn-vòng ke Kiam

18Song-chú lâu ngài kóng-fa; Kì kóng: 19“Ngìn-chṳ́ â, ngì oi va̍k-chhut Pâ-pí-lùn-vòng tai kiam kûng-tá ke lióng-thiàu lu-sien; liá lióng-thiàu lu chhiòn-phu oi yung khiung-chak koet-kâ cho hí-tiám. Ngì oi chhai liá-thiàu lu fûn-chhâ ke só-chhai vi vòng sat-li̍p lu-phêu, 20yit-thiàu chṳ́-hiong Â-mùn-ngìn ke Lâ-pâ-sàng, yit-thiàu chṳ́-hiong Yù-thai, theu-to kiên-ku ke Yâ-lu-sat-lâng-sàng. 21Pâ-pí-lùn-vòng to fûn-chhâ lu-héu, khî chhai lu-phêu thèu-chhièn puk-koa. Kì yung chien cho-chhiâm lòi-chhû, khiù-mun kì ke ngiéu-siong, chhà-khon hien-chi thèu-sâng ke kôn. 22Kì chṳn-sú chhû-tó ke chien siá-tén ‘Yâ-lu-sat-lâng’. Liá he chṳ́-sṳ kì yit-thin oi hiong Yâ-lu-sat-lâng chhièn-chin. Kì oi chông-phi chhong-sàng ke chhùi-è, yung kì kûng-tá sàng-mùn; oi hí thú-tôi, chho kô-thòi, thai-sâng hêm ‘Chhṳ̀ â!’ 23Yâ-lu-sat-lâng-ngìn voi sióng liá puk-koa he phien-ngìn ke, yîn-vi kì-têu sṳt lâu Pâ-pí-lùn-ngìn li̍p-yok. Chúng-he Pâ-pí-lùn-vòng voi sṳ́ kì-têu ki-tet chhṳ-kâ só-fam ke chhui, yèn-heu chiông kì-têu chok-chéu. 24Liá chhiu-he Ngài — Chṳ-kô ke Song-chú kóng ke fa: Ngì-têu ke chhui-ko pûn-ngìn fat-hien lé. Tak-sà tû tî ngì-têu chhui-ngiak tông-chhûng, só-cho só-hàng chhiòn-phu hién-chhut chhui-ok. Ngì-têu yit-thin oi su chit-fa̍t; Ngài oi chiông ngì-têu kâu-pûn thi̍t-ngìn.

25“Ngì liá chit-ok kôi-sí ke Yî-set-lie̍t liâng-chhiu â, ngì ke sí-ngit to lé; ngì oi mien-tui chui-mî ke sṳ́m-phan. 26Ngài — Chṳ-kô ke Song-chú án-ngiòng siên-pu lé: Chiông ngì ke miên-liù lâu lî-mo nâ hâ-lòi â! Yit-chhiet pien chhiang-chhiang lé. Mò khièn-piang ke ngìn voi kô-sṳ̂n, thúng-chhṳ-chá voi pûn-ngìn súng hâ-thòi. 27Vang-thet lé, vang-thet lé, liá-sàng vang-thet lé. Tén-to Ngài só sién-lòi chit-fa̍t liá-sàng ke ngìn lòi-to, liá-sṳ chang voi fat-sên. Ke-sṳ̀ Ngài oi chiông liá-sàng kâu-pûn kì.”

Kiam lâu Â-mùn-ngìn

28“Ngìn-chṳ́ â, ngì oi kóng yi-ngièn; ngì oi siên-pu Ngài — Chṳ-kô ke Song-chú hiong vú-yu̍k Yî-set-lie̍t ke Â-mùn-ngìn kóng ke fa. Ngì oi lâu kì-têu kóng:

Chhṳ̀-ngìn ke kiam yí-kîn pâng chhut-lòi lé;

kiam yí-kîn chhu̍t-to kîm-kîm, hâu-kông chhiong ngiap-lang, oi chhṳ̀-ngìn lé.

29Ngì-têu só khon-tó ke yi-siong he hî-ká ke; ngì-têu só-kóng ke yi-ngièn he fâ-liâu. Ngì-têu chit-ok kôi-sí, ngì-têu ke sí-ngit to lé. Ngì-têu oi mien-tui chui-mî ke sṳ́m-phan. Kiam oi ka chhai ngì-têu ke kiáng-kîn lé.

30“Chiông kiam sû-ngi̍p tô-seu â! Ngài oi chhai ngì-têu ke ku-hiông — ngì-têu chhut-se ke só-chhai sṳ́m-phan ngì-têu. 31Ngài tông-at, oi chiông thai fat-khién hiong ngì-têu piang-to chhiang-chhiang. Ngài oi chiông ngì-têu kâu-pûn chhin chhàn-ngiûn ke ngìn chhṳ̀. 32Ngì-têu oi pûn fó sêu chhiang-chhiang. Ngì-têu ke hiet oi liù chhai pún-koet ke thú-thi song, mò-ngìn voi chai sióng-tó ngì-têu.” Song-chú án-ngiòng siên-pu lé.

Currently Selected:

Yî-sî-kiet Sû 21: THV12Rdb

Highlight

Copy

Compare