Yî-sî-kiet Sû 16

Mò Chûng-sîm ke Yâ-lu-sat-lâng

1Song-chú yu lâu ngài kóng-fa; 2Kì kóng: “Ngìn-chṳ́ â, ngì oi chṳ́-chhut Yâ-lu-sat-lâng só-cho ke sṳ he ngióng-pân khó-ok. 3Oi kóng, Chṳ-kô ke Song-chú tui Yâ-lu-sat-lâng án-ngiòng kóng:

“Kâ-nàm-ngìn ke thi he ngì ke ku-hiông; ngì chhai ke-vi chhut-se. Ngiâ-pâ he Â-mô-li-ngìn, ngiâ-mê he Het-ngìn#16:3 “Kâ-nàm-ngìn ... Â-mô-li-ngìn ... Het-ngìn”: Song-ti khon liá-têu ngìn he mò tho-tet, pai ngiéu-siong ke ngìn.. 4Ngì chhut-se ke sṳ̀, mò ngìn lâu ngì chién chhì-tai, sé-sṳ̂n, yung yàm chhu̍t sṳ̂n-thí, yung pu-é pâu hí-lòi. 5Ô-nga-é chhut-se ke sṳ̀ yin-kôi tet-tó ke cheu-ku, ngì yit-si̍t-é ya mò tet-tó. Ngì kiung hâ-lòi, mò ngìn siak ngì; fán-chón pûn-ngìn fit chhai yâ-ngoi.

6“Heu-lòi, Ngài tui ke-vi kîn-ko, khon-tó ngì chhai hiet-teu tú nuk-nuk thûng, chhiu lâu ngì kóng: Ngì sûi-yèn mân-sṳ̂n hiet, chúng-he ngì yit-thin oi sên-chhùn hâ-hi! 7Ngài yông-yuk ngì, chhiu-chhiong cheu-ku thièn-tú ke fâ-chhó. Ngì kín-lòi kín-thai, sàng-cho chhin-chiâng ke se-moi-é, nen-kû chhiam-chhiam thai, mô ya sâng chhut-lòi, hàn-he chhak-sṳ̂n lu-thí.

8“Ngài yu kîn-ko ke-vi, fat-hien ngì yí-kîn to thàm-chhìn sot-oi ke ngièn-ki. Ngài yung ngoi-sâm châ-tén ngì ke vû-sṳ̂n, lâu ngì fat-sṳ. Ngài — Chṳ-kô ke Song-chú lâu ngì li̍p-yok, ngì chhiu sàng-cho Ngài ke pû-ngiòng.

9“Heu-lòi, Ngài yung súi sé-thet ngì vû-sṳ̂n ke hiet, yu yung kám-lám-yù kò ngì ke sṳ̂n-thí. 10Ngài pûn ngì chok siu-fâ ke sâm, chok chhin-hó ke phì-hài, ya pûn ngì mà-sâ cho ke miâng-thèu-pha lâu sṳ̂-chhù cho ke ngoi-sâm. 11Ngài lâu ngì tá-pan, pûn ngì chû-pó — sú-ak, pha̍t-lien, 12phi-vàn, ngí-vàn, ya yung miên-liù tai chhai ngì thèu-nà-táng. 13Ngì tai kîm-ngiùn ke chông-sṳt-phín, chok siu-fâ ke mà-sâ ke sâm lâu sṳ̂-chhù ngoi-sâm. Ngì sṳ̍t chui-hó ke mien-fún cho ke piáng, phûng-thòng lâu kám-lám-yù. Mò-ngìn pí ngì kha-chiâng, ngì chhiu-chhiong vòng-heu án kô-kui. 14Yîn-vi Ngài — Chṳ-kô ke Song-chú sṳ́ ngì pien-to chhin-chiâng, ngì sâng-to án-chiâng ke miàng-sâng chhiu chhòn-to lie̍t-koet.

15“Ngì fán-chón li-yung chhṳ-kâ ke chiâng lâu miàng-sâng lòi-hàng kiên-yìm, fong-thong to lâu só-yû ko-lu ke ngìn kiêu-kiet. 16Ngì chiông chhṳ-kâ ke sâm-fu nâ-hi tá-pan pai sṳ̀n-mìn ke thi-fông, chhiong sṳ̀n-meu chhông-kî chhai ke-vi lâu tak-sà hàng kiên-yìm. Án-ngiòng ke sṳ yin-kôi mò fat-sên, ya yit-thin m̀-hó chai cho. 17Ngì nâ Ngài sung-pûn ngì ke kîm-ngiùn chû-pó hi tá-chho nàm-sin ke ngìn-kûng-é, yèn-heu lâu kì-têu hàng kiên-yìm. 18Ngì yung Ngài pûn ngì ke siu-fâ sâm-fu kâ chhai liá-têu ngiéu-siong sṳ̂n-song, yu chiông Ngài pûn ngì ke kám-lám-yù lâu hiông-liau hien-pûn kì-têu. 19Ngài — Chṳ-kô ke Song-chú pûn ngì ke liòng-sṳ̍t — song-tén mien-fún, kám-lám-yù, phûng-thòng, ngì nâ-hi cho chi-vu̍t hien-pûn ngiéu-siong, vi-tó oi tet kì-têu ke fôn-hí.

20“Ngì yu nâ ngì vi Ngài kiung ke chṳ́-ńg cho sên-ngì hien-pûn ngiéu-siong; ngì hàng liá-têu kiên-yìm, m̀-he séu-khó ke sṳ! 21Ngì hàn chhṳ̀-sí Ngài ke chṳ́-ńg cho sên-ngì hien-pûn ngiéu-siong. 22Ngì cho kî-ńg, cho ha-chhien ke sṳ, chhṳ-chhiùng m̀-sṳt fì-sióng chang chhut-se sṳ̀ chhak-sṳ̂n lu-thí, chhai hiet-teu tú nuk-nuk thûng ke chhìn-khóng.”

Yâ-lu-sat-lâng Chhiong Yìm-fu

23Chṳ-kô ke Song-chú yu kóng: “Ngì chhám lé! Voi tù-tó châi-nan lé! Ngì cho liá án-tô fái-sṳ yî-heu, 24yu chhai kiê-thèu hong-mî hí pai ngiéu-siong ke chhòng-só, pin chhai ke-vi mai-yìm. 25Ngì chhin-chiâng ke miàng-sâng pien-cho fái miàng-sâng; só-yû ko-lu ke ngìn, ngì tû lâu kì-têu hàng kiên-yìm, ye̍t lòi ye̍t li-hoi. 26Ngì lâu ke fong-thong ke lìn-sa Âi-khi̍p-ngìn soi khiung-táng mìn-chhòng; ngì yit-chhṳ̍t hàng kiên-yìm lòi ngiâ Ngài su-hi.

27“Só-yî, Ngài chhûn-sú lòi chit-fa̍t ngì, chhióng-chéu Ngài su-pûn ngì ke ên-tién. Ngài chiông ngì kâu-pûn yen-hen ngì ke Fî-li-sṳ-ngìn; kì-têu chhin-nâu ngì m̀-tî kien-seu ke hàng-vì.

28“Chúng-he, ngì hàn mò mân-chiuk, yu oi thèn Â-sut-ngìn chéu, cho kì ke chhìn-fu; chúng-he kì ya mò fap-thu mân-chiuk ngì ke yu̍k-mong. 29Só-yî ngì yu hi chhìm ke sông-ngia̍p koet-kâ Pâ-pí-lùn sṳ̂-thûng; ngì hàn-he mò mân-chiuk.”

30Chṳ-kô ke Song-chú án-ngiòng kóng: “Ngì ke sîm án phai-fái#16:30 “Ngì ke sîm án phai-fái” ya-he yi̍t-cho “Ngài tông-khién ngì”, Hî-pak-lòi-vùn mò chhîn-chhú.! Ngì chhiong m̀-tî kien-seu ke kî-ńg cho liá yit-chhiet ke fái-sṳ. 31Ngì chhai kiê-thèu hong-mî hí pai ngiéu-siong ke chhòng-só, chhai ke-vi hàng kiên-yìm. Chúng-he ngì m̀-he chhiong kî-ńg án-ngiòng vi kîm-chhièn lòi mai-sṳ̂n. 32Ngì he yìm-fu! Ngì kâm-ngien lâu ngoi-ngìn sṳ̂-thûng, mò oi chhṳ-kâ ke ló-kûng! 33Kî-ńg hiong ngìn thó ka-chhièn, ngì fán-chón sung lî-vu̍t thiap khie-kô; ngì pâ-kiet kì-têu, yín-yu kì-têu tui tak só-chhai lòi lâu ngì hàng kiên-yìm. 34Ngì lâu yit-pân kî-ńg tiên-to: Mò-ngìn pet ngì cho kî-ńg; ngì m̀ sû-chhièn, fán-chón chhut-chhièn thiap khie-kô. Ngì sṳ̍t-chhai lâu yit-pân kî-ńg tiên-to ô!”

Song-ti Sṳ́m-phan Yâ-lu-sat-lâng

35Só-yî, yìm-fu Yâ-lu-sat-lâng â, ngì oi thâng Song-chú só-kóng ke fa.

36Chṳ-kô ke Song-chú án-ngiòng kóng: “Ngì chhiong kî-ńg sâm-fu thot chhiang-chhiang, chiông chhṳ-kâ kâu-pûn ke-têu khie-kô lâu ngiéu-siong. Ngì chhṳ̀ chhṳ-kâ ke chṳ́-ńg, chiông kì-têu cho sên-ngì hien-pûn sià-ok ke ngiéu-siong. 37Só-yî, Ngài oi seu-si̍p ngì yî-chhièn ke khie-kô, mò-lun ngì só-oi só-nâu ke chhiòn-phu tiau-lòi. Ngài oi ham kì-têu tui tak só-chhai lòi, chiông ngì vì hí-lòi, yèn-heu chhai kì-têu mien-chhièn chiông ngì pok-to kông-kông, pûn kì-têu khon-tó ngì chhak-sṳ̂n lu-thí. 38Ngài oi chit-fa̍t ngì fam kiên-yìm lâu chhṳ̀-ngìn ke chhui, oi chhai thai fat-khién chṳ̂-ha phan ngì sí-hìn. 39Ngài oi chiông ngì kâu chhai kì-têu sú-chûng; kì-têu oi chhak-thet ngì pai ngiéu-siong, hàng kiên-yìm ke só-chhai, chhióng-chéu ngì ke sâm-fu lâu chû-pó, sṳ́ ngì ke vû-sṳ̂n kông-kông.

40“Kì-têu oi san-thung khiùn-chung nâ sa̍k-thèu te̍p-sí ngì, yung kiam chiông ngì to̍k-to mièn-mièn. 41Kì-têu oi piong-fó sêu ngì ke vuk-è, pûn kûi-khiùn ke fu-ngìn-kâ khon-tó ngì su hìn-fa̍t. Ngài oi sṳ́ ngì m̀-voi chai cho kî-ńg, m̀-voi chai thiap khie-kô. 42Án-ngiòng, Ngài ke su-hi chang voi sêu-thet, sîm-phìn hi-fò, mò chai fat-khién, ya mò chai chhit-tu. 43Yîn-vi ngì m̀ ki-tet ngì heu-sâng ke sṳ̀ Ngài ngióng-pân khoán-thai ngì, fán-chón cho liá-têu sṳ lòi ngiâ Ngài su-hi, só-yî Ngài án-ngiòng po-yin ngì. Ngì yí-kîn cho chhin-tô khó-vu ke fái-sṳ, cho-má-ke hàn-oi kâ-thiâm hàng kiên-yìm ke chhui-ok nè?” Chṳ-kô ke Song-chú án-ngiòng siên-pu lé.

Moi-é Chhiong Â-mê

44Song-chú kóng: “Yâ-lu-sat-lâng â, phe̍t-ngìn oi yung liá-ki siu̍k-ngî chṳ́-tén ngì kóng: ‘Yû án-ngiòng ke ôi-é chang voi kiung án-ngiòng ke moi-é!’ 45Ngì khok-sṳ̍t he ngiâ-mê ke moi-é, lâu kì khiung-yong; kì nâu chhṳ-kâ ke ló-kûng lâu chṳ́-ńg. Ngì ya chhiong ngiâ chí-moi, nâu chhṳ-kâ ke ló-kûng lâu chṳ́-ńg. Ngì lâu ngì ke-têu chí-moi sàng-sṳ chhiòn-phu he Het-ngìn â-mê lâu Â-mô-li-ngìn â-pâ kiung ke.

46“Ngì ke â-chí he Sat-mâ-li-â; kì lâu chû-vì ke chhûn-chông he chhai ngì ke pet-fông. Ngì ke ló-moi he Só-tô-mâ; kì lâu chû-vì ke chhûn-chông he chhai ngì ke nàm-fông. 47Ngì thèn kì-têu ke kiok-phu, ho̍k kì-têu khó-vu ke hàng-vì; ngì ho̍k la màng? M̀ tân-chhiang án-ngiòng! Ngì yit-chhiet só-hàng ke pí kì-têu hàn-kha chit-ok.

48“Ngài — Chṳ-kô ke Song-chú chṳ́-tén Ngài yún-yén ke sâng-miang fat-sṳ: Ngì ke ló-moi Só-tô-mâ lâu kì chû-vì ke chhûn-chông mò fam-ko ngì lâu ngì chû-vì ke chhûn-chông só-fam ke chhui-ok. 49Só-tô-mâ lâu kì ke moi-é mí-liòng chhûng-chiuk, ko ôn-lo̍k ke sên-fa̍t, chhiu kiêu-ngau hí-lòi, m̀ cheu-ku ke-têu khiùng-khú ke ngìn. 50Kì-têu kiêu-ngau, cho Ngài só yen-hen ke sṳ, só-yî Ngài chiông kì-têu sêu-me̍t. Liá he ngì só-tî ke.

51“Sat-mâ-li-â só-fam ke chhui-ok hàn-mò ngì só-fam ke yit-pan. Ngì só-cho ke pí kì só-cho ke hàn-kha fái. Ngì chit-ok ke chhàng-thu lâu ngì ke chí-moi lòi-pí, kì-têu hàn-son kha tân-sùn. 52Liá-ha ngì oi vi-tó chhṳ-kâ ke chhui-ok lòi su siû-yu̍k. Ngì fam ke chhui pí ngiâ chí-moi fam ke hàn-kha tet-ngìn-nâu, lâu ngì lòi-pí kì-têu chhiu kâ chhin tet-ngìn-siak. Ngì yin-kôi mien-fùng chi-cha, yîn-vi ngì sṳ́ ngiâ chí-moi lâu ngì lòi-pí kì-têu chhiu kâ chhin sùn-kiet.”

Só-tô-mâ lâu Sat-mâ-li-â Oi Fu̍k-hîn

53Song-chú tui Yâ-lu-sat-lâng kóng: “Ngài oi sṳ́ Só-tô-mâ lâu Sat-mâ-li-â pin chû-vì ke chhûn-chông chhùng-sîn fàn-yùng. Ngài ya oi sṳ́ ngì fu̍k-hîn hí-lòi, 54ngì chhiu voi tî kien-seu; ngì tù-tó ke siû-yu̍k voi sṳ́ ngì ke chí-moi kám-kok pí ngì kha hó. 55Kì-têu oi chhùng-sîn fàn-yùng; ngì lâu ngì chû-vì ke chhûn-chông ya oi fu̍k-hîn hí-lòi. 56-57Ngì ke chhui-ok màng pûn-ngìn fat-hien yî-chhièn, ngì tông kiêu-ngau ke-chham khì-kiên, ngì kám m̀-he sṳt nâ Só-tô-mâ lòi sâu-nat? Liá-ha ngì lâu kì khiung-yong; Yî-tûng-ngìn, Fî-li-sṳ-ngìn, lâu ngì chû-vì nâu ngì ke ngìn chhiòn-phu oi sâu-nat ngì. 58Ngì yit-thin oi vi-tó chhṳ-kâ ke fong-thong lâu só-cho ke fái-sṳ lòi tâm-tông yit-chhiet ke chit-ngim.” Song-chú án-ngiòng siên-pu lé.

Yún-yén ke Yok

59Chṳ-kô ke Song-chú án-ngiòng kóng: “Ngài oi cheu ngì ke hàng-vì po-yin ngì, yîn-vi ngì khiâng-khon fat-sṳ, vì-poi khie-yok. 60Chúng-he Ngài oi ki-ngiam ngì heu-sâng ke sṳ̀ Ngài lâu ngì só-li̍p ke yok, chhùng-sîn lâu ngì li̍p yún-yén ke yok. 61Ngì chiap-na̍p ngì ke chí-moi chón-lòi yî-heu, voi sióng-tó ngì só-hàng só-cho lòi kám-kok kien-seu. Sûi-yèn liá-khien sṳ mò pâu-hàm chhai yî-chhièn Ngài lâu ngì li̍p ke yok tî-poi, Ngài oi chiông kì-têu kâu-pûn ngì, cho ngì ke moi-é. 62Ngài oi chhùng-sîn lâu ngì li̍p-yok, ngì chhiu voi tî Ngài he Song-chú. 63Ngài oi sa-miên ngì só-fam só-yû ke chhui-ko, chúng-he ngì hàn-he voi sióng-tó liá-têu sṳ, kien-seu to m̀-kám chai kóng-fa.” Chṳ-kô ke Song-chú án-ngiòng siên-pu lé.

Currently Selected:

Yî-sî-kiet Sû 16: THV12Rdb

Highlight

Copy

Compare