GÉNESIS 43

Josepa wawqenkunaq Benjaminta pusasqanku

1Sinchipunin chay suyupi yarqay karqan, 2chaymi Egiptomanta trigo apamusqanku mikhuyta tukuspanku, taytankuqa paykunata nirqan:

—Kutiychis, hinaspa ñoqanchispaq rantimuychis as chhikan mikhuyta, nispa.

3Judataq kutichirqan:

—Chunkay-chunkaytan chay qhariqa rimapayawarqanku: Manan uyayta rikunkichischu manachus wawqeykichista qankunawan pusamunkichis chayqa, nispan. 4Wawqeykuta ñoqaykuwan kachaqtiykiqa risaqkun, hinaspan mikhuyta rantimpusqaykiku. 5Mana payta kachaqtiykiqa manan risaqkuchu, chay qharin niwarqanku: Manan uyayta rikunkichischu manachus wawqeykichista qankunawan pusamunkichis chayqa, nispan, nispa.

6Chaymi Israelqa nirqan:

—¿Imanaqtintaq kay mana allinta ruwaykuwankichis chay qhariman huk wawqeykichis kasqanta willaspa? nispa.

7Paykunataq kutichirqanku:

—Chay qhariqa allin-allintan tapuwarqanku ñoqaykumanta, hinallataq ayllunchismantapas: ¿Kawsashanraqchu taytaykichis? ¿Kanraqchu huk wawqeykichis? nispa. Chaymi chay simiman hina willarqayku. Manan yuyaykurqaykuchu: Wawqeykichista pusamuwaychis, nispa niwanankutaqa, nispa.

8Hinaqtinmi Judaqa taytan Israelta nirqan:

—Waynata pusachiway, rillasaqkuña, chay hinapi kawsananchispaq, qanpas wawaykupas. 9Ñoqan paymanta kutichipusqayki, ñoqatan manuchawanki, manataq kayman kutichimpusqaykichu chayqa, wiñaypaqmi huchallikuqniyki kasaq. 10Manachus tardaykuman karqan chayqa, iskay kutitapuniñan kutiykuman karqan, nispa.

11Hinan taytan Israelqa paykunaman kutichirqan:

—Chay hinataq chayqa, kay hinata ruwaychis: Kaymanta allinkaqta costalniykichispi chay runapaq aparikuychis, as chhikan balsamota, as chhikan miel misk'ita, q'apaqkunata, mirratawan, nuezkunata, almendrastawan. 12Apaychistaq wak qolqetawan, aparikullaychistaq costalniykichispa siminpi kutimuq qolqetapas, pantasqapaschá karqan.

13Pusarikullaychistaq wawqeykichistapas, hinaspa chay runaqta kutillaychisña. 14Tukuy-atiyniyoq Diostaq chay qhariwan khuyapayachisunkichis, Simeontapas kacharichimpuchun, hinallataq kay Benjamintapas. Mana churiyoq kanaychus kashan chayqa, chay hina kachun, nispa.

15Chaymi paykunaqa hoqarirqanku sumaq sonqotapas, kutimuq qolqetapas, rantinanku qolqetapas, hinallataq Benjamintapas pusarikuspa Egiptoman puririrqanku, chayaspataq Joseman asuykurqanku. 16Joseqa Benjaminta paykunatawan rikuspataq wasi mayordomonta nirqan:

—Chay runakunata wasiman pusay, paykunaqa ñoqawanmi chawpi p'unchayta mikhunqaku, chaypaq wakata nak'aspayki wayk'uy, nispa.

17Chaymi mayordomoqa ruwarqan Josepa nisqanta hina, paykunatan Josepa wasinman pusarqan. 18Hinan paykunaqa Josepa wasinman pusasqawan mancharikuspa nirqanku:

—Ñawpaq kuti costalninchispi qolqenchista kutichipuwasqanchisraykun kayman pusamuwanchis. Trampata churawaspanchismi kamachipaq hap'iwasun, ñoqanchistapas asnonchiskunatapas, nispa.

19Hinaspanmi asuykurqanku Josepa wasi mayordomonman, wasi punkupin payta rimapayarqanku:

20—Ay, wiraqochayku, ñoqaykuqa ñawpaq kutita mikhuna rantikuqpunin hamurqayku, 21qorpachakunaman chayaspayku costalniykuta paskariqtiykutaqmi, sapankaq qolqeyku kapushasqa costalniykuq siminpi iman kaqlla, chaytan kutichimpushayku. 22Apamullaykutaqmi wak qolqetapas mikhuyta rantikunaykupaq, ñoqaykuqa manan yachaykuchu pichus qolqeykuta costalniykuman churaykusqanta, nispa.

23Paytaq paykunaman kutichirqan:

—Sonqoykichis tiyaykuchun, ama mancharikuychischu. Diosniykichis taytaykichispa Diosninchá qhapaq-kayta costalniykichispi qorqasunkichis, ñoqaqa chaskirqanin qolqeykichista, nispa.

Hinaspanmi Simeonta paykunaman horqomuspa, 24paykunata Josepa wasinman pusarqan. Unutataq paykunaman qorqan, hinan chakinkuta maqchikurqanku, asnonkumanpas qarallarqantaq. 25Paykunataq chawpi p'unchayta Josepa hamunankama sumaq sonqota wakichirqanku, uyarirqankun chaypi mikhunankuta.

26Wasiman José hamuqtintaq, paykunaqa payman apamurqanku chay sumaq sonqota, hinaspanmi payman pampakama k'umuykurqanku. 27Hinaqtinmi Joseqa paykunata tapurqan imaynachus kashasqankuta, hinaspa nirqan:

—Willawasqaykichis yuyaq taytaykichisri, ¿allillanchu kashan? ¿Kawsashanraqchu? nispa.

28Paykunataq kutichirqanku:

—Allillanmi kashan kamachiyki taytaykuqa, kawsashanraqmi, nispa. Hinaspanmi k'umuykukurqanku, qonqorikurqanku.

29Josetaq qhawarispa wachaymasin wawqen Benjaminta rikurqan, hinaspa nirqan:

—¿Kaychu sullk'a wawqeykichis, pimantachus willawasqaykichis? nispa. Hinaspataq payta nirqan:

—Dios saminchasunki, churilláy, nispa.

30Hinan Joseqa waqanayarqan wawqenmanta sonqon “phoq” nisqanrayku, chaymi maskharqan maypichus waqananpaq, puñunan wasita haykuspataq chaypi waqaykurqan. 31Uyanta maqchikuspataq lloqsimurqan, hinaspan sonqonpi mukikurqan, nirqantaq:

—Mikhuyta qaramuychis, nispa.

32Paypaqtaq wakpi churarqanku, wawqenkunapaqtaq sapaqpi, paywan mikhuq Egipto runakunapaqpas wakllapitaq. Egipto runakunaqa manan Hebreo runakunawan mikhuyta munaqkuchu, chayqa Egipto runakunapaqqa millakuymi kaq. 33Josetaq wawqenkunata ñawpaqenpi tiyaykachirqan kuraktaqa kurak kasqanman hina, sullk'atapas sullk'a kasqanman hina, chaymi paykunaqa qhawanakuspanku, utirayarqanku. 34Josetaq ñawpaqenmanta mikhunata haywachirqan, Benjaminpa mikhunantaq askhallaña karqan, manataq mayqenninkuqpas chay hinachu karqan. Hinaspan paywan ukyarqanku machanankukama.

Currently Selected:

GÉNESIS 43: QC88

Highlight

Copy

Compare