GÉNESIS 42

Josepa wawqenkunaq Egiptoman chayasqanku

1Jacobmi Egiptopi mikhuna kasqanta yachaspa, churinkunata nirqan:

—¿Imanaqtintaq qhawanakushallankichis? 2Ñoqan uyarini Egiptopi trigo kasqanta, riychis haqayta, hinaspa rantimuychis kawsananchispaq, amataq wañusunchu, nispa. 3Chaymi Josepa chunka wawqenkunaqa Egiptota rirqanku trigo rantikuq, 4ichaqa manan Jacobqa kacharqanchu Josepa wawqen Benjaminta wawqenkunatawan, nirqanmi: Paqtan imapas payta sucedenman, nispa. 5Israelpa churinkunataq riqkunawan kuska rantikuq rirqanku, yarqaymi Canaán suyupipas karqan.

6Josetaq chay suyupi kamachikuq karqan, paymi chay suyu llapa runakunaman venderqan. Hinan Josepa wawqenkunaqa chayarqanku, hinaspanmi payman pampakama k'umuykukurqanku. 7Josetaq wawqenkunata rikuspa reqsirqorqan, ichaqa paykunata mana reqsiq tukuspanmi k'arak simiwan rimapayarqan:

—¿Maymantataq hamunkichis? nispa.

Paykunataq kutichirqanku:

—Canaanmantan hamuyku mikhuyta rantikunaykupaq, nispa.

8Joseqa reqsirqanmi wawqenkunata, paykunataq ichaqa mana payta reqsirqankuchu. 9Chaymi Joseqa yuyarirqan paykunamanta mosqokusqankunata, hinaspan paykunata nirqan:

—Qhamiyaqmi kankichis, suyupi mana hark'asqa cheqasta qhawaraqmi hamunkichis, nispa.

10Paykunataq payman kutichirqanku:

—Manan, wiraqochayku, aswanpas kamachiykikunaqa mikhuyta rantikuqmi hamuyku. 11Llapallaykun ch'ulla qhariq churinkuna kayku, honrado runakunan kayku, manan hayk'aqpas qhamiyarqaykuchu, nispa

12Josetaq ichaqa paykunata nirqan:

—Manan, suyupi mana hark'asqa cheqasta qhawaqmi hamunkichis, nispa.

13Paykunataq kutichirqanku:

—Kamachiykikunaqa chunka iskayniyoq wawqekunan kayku, Canaán suyupi tiyaq qhariq churinkuna, sullk'akaqqa kunan taytaykuwanmi kashan, hukkaqtaqmi mana kapunchu, nispa.

14Josetaq paykunata nirqan:

—¡Chaypunin chaytaqa niykichis! Qhamiyaqkunapunin kankichis, 15kaypin reqsichikunkichis: Faraonpa sutinpin jurani, manan kaymanta lloqsinkichischu sullk'a wawqeykichis hamunankama. 16Hukniykichista kachaychis wawqeykichista pusamunanpaq, qankunataq preso qhepaychis. Hinan yachakunqa rimasqaykichisqa cheqaqpuni kasqan, mana chayqa, Faraonpa sutinpin jurani, qhamiyaqmi kankichis, nispa.

17Hinaspanmi huñullata carcelman churarqan kinsa p'unchaypaq. 18Kinsakaq p'unchaypitaq Joseqa paykunata nirqan:

—Ñoqaqa Diostan manchakuni. Kayta ruwaychis, chaymi kawsankichis: 19—Honrado runakuna kankichis chayqa, huknin wawqeykichis carcelpi preso qhepachun, qankunataq riychis, trigota apaychis wasiykichispi kaqkuna mikhunanpaq. 20Pusamuwankichismi sullk'a wawqeykichista, chaypin simiykichis cheqaqchasqa kanqa, chaymi mana wañunkichischu, nispa.

Paykunataq hinata ruwarqanku, 21ninakurqankutaq:

—Cheqaqtapunin wawqenchis contra huchallikurqanchis, rikurqanchismi riki sonqonpa sinchi llakikusqanta, pituchakushawaqtinchispas manan payta kasurparirqanchischu, chaymi kay sinchi llakikuyqa qatiwanchis, nispa.

22Hinaqtinmi Rubenqa paykunata nirqan:

—¿Manachu qankunata rimapayarqaykichis: Ama wayna contra huchallikuychischu, nispa? Manataq kasukurqankichischu. Kunanqa wañusqanmantan llakipi rikukushanchis, nispa.

23Paykunaqa manan yacharqankuchu Josepa paykunata entiendesqanta, wawqenkunawan rimashaqtin simi t'ikraq kasqanrayku. 24Josetaq paykunamanta anchhurirqan, hinaspan waqarqan. Chaymanta paykunaman kutimurqan, hinaspa rimapayarqan, chaymantataq paykuna ukhumanta Simeonta hap'ispa rikushaqtinku watachirqan. 25Hinaspataq kamachirqan costalninkuman trigota hunt'achinankupaq, hinaspa sapankaman qolqenkuta kutichipunankupaq costalninkuman churaykuspa, ñanpaqpas mikhunata qonankupaq. Ahinataq paykunapaq ruwasqa karqan. 26Hinan paykunaqa trigonkuta asnonkuman cargaykuspa chaymanta ripurqanku.

27Hukninkutaq qorpachanapi asnonman qarananpaq costalninta kicharispa, costalnin simipi qolqenta tarirqan. 28Hinaspan wawqenkunata nirqan:

—¡Qolqeyta kutichipuwasqa! ¡Kayqa costalniypin kashan! nispa.

Hinaqtinmi mancharikurqanku, khatatataspataq ninakurqanku:

—¿Imatataq Diosri kayta ruwawanchis? nispa.

29Canaán suyuman chayaspataq tukuy imaymana paykunata sucedesqanta taytanku Jacobman willarqanku:

30—Chay suyu kamachikuqmi k'arak simiwan rimapayawarqanku, suyu qhamiyaqta hinataq hap'iwarqanku. 31Ñoqaykutaq payman nirqayku: Honrado runakunan kayku, manan hayk'aqpas qhamiyarqaykuchu. 32Chunka iskayniyoq wawqen kayku, huk taytallayoq: Hukninmi mana kapunchu, sullk'akaqtaq kunan taytaykuwan Canaán suyupi kashan, nispa. 33Hinan chay kamachikuqqa niwarqanku: Kaypin yachasaq honrado runakuna kasqaykichista: saqewaychis huknin wawqeykichista, wasiykichispi kaqkuna mikhunanpaqtaq trigota apaychis. 34Sullk'a wawqeykichistataq pusamuwaychis mana qhamiyaqkunachu aswanpas honrado runakuna kasqaykichista yachanaypaq. Ahinapin wawqeykichista kacharipusqaykichis, kay suyupitaq purikullankichis, nispa, nispanku.

35Costalninkuta paykuna tallishaqtinkutaq sapankaq costalninpi rikhurirqan qolqe khipunku, hinan paykunapas taytankupas qolqe khiputa rikuspa mancharikurqanku. 36Hinan taytanku Jacobqa paykunata nirqan: —Wawaykunata qechupuwankichis: José mana rikhuripunchu, manallataq Simeonpas, Benjamintapas qechupushallawankichistaq, ¡lliw kaykunaqa contraypin! nispa.

37Chaymi Rubenqa taytanta nirqan:

—Mana Benjaminta kutichimpuqtiyqa iskaynin churiyta wañuchinki. Pusachillaway, ñoqan kutichimpusqayki, nispa.

38Paytaq nirqan:

—Manan churiyqa qankunawan rinqachu, wawqenpas wañupunña, pay sapallanña qhepan. Purisqaykichis ñanpi imaynapas pay kaqtinqa, sinchi llakikuymi kay machutaña wañuchiwanqa, nispa.

Currently Selected:

GÉNESIS 42: QC88

Highlight

Copy

Compare