GÉNESIS 41

Faraonpa mosqokusqanta Josepa sut'inchasqan

1Iskay wataña pasaqtintaq Faraonqa mosqokurqan, payqa Nilo mayu patapi hina sayashasqa. 2Mayumanta lloqsishasqa qanchis wira wakakuna llusk'araq, hinaspa q'achu-q'achupi mikhushasqaku. 3Chaykuna qhepatataq mayumanta lloqsimusqa qanchis millay toqti wakakuna, hinaspan sumaq wakakunaq qayllanpi mayu patapi sayaykusqaku. 4Hinaspanmi millay toqti wakakunaqa oqoykusqaku chay qanchis llusk'a wira wakakunata.

Faraontaq rikch'arirqan. 5Wakmanta puñuykurqan, hinaspa iskaykaq kutipi mosqokurqan: Qanchis trigo uma rurusapataq sumaqta wiñashasqa ch'ulla tullullapi. 6Chaykuna qhepatataq lloqsisqa wak qanchis trigo umakuna ch'usukama rupha wayraq naq'echisqan. 7Chay qanchis ch'usu trigo umataq oqoykusqa chay qanchis trigo uma sumaqkaq rurusapata.

Hinaspan Faraonqa rikch'arirqan, chayqa mosqoyllataq kasqa. 8Tutamantataq hawan ukhun sonqoyoq karqan, hinaspan waqyachimurqan Egiptopi llapan watuqkunata, llapan yachayniyoqkunatawan. Hinaspanmi Faraonqa paykunaman willarqan mosqokusqankunata, ichaqa manan pipas karqanchu chaykunata Faraonpaq sut'inchaq. 9Hinaqtinmi copa haywaqkunata kamachiqqa Faraonta nirqan:

—Kunanmi huchaykunata yuyarini. 10Maypachachus qanqa kamachiykikunapaq phiñakurqanki, guardia umalliq wasinmantaq presota apachiwarqankiku ñoqata hinallataq t'anta ruwaqkunata kamachiqtapas. 11Chaypachan paywan ñoqawan kasqan tutalla mosqokurqayku, sapanka mosqoytaq sut'inchanayoqkama karqan. 12Chaypin ñoqaykuwan kasharqan huk hebreo wayna, guardia umalliq kamachin. Paymanmi chayta willarqayku, paytaq mosqokusqaykuta sut'inchapuwarqanku, hinaspan sapankaman imachus kasqanta willawarqanku. 13Chaymi paypa chaykunata sut'inchapuwasqankuman hina karqan:

Ñoqa llank'anayman waqyasqa kapurqani, hukkaqtaq seq'osqa kapurqan, nispa.

14Chaymi Faraonqa Joseta waqyachimurqan. Hinan usqhaylla carcelmanta horqomurqanku, sunkhantapas k'isukuspataq wak p'achawan p'achakurqan, hinaspataq hamurqan. 15Chaymi Faraonqa Joseta nirqan:

—Ñoqan mosqokuni, manataq pipas kanchu chayta sut'inchananpaq, chaypas qanmanta willakuqtan uyarini, mosqokusqakunatas uyarinki, hinas chaykunata sut'inchanki, nispa.

16Josetaq Faraonta nirqan:

—Manan imapaschu kani, Diosmi qanmanqa willasunki sonqoyki tiyaykunanpaq, nispa.

17Chaymi Faraonqa Joseman willarqan:

—Mosqoyniypin Nilo mayu patapi hina kashasqani, 18hinan mayumanta lloqsimushasqa qanchis llusk'a wira wakakuna, hinaspan q'achu-q'achupi mikhushasqaku. 19Chaykuna qhepatataq qanchis millay toqti wakakuna lloqsimushasqa, sinchi tullu, manan chaykuna hina millayta rikurqanichu Egiptontinpipas. 20Chay toqti wakakunataq oqoykushasqaku ñawpaqkaq qanchis wira wakakunata. 21Chaykuna oqoykusqankutaq mana reparakusqachu, chay toqtikunaqa millayraqmi ñawpaq hina rikhuripusqaku.

Hinaspan rikch'arirqani. 22Mosqokuspay rikullarqanitaq, qanchis trigo uman wiñasqa ch'ulla tullullapi, rurusapataq sumaqtaq. 23Hinallataq qanchis trigo uma, ch'usu, ch'akisqa, rupha wayraq naq'echisqantaq chaykuna qhepata wiñasqa. 24Hinaspanmi ch'usu trigo umaqa oqoykusqa qanchis sumaq umakunata. Chaytan willaniña watuqkunaman, manataqmi pipas kanchu chayta sut'inchanawanpaq, nispa.

25Hinaqtinmi Joseqa Faraonman kutichirqan:

—Mosqokusqaykiqa kaqkamallan, Diosmi imatachus ruwananta rikuchirqasunki. 26Qanchis sumaq wakakunaqa qanchis watan, qanchis sumaq trigo umakunapas qanchis watan, mosqoyqa kaqkamallan. 27Qhepankuta lloqsimuq qanchis millay toqti wakakunapas qanchis watan, chay qanchis trigo uma ch'usukama, rupha wayraq naq'echisqanqa, qanchis wata yarqay kananmi. 28Kaqllatan qanman willayki, Diosmi imatachus ruwananta rikuchirqasunki. 29Egiptontinpin qanchis wata askhallaña mikhuy kanqa, 30chaykuna qhepatataq qanchis wata yarqay kanqa. Chaymi askhallaña mikhuypa kasqanqa Egipto suyupi qonqasqa kanqa, suyuntintataq yarqayqa hasut'inqa. 31Chay askhallaña mikhuypa kasqanqa manan reparakunqachu qhepanta yarqay kasqanrayku, chay yarqayqa sinchipunin kanqa. 32Iskay kutita mosqokusqaykiqa willakun Diospa cheqaqtapuni yuyaykusqantan, hinallataq Diosqa usqhayllata chayta hunt'anantawan.

33Chayrayku kunan yuyaychayki huk yuyayniyoq yachayniyoq qharita maskhanaykipaq, hinaspa Egipto suyupi churanaykipaq. 34Kaytapas ruwallaytaq, suyuntinpi kamachikuqkunata churay, qanchis wata askha cosechamantataq Egipto suyupi phisqakaq parteta t'aqachiy. 35Hinaspa kay hamuq allin watakunapi llapa mikhuyta huñuchunku, kamachisqaykitaq trigota churachunku llaqtakunapi mikhuna kananpaq, hinaspataq waqaychachunku. 36Chay mikhuytaq waqaychakuchun hatun suyupaq, Egipto suyupi qanchis wata yarqay kanqa chaypaq, chaymi hatun suyuqa mana yarqaypi wañunqachu, nispa.

Josepa Egiptopi kamachikuq kapusqan

37Chay yuyaychaytataq allinpaq hap'irqan Faraonqa hinallataq oficialninkunapas, 38hinaspan Faraonqa paykunata nirqan:

—¿Kay runata hina huktari tarisunmanchu? Dioskunaq espiritunmi paypiqa kashan, nispa.

39Hinaspanmi Faraonqa Joseta nirqan:

—Diosmi lliw chaykunata yachachisunki, manan kanchu qan hina yuyayniyoqpas yachayniyoqpas. 40Qanmi wasiypi kamachikunki, kamachikusqaykitataqmi llapa runay kasusunki, qhapaq tiyanallapin ñoqaqa qanmanta kurak kasaq. 41Qhawariy, ñoqan churayki Egipto suyuntinpi kamachikunaykipaq, nispa.

42Hinaspanmi Faraonqa makinmanta selloyoq anillonta horqokuspa chayta Josepa makinman churaykurqan, hinaspataq p'achachirqan sinchi fino lino p'achawan, kunkanmantaq walqaykurqan huk qori walqata. 43Chaymantataq wichachirqan iskaykaq carretanman, hinaspa ñawpaqenpi waqyakurqanku: ¡Qonqorikuychis! nispa. Chhaynatan Egipto suyuntinpi churarqan.

44Hinaspataq Faraonqa Joseta nirqan:

—Ñoqan Faraón kani, mana qanwanqa Egipto suyuntinpi manan pipas kuyurinqachu, nispa.

45Faraontaq Joseta suticharqan Zafnat-paneata, hinaspanmi payta casarachirqan On llaqta sacerdote Potiferaq ususin Asenatwan. Hinamantataq Joseqa Egipto suyuntinta purirqan. 46Joseqa kinsa chunka watayoqmi karqan Egipto rey Faraonpa qayllanman pusasqa kashaspa.

Josemi Faraonpa qayllanmanta lloqsirqan, hinaspanmi Egipto suyuntinta purirqan. 47Chay qanchis allin watapitaq mikhuyqa askhallataña rururqan. 48Chaymi payqa huñurqan qanchis watantin mikhuyta, Egipto suyupi ruruqta, hinaspan mikhuyta llaqtakunapi waqaycharqan, muyuriqnin campo mikhuyta sapanka llaqtapi churachispa. 49Josemi trigota huñurqan mama qocha aqota hina, sinchi askhata mana yupay atinakama, manañan yuparqankuñachu.

50Josepaqtaq nacerqan iskay wawa manaraq ñawpaqkaq wata yarqay chayamushaqtin, chaykunatan On llaqta sacerdote Potiferaq ususin Asenat paypaq wachakurqan. 51Josemi phiwi churinta suticharqan Manasesta#Kay sutin Hebreo rimaypi “qonqachiy” simiman rikch'akun., nirqanmi: Diosmi qonqachipuwan lliw muchuyniyta, taytaypa lliw aylluntapas, nispa. 52Hukkaqtataq suticharqan Efrainta#Kay sutin Hebreo rimaypi “mirachiy” simiman rikch'akun., nirqanmi: Diosmi mirachiwan llakikusqay hallp'api, nispa.

53Chay hinatan Egipto suyupi kaq askhallaña ruruy qanchis wata hunt'akurqan, 54hinaspan qanchis wata yarqay rikhurimurqan, Josepa ñawpaqmanta willakusqanman hina. Llapa suyukunapin yarqay karqan, Egipto suyuntinpin ichaqa mikhuy karqan. 55Egipto runakunaqa mikhunanku tukukapuqtintaq, Faraonman mikhunata mañakuspa qaparirqanku. Faraontaq llapa Egipto runakunata nirqan:

—Joseman riychis, hinaspa ruwaychis imatachus pay nisunkichis chayta, nispa.

56Yarqaytaq karqan tukuy suyuntinpi, chaymi Joseqa kicharirqan llapa taqe wasikunata, hinaspan trigota Egipto runakunaman venderqan, Egipto suyupiqa sinchipunin yarqayqa karqan. 57Hinantinmantan Egiptoman hamurqanku Josemanta rantikuq, hinantin pachapi sinchi yarqay kaqtin.

Currently Selected:

GÉNESIS 41: QC88

Highlight

Copy

Compare