GÉNESIS 40
40
1Chaymantataq Egipto reypa copan haywaqpiwan t'anta ruwaqninpiwan huchallikurqanku reyninku contra. 2Chaymi rey Faraonqa phiñakurqan chay iskay oficialninkunapaq, copa haywaqkunata kamachiqpaq t'anta ruwaqkunata kamachiqpaqwan. 3Hinaspan guardia umalliq wasinman paykunata presota apachirqan Josepa preso kasqan carcelman. 4Guardia umallitaq Joseman paykunata entregarqan, hinan Joseqa paykunata servirqan, carcelpitaq unayña kasharqan.
5Copa haywaqtaq t'anta ruwaqpiwan kaq tutapikama carcelpi mosqokurqanku, sapankanku sut'inchanayoqtakama. 6Tutamanta José paykunaman hamuspa qhawariqtintaq, llakisqa kasharqanku. 7Hinan payqa patronninpa wasinpi preso-masinkunata tapurqan:
—Kunanri, ¿imanaqtintaq llakisqa kashankichis? nispa.
8Paykunataq kutichirqanku:
—Mosqokuykun, manan pipas kanchu chayta sut'inchapuwanankupaq, nispa.
Hinan Joseqa paykunata nirqan:
—Diosmi chaykunataqa sut'inchayta atin. Chay hinaqa chay mosqokusqaykichista willawaychis, nispa.
9Hinaqtinmi copa haywaqkunata kamachiqqa Joseman willarqan mosqokusqanta:
—Ñoqan mosqokuspa rikurqani uvas yurata ñawpaqeypi kashaqta, 10chay uvas yurapitaq kinsa k'allmata. Chay yurataq mukmuspa t'ikasqa, hinaspataq k'allmankunaqa uvasta ruruspa poqochisqa. 11Faraonpa copantataq hap'ishasqani, hinaspataq uvasta hap'ispa copaman ch'arwashasqani, hinaspa Faraonman copata haywashasqani, nispa.
12Chaymi Joseqa payta nirqan:
—Kaymi sut'inchayninqa: Kinsa k'allmaqa kinsa p'unchaymi. 13Kinsa p'unchaymantan Faraonqa horqochisunki, hinaspa llank'anaykiman kutichipusunki, chaymi copanta haywanki, imaynan copa haywaqnin kashaspayki haywallaqpuni kanki hinata. 14Yuyarikuwankipuni, chay hina allinpi kaspayki, khuyapayaykuwankipuni, Faraonman ñoqamanta willarinki, hinaspa kay wasimanta horqowanki, 15Hebreo runakunaq llaqtanmantan suwamuwarqanku, ichaqa manan kaypi ima mana allintapas ruwarqanichu carcelman churawanankupaq, nispa.
16Allinpaq sut'inchasqanta uyarispataq t'anta ruwaqkunata kamachiqqa Joseman nirqan:
—Ñoqapas mosqokullarqanitaqmi, yuraq t'antantin kinsa canastachakunatan umay patapi rikushasqani. 17Patakaq canastachapitaq kashasqa imaymana rikch'aq pastel mikhunakuna Faraonpaq, hinan phalaq animalkunaqa mikhurashasqaku umay patapi canastachamanta, nispa.
18Hinan Joseqa kutichirqan:
—Kaymi sut'inchaynin: Kinsa canastachakunaqa kinsa p'unchaymi. 19Kinsa p'unchaymantan Faraonqa horqochisunki, hinaspa seq'onapi warkusunki, phalaq animalkunataq aychaykita mikhunqa, nispa.
20Kinsa p'unchaymantataq Faraonqa nacesqanta p'unchayakurqan, chaypin reyqa llapan oficialninkunaman hatun mikhunata haywarqan. Hinaspan copa haywaqkunata kamachiqta t'anta ruwaqkunata kamachiqtapas oficialninkunaq qayllanman pusachimurqan. 21Hinaspan copa haywaqkunata kamachiqta llank'ananman waqyachipurqan, chaymi payqa Faraonman copata haywapurqan. 22T'anta ruwaqkunata kamachiqtataq ichaqa seq'ochirqan, Josepa sut'inchasqanman hina. 23Copa haywaqkunata kamachiqtaq Joseta mana yuyaripurqanchu, aswanpas payta qonqapurqan.
Currently Selected:
GÉNESIS 40: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
