GÉNESIS 39
39
Josewan Potifarpa warminwan
1Egiptoman José apasqa kaqtintaq, chayman apaq Ismael runakunamanta Egipto qhari Potifar rantikurqan, payqa Faronpa oficialnin guardia umallin karqan. 2Señor Diostaq Josewan karqan, chaymi Joseqa patronnin Egipto runaq wasinpi allillanpuni kasharqan. 3Hinaqtinmi patronninqa repararqan paywan Señor Diosqa kasqanta, paypa ima ruwasqantapas Señor Diosqa allinyachisqantawan. 4Ahinatan Joseqa munachikurqan, Potifarpa yanapaqnintaq karqan, paytaq wasin mayordomota churarqan, hinaspan lliw kaqninkunata qhawaqta churarqan. 5Wasintapas lliw kaqnintapas payman hap'ichisqanmantapachataq, Señor Diosqa Joserayku Egipto runaq wasinta samincharqan, wasinpi kaqtapas campopi kaqtapas. 6Chaymi Joseman hap'ichirqan tukuy kaqninta, pay kaqtinqa manan imatapas yuyarqanñachu aswanpas mikhunallanpiña.
Josemi karqan munay uyayoq munay siklla. 7Chaymantataq patronanqa qhawapayarqan Joseta, hinaspanmi nirqan:
—Ñoqawan puñuy, nispa.
8Josetaq mana munarqanchu, hinaspan patronanta nirqan:
—Qhawariy, patronniyqa manan ñoqamanta cuidakunchu wasinpi kaqmanta, lliw imaymanantataq hap'ichiwanpas. 9Manan kay wasipi ñoqamanta aswan atiyniyoq kanchu, manataq imatapas hark'awanchu ichaqa qanllata, warmin kasqaykirayku. ¿Imaynan kay sinchi mana allintaqa ruwayman, hinaspa Dios contraqa huchallikuyman? nispa.
10Sapa p'unchayña payqa ladonpi siriykunanpaq Joseta rimapayashaqtinpas, manan Joseqa paywan puñunanpaq uyarirqanchu. 11Huk p'unchay Joseqa wasiman llank'aq haykurqan, manataq wasipi kaqkuna pipas chaypi karqanchu. 12Hinan warmiqa p'achanmanta hap'irqan:
—Ñoqawan puñuy, nispa.
Hinaqtinmi payqa warmiq makinpi p'achanta saqerparispa phawaylla ayqerikurqan. 13Warmitaq makinpi p'achanta saqerparisqanta hinallataq hawaman ayqesqanta rikuspa 14waqyakurqan wasipi kaqkunata, hinaspa paykunata nirqan:
—Qhawariychis, hebreo runata pusamuwanchis burlakuwananchispaq. Paymi hamuwan ñoqawan puñunanpaq, ñoqataq kunkayoqta qaparini, 15chaymi waqyakusqaywan qaparisqaywan p'achanta qayllaypi saqerparispa phawaylla ayqerikun, nispa.
16Hinaspanmi payqa qayllanpi churaykurqan Josepa p'achanta qosan wasiman hamunankama.
17Hinaspataqmi payqa willarqan chay kikin simikunallatataq: Pusamuwasqaykiku kamachi hebreo hamuwan burlakuwaqniy. 18Ñoqa waqyakuqtiy qapariqtiy payqa qayllaypi p'achanta saqerparispa hawaman ayqerikun. 19Chay hinata kamachiyki ruwawan, nispa.
Hinan payqa willasqan simita uyarispa mayta phiñakurqan. 20Hinaspan patronninqa Joseta hap'ispa carcelman churarqan, reypa presonkunaq kasqanman. 21Señor Diosmi ichaqa Josewan karqan, hinaspan payta khuyapayarqan, munachillarqantaq cárcel alcaidewanpas. 22Cárcel alcaidetaq Joseta churarqan chay carcelpi llapa presokunata qhawananpaq, chaypi ima ruwanatapas pay ruwaq. 23Cárcel alcaideqa manaña imatapas qhawarqanchu Josepa makinpi kaqkunata, Señor Diospa Josewan kasqanrayku. Paypa imapas ruwasqantaqa Señor Diosmi allinyachiq.
Currently Selected:
GÉNESIS 39: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
