GÉNESIS 38

Judawan Tamarwan

1Chay tiempopin Judaqa wawqenkunamanta t'aqakurqan, hinaspan Hira sutiyoq Adulam qhariqta tiyaq rirqan: 2Chaypin Judaqa Shua sutiyoq Canaán runaq ususinwan tuparqan, chay warmiwantaq casarakurqan. Hinaspan chay warmiwan puñurqan, 3paytaq wiksallikuspan huk qhari wawata wachakurqan, suticharqantaq Erta. 4Wiksallikullarqantaq yapamanta, hinaspa huk qhari wawata wachakurqan, suticharqantaq Onanta. 5Wiksallikullarqantaq huktawan, hinaspan huk qhari wawata wachakurqan, suticharqantaq Selata. Wachakushaqtintaq Judaqa Kezibpi kasharqan.

6Chay qhepatataq Judaqa casarachirqan phiwi churin Erta Tamar sutiyoq warmiwan. 7Judapa phiwi churin Ertaq ichaqa mana Señor Diospa sonqonpaq hinachu kawsarqan, chaymi Señor Diosqa payta wañuchipurqan. 8Chaymi Judaqa Onanta nirqan:

—Wawqeykiq viudanwan casarakuy, paywan cuñado-kayniykita hunt'ay, hinaspa wawqeykipaq churiyapuy, nispa.

9Onantaq mana paypaqchu wawaqa kananta yachaspa, wawqenpa viudanwan sapa kuti hukllachakushaspa mana wiksallikunanta munaqchu, wawqenpaq mana churiyapunanrayku. 10Chay ruwasqantaq Señor Diospaq mana chaninchu karqan, chaymi Señor Diosqa paytapas wañuchipullarqantaq. 11Judami qhachunin Tamarta nirqan:

—Taytaykiq wasinpi viuda qhepakamuy, churiy Sela wiñanankama, nispa. Judaqa yuyaykurqanmi: Paqtan Selapas wawqenkuna hinallataq wañunman, nispa. Chaymi Tamarqa ripuspa taytanpa wasinpi tiyamurqan.

12Unayña kapurqan, wañukapurqantaq Shuaq ususin Judapa warmin. Chay qhepata Judaqa lutokuyta hunt'aspaña, reqsinakuqmasin Adulam runa Hirawan Timnat-ta rirqan ovejan rutuqkunaman. 13Tamarmantaq willarqanku: Suegroykin Timnat-ta rishan ovejankuna rutuq, nispa. 14Hinaqtinmi payqa viuda-kaynin p'achata ch'utikuspa qatawan uyanta pakaykukurqan, hinaspa p'istuykukurqan, chaymantataq tiyaykurqan Enaimman haykuna Timnat ñan patapi. Repararqanmi Selaq waynaña kasqanta, hinallataq payqa Selawan manaraq casarachisqachu kasqantapas.

15Chaymi Judaqa payta rikuspa rabona warmi kasqanta yuyarqan, Tamarqa uyanta pakaykukusqanrayku. 16Hinaspan ñanmanta payneqman lloqsispa nirqan:

—¿Ñoqawan hukllachakusunchu? nispa. (Manan yacharqanchu qhachunin kasqanta). Paytaq nirqan:

—¿Imatataq qowanki ñoqawan puñusqaykimanta? nispa.

17Judataq kutichirqan:

—Ñoqa apachimusqayki uywamanta huknin cabrachata, nispa.

Paytaq nirqan:

—Prendata saqeway chayta apachimunaykikama, nispa.

18Chaymi Judaqa nirqan:

—¿Ima prendatataq qosqayki? nispa.

Paytaq kutichirqan:

—Walqanayoq selloykita, hap'isqayki tawnaykitawan, nispa.

Judataq chaykunata qorqan, hinaspan Tamarwan hukllachakurqan, chaymi Tamarqa Judapaq wiksallikurqan. 19Hinamantataq hatarispa ripurqan, qatatapas horqokurqan, chaymantataq viuda p'achanwan p'achakurqan.

20Hinamantataq Judaqa chay cabrata apachipurqan Adulam runa reqsinakuqmasinwan, chay warmimanta prendata chaskimpunanpaq, ichaqa manan payta tarirqanchu. 21Hinan chayneq runakunata tapukurqan:

—¿Maypitaq kashan Enaim ñan patapi rabona warmi? nispa.

Paykunataq nirqanku:

—Manan kaypiqa ima rabona warmipas kanchu, nispa.

22Chaymi payqa Judaman kutipurqan, nirqantaq:

—Manan payta tarimunichu, chayneq runakunapas ninkun: Manan kaypiqa rabona warmi kanchu, nispa.

23Hinan Judaqa nirqan:

—Prendakunata hap'ikapuchun, ama asipayawananchispaq, ñoqan kay cabrachata apachirqayki, qantaq mana payta tarimurqankichu, nispa.

24Kinsa killa qhepata hinataq Judaman willarqanku: Qhachuniyki Tamarmi qhellipi purin, qhellipi purisqanwanmi onqoq rikhurin, nispa.

Chaymi Judaqa kamachikurqan:

—Horqoychis, kanaykuychis, nispa.

25Warmitaq ichaqa horqoqtinku, suegronman willachimurqan:

Piqpachus kay prendakuna chay qharipaqmi wiksallikuni. Qhawariy piqpachus kasqanta, walqanayoq sellopas tawnapas, nispa.

26Hinaqtinmi Judaqa chaykunata reqsispa nirqan: Ñoqamanta payqa aswan chaninmi, manan churiy Selata paytawan casarachirqanichu, nispa. Manañataq hayk'aqpas Tamarwan puñurqanchu.

27Wachakunan p'unchay chayamuqtintaq wiksanpi mellizo karqan. 28Wachakushaqtintaq hukninqa makinta haywarqamurqan, hinan parteraqa hap'ispa makinta puka q'aytuwan wataykurqan: Kaymi ñawpaqta lloqsimun, nispa. 29Makinta pay kutiykachiqtintaq wawqen lloqsimurqan. Hinan parteraqa nirqan: ¡Imaynata kichamunki lloqsinaykipaq! nispa, hinaspa suticharqan Faresta#Fares sutin Hebreo rimaypi “kicharayaq” ninanta nin.. 30Chay qhepatataq wawqen lloqsimurqan, makinpi puka q'aytuyoq, suticharqantaq Zarata.

Currently Selected:

GÉNESIS 38: QC88

Highlight

Copy

Compare