GÉNESIS 37
37
Joseta wawqenkunaq vendesqan
1Jacobmi tiyarqan taytanpa tiyasqan hallp'api, Canaán suyupi. 2Kaymi Jacobpa ayllunmanta willakuy. Joseqa chunka qanchisniyoq watayoq kashaspa, taytanpa warmin Bilhaq churinkunawan Zilpaq churinkunapiwan uywata michiq. Josetaq taytanman willaq wawqenkunaq millay kawsasqanta.
3Israeltaq Joseta munakurqan llapa churinkunamantapas aswantaraq, yuyaq kaqtinña naceqtin, hinaspan ancha munay qoysu p'achata ruwapurqan. 4Hinan wawqenkunaqa paykunamantapas astawan taytanpa munakusqanta rikuspa payta cheqnikurqanku, manataq sumaqta payta rimaykuqkuchu.
5Huk kutinmi Joseqa mosqokusqanta wawqenkunaman willarqan, hinan paykunaqa astawanraq payta cheqnikurqanku. 6Paykunamanmi nirqan:
—Kunan uyariychis kay mosqokusqayta: 7Chakra chawpipi watashasqanchis marq'ay-marq'ay trigota, ñoqaq marq'ayniytaq sayarispa sayashasqa, marq'ayniykichistaq muyuriykuspa ñoqaqman k'umuykamusqaku, nispa.
8Wawqenkunataq payman kutichirqanku:
—¿Qanqa kamachiwankikuchu? Icha, ¿munaychakuwankikuchu? nispa.
Hinaspan paytaqa astawanraq cheqnikurqanku mosqokusqanrayku willakusqanrayku ima.
9Mosqokullarqantaq huktawan, hinaspa wawqenkunaman chayta willarqan:
—Kunan mosqokullanitaq huktawan: inti, killa, chunka hukniyoq ch'askakuna ñoqaman k'umuykamuwasqaku, nispa.
10Taytanmanpas chayta willallarqantaq, taytantaq payta phiñarispan nirqan:
—¿Imataq kay mosqokusqaykiri? ¿Ñoqapas mamaykipas, wawqeykikunapas qanman pampakama k'umuykukuqpunichu hamusqaykiku? nispa.
11Wawqenkunataq payta envidiakurqanku, taytantaq ichaqa chayta yuyashallarqanpuni.
12Hinamantataq wawqenkunaqa ripurqanku taytankuq uywanta Shehempi michimuq. 13Israeltaq Joseta nirqan:
—Wawqeykikuna Shehempi uywata michishanku. Hamuy, paykunaman kachasqayki, nispa.
Paytaq nirqan:
—Risaqmi, nispa.
14Israeltaq payta nirqan:
—Kunanqa phaway, qhawarqamuy imaynachus wawqeykikunaq kashasqanta, imaynataqchus uywakunaq kashasqantawan, hinaspa willawanki, nispa.
Hinaspan Hebrón wayq'omanta kacharqan, hinan Shehemman chayarqan. 15Huk runataq paywan tuparqan campopi payechikushaqtin, hinan chay runaqa payta tapuykurqan:
—¿Imata maskhashanki? nispa.
16Josetaq kutichirqan:
—Wawqeykunatan maskhashani, ama hinachu kay, willaykuway maypichus michishasqankuta, nispa.
17Chay runataq kutichirqan:
—Ñan kaymanta ripunkuña, ñoqan paykunata uyarirqani: Haku Dotanta, niqta, nispa.
Chaymi Joseqa wawqenkuna maskhaq rirqan, hinaspan Dotanpi paykunata tarimurqan. 18Paykunataq karumanta Joseta rikuspa, manaraq qayllankuman chayashaqtin, payta wañuchinankupaq rimanakurqanku:
19—Kayqa mosqokuq hamushan. 20Kunanqa wañurqachisun, hinaspa ch'aki p'uytuman winaykusun. Nisunchistaq: Ima phiña animalchá mikhurqon, nispa. Hinaspa yachasun imachus mosqokusqankuna kasqanta, nispa.
21Rubentaq chayta uyarispa paykunamanta kacharichiyta munaspa nirqan:
—Ama wañuchisunchu. 22Ama yawarta hich'aychischu, aswanpas kay ch'inneqpi kaq p'uytuman winaykuychis, amataq payta imanaychispaschu, nispa.
Chaytan nirqan paykunamanta kacharichispa taytanman kutichipunanpaq. 23Wawqenkunaman José chayaqtintaq, paykunaqa Josepa p'achanta ch'utirqorqanku, chay ancha munay qoysu p'achawan p'achakusqanta. 24Hinaspa payta hap'ispa ch'usaq ch'aki p'uytuman winaykurqanku. 25Hinaspataq mikhuq tiyaykurqanku, qhawarispataq rikurqanku huk t'aqa Ismael runakuna hamushaqta. Chaykunan camellonkupi Egiptoman cargasharqanku q'apaq hampikunata, balsamota, mirratawan. 26Hinan Judaqa wawqenkunata nirqan:
—¿Ima allintaq kanqa wawqenchista wañuchisqanchis, hinaspa wañusqanta pakaykusqanchispas? 27Ismael runakunaman vendesun, ama payta wañuchisunchu, payqa wawqenchismi aychanchismi, nispa.
Chaymi wawqenkunaqa:
—Allinmi, nirqanku. 28Negociaq Madián runakuna pasashaqtinkutaq, paykunaqa Joseta p'uytumanta horqospanku, Ismael runakunaman iskay chunka qolqeman venderqanku. Chaykunataq Joseta Egiptoman aparqanku.
29Chaymantaña Rubenqa p'uytuman kutirqan, manataq chay ukhupi Joseta tarirqanchu, hinaspanmi p'achanta llakisqa llik'ikurqan. 30Wawqenkunaman kutimuspataq nirqan:
—¡Manan wayna kapunchu! ¿Imanaykusaqtaq? nispa.
31Chaymi paykunaqa Josepa p'achanta hap'irqanku, hinaspa huk cabrachata nak'aspa p'achata yawarcharqanku. 32Hinaspataq chay qoysu p'achata taytankuman apaspa nirqanku:
—Kaytan tarimuyku, qhawaykuy churiykiq p'achanchus icha manachus chayta, nispa.
33Chaymi payqa chayta qhawaykuspa nirqan:
—Wawaypa p'achanmi, ima phiña animalchá mikhurqon, Joseta llik'irqarin, nispa. 34Hinaspanmi Jacobqa p'achanta llakisqa llik'ikurqan, luto p'achawan churaykukuspataq unayta churinmanta lutokurqan. 35Hinaqtinmi llapa churinkuna llapa ususinkuna sonqochayta munarqanku, paytaq ichaqa mana sonqochasqa kayta munarqanchu, nirqantaq:
—Wawaypa kasqan Wañuy-pachakaman llakisqa uraykusaq, nispa. Hinaspanmi taytanqa paymanta waqaykurqan.
36Madián runakunataq Egiptopi Josetaqa Potifarman venderqanku, Potifarqa rey Faraonpa oficialnin guardia umallin karqan.
Currently Selected:
GÉNESIS 37: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
