GÉNESIS 35
35
Diospa Betelpi Jacobta saminchasqan
1Diosmi Jacobta nirqan:
—Wichallayña Betelta, hinaspa chaypi tiyamuy. Chaypitaq altarta perqampuway wawqeyki Esaumanta ayqeshaqtiyki rikhurisuqniyki Diospaq, nispa. 2Hinaqtinmi Jacobqa ayllunta lliw paywan kaqkunatapas nirqan:
—Hap'isqaykichis wak dioskunata wikch'uychis, hinaspa ch'uyanchakuychis, huk p'achawan ima churakuychis. 3Wichallasunña Betelta, chaypin altarta Diospaq perqasaq, payqa llakikusqay p'unchaymi rimapayawarqan, hinallataq maypiña kaqtiypas puriysiwarqan, nispa.
4Ahinapin Jacobman qorqanku hap'isqanku llapan wak dioskunata, ninrinkupi kaq aretekunatapas. Hinan Jacobqa chaykunata pakarqan Shehem qayllapi kaq terebinto sach'a sikipi. 5Lloqsiqtinkutaq, Diosqa manchachirqan muyuriqninkupi kaq llaqtakunata, chaymi Jacobpa churinkunata mana qatiykacharqankuchu.
6Jacobmi puriysimuqnin llapa runawan chayarqan Canaanpi kaq Luz llaqtaman, chaymi Betel nisqallataq. 7Hinaspanmi altarta chaypi perqarqan, chayneqtataq suticharqan “El-Betel”#“Betel Dios” ninanta nin. nisqata, wawqenmanta ayqekushaqtin chaypi Diosqa payman rikhurisqanrayku. 8Rebecaq uywaqen Deborataq wañukapurqan, p'ampasqataq karqan Betel urapi encina sach'a sikipi. Chaymi chay sach'aqa “Waqay Encina” sutichasqa.
9Huktawan Dios rikhurirqan Jacobman Padan-arammanta kutimpuqtin, hinaspan payta samincharqan. 10Nirqantaq Diosqa:
—Sutiykin Jacob, manan Jacobñachu sutiyki kanqa, aswanpas Israelmi sutiykiqa kapunqa, nispa. Chay hinatan Israelta sutichapurqan, 11nillarqantaq:
—Ñoqan kani Tukuy-atiyniyoq Dios, askhata miray, huk hatun suyun, askha llaqtakunan qanmanta sayarinqa, reykunataqmi qanmanta paqarinqa. 12Abrahamman Isaacman qosqay hallp'atan qanman qosqayki, hinallataq mirayniykimanpas qosaq chay hallp'ata, nispa.
13Hinaspan Diosqa paywan rimasqan cheqasmanta ripurqan. 14Chaymi Jacobqa huk rumi saywata chaypi sayarichirqan, chay patatataq vinowan aceitewan hich'aykurqan. 15Hinaspan Jacobqa paywan Diospa rimasqan cheqasta “Betel” nisqata suticharqan.
Raquelpa wañukapusqan
16Chaymantataq Betelmanta puririrqanku, Efrataman chayanapaq purinaraq kashaqtintaq Raquelqa wachakurqan, ichaqa ñak'ayta wachakurqan. 17Wachakushaspa sinchita ñak'ariqtintaq parteraqa payta nirqan:
—Ama manchakuychu, kay qhari wawaykipas kallantaqmi, nispa.
18P'iti-p'itishaspataq Benoni#Kay sutin Hebreo rimaypi “llallichiq churi” ninanta nin. sutiwan suticharqan, taytantaq ichaqa Benjamín#Kay sutin Hebreo rimaypi “paña makiy churi” ninanta nin. sutiwan suticharqan. 19Chhaynatan Raquelqa wañukapurqan, Efrata ñanpitaq p'ampasqa karqan, chaymi Belén nisqallataq. 20Sepulturan patapitaq Jacobqa rumita sayarichirqan, chaymi chay p'unchaymanta Raquelpa sepulturan saywa.
21Israelmi puririllarqantaq, hinaspan karpakurqan Edarpa torren aswan haqayneqninpi. 22Chay hallp'api Israel tiyaqtintaq, Rubenqa rispa puñurqan taytanpa tiyaqmasin Bilhawan. Chayta Israel yachaspataq sinchita phiñakurqan.
Jacobpa churinkuna
Israelpa churinkunataq chunka iskayniyoq karqan. 23Leaq wawankuna: Jacobpa phiwin Rubén, Simeón, Leví, Judá, Isakar, Zabulonpiwan. 24Raquelpa wawankuna: Josepiwan Benjaminpiwan. 25Raquelpa warmi kamachin Bilhaq wawankuna: Danpiwan Neftalipiwan. 26Leaq warmi kamachin Zilpaq wawankunataq: Gadpiwan Aserpiwan. Chaykunan Jacobpa churinkuna, Padan-arampi paypaq naceqkuna.
Isaacpa wañukapusqan
27Chaymantataq, Jacobqa taytan Isaacpata rirqan Mamre llaqta Arbaman, chaymi Hebrón nisqallataq, chaypin Abrahampas Isaacpas tiyarqan. 28Isaactaq kawsarqan pachak pusaq chunkayoq watakama, 29hinaspanmi sinchi yuyaqña wañukapurqan, machulankunamanpas huñukapurqan, churin Esauwan Jacobwantaq p'ampapurqanku.
Currently Selected:
GÉNESIS 35: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
