KUHALAWA 8

Vibula

1Abaho MNDEWA kamulongela Musa, “Genda ha Falao, ukamulongele kamba MNDEWA kolonga vino, ‘Waleke wanhu zangu wachole, giladi wakanitambikile nie. 2Kamba uhalema kuwaleka wachole, noitila vibula isi yako yose. 3Lwanda lwa Naili lomema vibula, wokwenela mbaka kuding'anda jako, mdigati jako na mulusazi lwako, mzing'anda za salange zako, mzing'anda za wanhu zako, na hata mkivu chako na m'vikalango vako va kukandila. 4Ivibula vokuzumhila gweye na wanhu zako na salange zako wose.’ ”

5MNDEWA kamulongela Musa, “Mulongele Haloni yenule mkono wake uli na fimbo yaugolosele kuna zinyanda, m'vizanda, na m'vilamba, na kuvitenda vibula vilawe mmazi na kuigubika isi yose ya Misili.” 6Avo Haloni kaugolosa mkono wake kuna gamazi gose ga Misili, na vibula vilawa mmazi na kuigubika isi yose ya Misili. 7Ila wahawi na hewo watenda vivija kamba viyatendile heyo kubitila uhawi wao, na hewo vivija wavitenda vibula vilawe mmazi na kwingila muisi ya Misili.

8Falao kawakema Musa na Haloni, na kulonga, “Tambikeni ha MNDEWA, yavisegeze vibula kulawa kumwangu na kulawa ha wanhu zangu, na nie nowaleka wanhu zenu wachole kumulavila nhosa MNDEWA.”

9Musa kamwidika Falao, “Nilongele zua jaki duulonda nie nikutambikile gweye na salange zako hamoja na wanhu zako, giladi vibula vino visegele kumwako gweye na mzing'anda zako, ila visigale tu vija vili Mulwanda lwa Naili.”

10Falao kalonga, “Nitambikile mayo.”

Musa kalonga, “Notenda kamba vuulongile. Abaho kovitanga kamba haduhu mulungu yalingile na MNDEWA Mulungu wetu, 11vibula vosegela kumwako gweye na mng'anda zako zose na salange zako na wanhu zako, ila vosigala muna Ulwanda lwa Naili.” 12Abaho Musa na Haloni wasegela haulongozi wa Falao, avo Musa kamulilila MNDEWA mmbuli ya vibula MNDEWA viyavigalile ha Falao. 13Na MNDEWA katenda kamba Musa viyapulile, waja ivibula wakalile mzing'anda na mmikonhi ya izing'anda na mmigunda, wafa. 14Avo Wamisili wavilundika ivibula hamoja na kutenda masugulu, na isi yose inung'ha bundo. 15Ila Falao viyonile kamba ivibula vifa, kautenda moyo wake kuwa mdala, kamba viyalongile MNDEWA. Avo hawategeleze Musa na Haloni, kamba viyalongile MNDEWA.

Usubi

16MNDEWA kamulongela Musa, “Mulongele Haloni, yadilanhe timbwisi da isi na fimbo yake, na timbwisi da isi yose ya Misili dogaluka kuwa usubi.” 17Avo Haloni kadilanha timbwisi da isi na fimbo yake, na timbwisi da isi yose ya Misili digaluka kuwa usubi, na uwezila wanhu na wang'onyo. 18Wahawi wageza kuwatenda usubi walawilile kubitila uhawi wao, ila hawadahile. Usubi uwezila wanhu na wang'onyo. 19Na waja iwahawi wamulongela Falao, “Kino kidole cha Mulungu.”#8:19 Kidole cha Mulungu nhegulo yake mhiko za Mulungu. Ila moyo wa Falao ugendelela kuwa mdala, kamba MNDEWA viyalongile, hawategeleze Musa na Haloni.

Ng'honzi

20Abaho MNDEWA kamulongela Musa, “Mayo winuke imitondo ng'hani uchole ha Falao, kipigiti vondayachole kulwanda, umulongele kamba Mndewa kolonga vino, ‘Waleke wanhu zangu wachole, giladi wakanitambikile nie. 21Kwavija kamba huwalekile wanhu zangu wachole, nogala madale ga ng'honzi kumwako gweye na salange zako, ha wanhu zako na mng'anda zako. Ng'anda za Wamisili zomema madale ga ng'honzi, vivija muna iisi iwokala. 22Ila muisi ya Gosheni ako wanhu zangu kuwokala, hakuwa na madale ga ng'honzi, giladi uvitange kamba nie, MNDEWA, nokala muisi ija. 23Nokwika mbaka hagatigati ya wanhu zangu na wanhu zako, na mzonza uno wokoneka mayo.’ ” 24MNDEWA katenda kamba viyalongile. Madale makulu ga ng'honzi gengila mding'anda da Falao na mzing'anda za salange zake. Isi yose ya Misili ibanangigwa na ng'honzi.

25Abaho Falao kawakema Musa na Haloni, na kulonga, “Gendeni mkamulavile nhosa Mulungu wenu mumuno muisi.”

26Ila Musa kalonga, “Havinoga kumulavila nhosa Mulungu wetu muisi ino, kwavija nhosa yondatulave ha MNDEWA Mulungu wetu yowagevuza Wamisili. Avo kamba tuhalava nhosa iwagevuza haulongozi wao, haweza kututoa na mibwe? 27Tolondigwa tuchole mwanza wa mazua madatu kuluwala tukamulavile nhosa MNDEWA Mulungu wetu, kamba viyatulagize.”

28Avo Falao kalonga, “Nowaleka mchole kumulavila nhosa, MNDEWA Mulungu wenu kuluwala, ila sambimchole kutali ng'hani. Na mnitambikile na nie.”

29Abaho Musa kalonga, “Kipigiti kikino nie vunisegela hano, nokutambikila ha MNDEWA, na mayo madale gose ga ng'honzi gosegela kulawa kumwako na salange zako na wanhu zako. Ila gweye kolondigwa sambiutuvwizile kabili mkuwagomesa wanhu kuchola kumulavila MNDEWA nhosa.”

30Avo Musa kasegela haulongozi wa Falao na kutambika ha MNDEWA. 31Na MNDEWA katenda kamba Musa viyampulile. Kagasegeza gamadale ga ng'honzi kulawa ha Falao, kulawa ha salange zake, na kulawa ha wanhu zake, haduhu hata ng'honzi imwe yasigale. 32Ila mwanza uno vivija, Falao kautenda moyo wake kuwa mdala, na hawalekile wanhu wachole.

Currently Selected:

KUHALAWA 8: Kizalamo

Highlight

Copy