Ohutula 25

Ebiyaanwa by'Eyeema lyoolerefu

(Hut 35:4-9)

1Omwaami haandi yaboolera Musa ati, 2“Boolera Abaisiraeli baamberese esiyaanwa. Ewe yakaanira buli ngeri y'esiyaanwa si buli muundu yeesi aba n'adahire ohutusa. 3Ebiyaanwa bihoyere ohuba ebya: esaabbu, efeesa, neende Omugasa; 4elaasi enyirifu; bbulu, papo neende obwooya bwa ranjaai; engubo yaholwa mu bwooya bw'embusi; 5eseero ly'ekoondi emiiku elyabahwaho eraangi ya ranjaai; eseero echweenufu; embaao ch'emigasya; 6amafuta k'amataara; ebiluunga amafuta k'ohwaula, neende obubbaani buwunya esing'aari silai muno; 7eby'ohwesyaaya bilaangwa, ‘karinelia’, neende eby'embya chiindi bi bahoyere ohunabira hu ngubo yoohusirifu y'Omulaamisi Muhuluundu haandi neende hu esyefwaalo sy'obulaamisi syoohusirifu silaangwa siti efodi. 8Abaandu bahoyere ohunyoombahira eyeema lyoolerefu, hu syesi nyale ohubamenyamo. 9Mulyoombahe alala neende ebiindu byoosi eby'ohutaamo ohuloondakana neende endekeha yi mweene njia ohubeekesa”.

Esanduuku ly'Endagaano

(Hut 37:1-9)

10“Hole esanduuku ohutula mu mbaao ch'omugaasia, esetimiita emia ndala neende ehumi (110) obuleeyi, esetimiita amahumi kasaasaba neende chisaasaba obubaambali, neende esetimiita amahumi kasaasaba neende chisaasaba aakulu. 11Bwiihe mukati neende erwaanyi bweene neende esaabbu ehaya, haandi mukohobe huundulo hwoosi neende esaabbu. 12Holereho emihono ky'ohukiingira kine, mani mukiyambaanie hu makulu kane kalyo, emihono kyehuyuungirisa ekyo nikiri buli lubeka. 13Hole emisiruunga kikiinga eky'embaao ch'omugaasia, mukibwiiheho neende esaabbu 14mani mumale mukichomehe mu mihono kyehuyuungirisa ekyo ekiri hu buli lubeka lwisanduuku. 15“Emisiruunga ekyo kihoyere ohulehwa mu mihono kyehuyuungirisa, haandi sikihoyere ohutuswa hoomo. 16Mani mute ebituundu bibiri by'amakina bi njia ohubaberesa, hu malako kaandiikwa.

17 # Abaib 9:5. “Hole esifuuniho esy'esaabbu ehaya, esetimiita emia ndala neende ehumi (110) obuleeyi, neende esetimiita amahumi kasaasaba neende chisaasaba obubaambali. 18Hole abakerubbi babiri abali neende embaya chibiri eby'esaabbu hong'oonde, 19buli silala nisiri hu ndulo y'esifuuniho. Mubihola bibe koti omubiri mulala neende esifuuniho. 20Abakerubbi babiri bano bahoyere ohutingaalana nibihalakania esifuuniho esyo, nae embaya chibaambuuhe chabo chihoyere ohuba nichisifuuniihe. 21Mute ebituundu bibiri by'amakina bira mu sanduuku elyo mani mufuuniheho esifuuniho humukulu waalyo. 22Ese njia ohubabukaaniraanga abweene ao, nae ohutulira aakulu w'esifuuniho, akatikaati w'abakerubbi babiri, ao niwo yiinjia ohubaberesera amalako kaange koosi ak'abaandu ba Yisiraeli.

Emeesa y'emigaati kiyaaniirwe Nasaae

(Hut 37:10-16)

23“Hole emeesa mu mbaao ch'omugaasia, esetimiita amahumi kataanu-na-kadatu-na-chitaanu-na-chidatu obuleeyi, esetimiita amahumi kane neende chine obubaambali, neende esetimiita amahumi kasaasaba neende chisaasaba aakulu. 24Muyifuunihe yoosi neende esaabbu haya haandi muyikohobe hu ndulo neende esaabbu ohwebodoohania. 25Hole olunikaanika lwa emilimiita amahumi kataanu-na-kabiri neende chitaanu obubaambali ohuyebodoohania, haandi neende oluholoboso lwebodoohania engata eyo. 26Holereho emihono chehuyungirisa chine ech'ohukiingira ech'esaabbu mani mukite hu soonda chine, eyiri amakulu. 27Emihono chehuyungirisa ekidiira emisuruunga ch'ohukiingira emeesa yino kihoyere ohuteebwa aambi neende engata yino. 28Hole emisiruunga ky'embaao ch'omugaasia, mani mumale mukibwiiheho neende esaabbu. 29Hole esaani, ebikoombe, enjaagi, neende ebbakuli ebihoyeere ohwehoonyerwaanga mu huyaanayo emituli. 30#Lef 24:5-8.Emeesa yino yihoyeere ohuteebwa mu moni w'Esanduuku ly'Endagaano, nae haandi hu meesa ohwo huhoyere ohubechaangaho ebiha byoosi omugaati kwalabiswa okwaange.”

Esiteeni sy'etaara

(Hut 37:17-24)

31“Hole esiteeni sy'etaara esy'esaabbu haya. Hole obweemero bwasyo neende omusiiro eby'esaabbu hong'oonde; ebimuli byuubbe byaahwo, neende ebimuli bisiiri ohubwiihuha neende emilokoyo kyeene, bihoyere ohuba nibihola omubiri kwasyo mulala. 32Amasaga kasaasaba kachia ohuba nikakabuhira hu nyaande chasyo, nga buli kadatu kaba hu lwaande lulala. 33Buli lala hu masaga kasaasaba lihoyere ohubaaho ebimuli byuubbe bidatu nibyaholwa koti esimuli silaangwa ‘alimoondi’ esibaambula neende emitoombo haandi neende emilokoyo. 34Esiiro y'esiteeni sy'etaara, yihoyeere ohubaaho ebimuli byuubbe bine ebyaholwa koti alimoondi sibaambula neende emitoombo haandi neende emilokoyo. 35Yihoyere ohubaao omutoombo mulala aasi wa buli masaga kabiri-kabiri amahabi kadatu. 36Emitoombo, amasaga, alala neende esiteeni sy'etaara bihoyere ohuba omubiri mulala okw'esaabbu hong'oonde ehaya. 37Hole amataara kataanu-na-kabiri ak'ohuba hu siteeni sy'etaara esyo mani mukatekehe keeme kaaduhe nikatingaalire mu moni. 38Hole magalo kasyo alala neende otukae twaahwo eby'esaabbu haya. 39Mwehoonyere ekiloguraamu amahumi kadatu neende chitaanu ech'esaabbu haya ohuhola esiteeni sy'etaara, alala neende ebichiiraho byoosi. 40#Biho 7:44; Abaib 8:5.Mweliinde mani mubihole byoosi ohuloondakana neende endekeha yi hweekeseere hu lugulu luno.”

Currently Selected:

Ohutula 25: SAMDC

Highlight

Copy

Compare