Ohutula 23

Obuluungifu neende obuhoyera

1 # Hut 20:16; Lef 19:11,12; Amal 5:20. “Mutasalaaniaanga emboosi chitaali ech'obwadyeeri, haandi otahoonyaanga omuundu oholere esiindu sibi nootusa obuloli bw'obubacha. 2Otakwiraanga sa abaandu baangi nibaba nibahola esyonoono, oba nibaba nibatusa obuloli bukodya obwadyeeri. 3#Lef 19:15. Otehubbiraanga eyiri ebidiira hu muundu mumanani naali ohuyaaswa.

4 # Amal 22:1-4. “Niwiichuhana waabona eng'oombe y'omusuku wao, oba esuhiri yae niyeboloole niyiyikaana, yikedeenge omukobosera. 5Esuhiri yae niyikwiriirwe neende emigugu chaayo, muhoonyeenge muyisiingisa yeema hu makulu kayo haandi; otabitaanga sa niweweerao.

6 # Lef 19:15; Amal 16:19. “Otahayaanga ohuholera omumanani obwadyeeri naaba naleeterwe mu siina. 7Otawabaanga emisaango kitaali eky'obwadyeeri, haandi muteetaanga omuundu otaaliho omusaango, olwohuba mba njia ohuhayana neende oyo yeesi ohola esiindu sibi sifwaana siti. 8Otafukiiriraanga ohubukula asowa, olwohuba asowa yiyofusaanga abaandu bahaya ohubona ebihoyera nihaandi yifwiirisaanga obulaho omusaango byaahoyere ohuholerwa.

9 # Hut 22:21; Lef 19:33,34; Amal 24:17,18; 27:19. “Mutaboneresaanga walukeenda; olwohuba mwesi mumanyire bulai bweene koti lu bifwaana nooli walukeenda, olwohuba mwaliho bawalukeenda mu Misiri.

Omwaaka kwa hataanu-na-habiri neende oludaalo lwa hataanu-na-habiri

10 # Lef 25:1-7. “Emyaaka kisaasaba emilaamba, taakeenge emikuunda kyeeng'we, mukesa haandi mubuunga byoosi ebiba nibitulaangamo. 11Nae mu mwaaka kwa hataanu-na-habiri, leheenge emikuunda echio kiwuluuhaho, haandi mutakesaangaho esyo syoosi esiba nisikihuulireho. Abamanani nibo ababa bachia ohulichaanga ebyo ebiba nibichihuliireho, neende ebisolo byomuusiino nibyo ebiba bicha ohulichaanga ebiba nibidoong'eremo. Holeenge mutyo neende hu mikuunda ch'emisabbiibbu alala neende endalo y'emiseituuni.

12 # Hut 20:9-11; 31:15; 34:21; 35:2; Lef 23:3; Amal 5:13,14. “Holeenge emirimo kyeeng'we mu ndaalo chisaasaba choong'ene, nae mutaholaangaho omulimo kwoosi hu ludaalo lwa chitaanu-na-chibiri, hu bulaanu abawaambe beeng'we, alala neende bawalukeenda ababaholeraanga emirimo, haandi neende ebisolo byeeng'we byosi binyale ohuwuluuhaho.

13“Tekeerese buli siindu si Ese, Omwaami, mbaboleere. Mutalaamanga banasaae baandi daawe; mutatuumbulaangaho kata ameeta kaabwe.

Ebidyaalo bidatu ebihunuufu

(Hut 34:18-26; Amal 16:1-17)

14“Huseenge ebidyaalo bino bidatu buli mwaaka ohunjisamo oluyaali. 15#Hut 12:14-20; Lef 23:6-8; Hub 28:17-25. Mu mwoosi kwa Abbibbu, omwoosi ku mwatuliramo Misiri, huseenge Esidyaalo sy'Emigaati Kitabbaahirwe mu ngira yi mweene ndabalagira. Mutalichaanga omugaati kwoosi, okwadeehwa neende eemera mu ndaalo chitaanu-na-chibiri ch'Esidyaalo sino. Mutechaanga ohunyinamira nimutakiingire esiyaanwa syoosi.

16 # Lef 23:15-21; Hub 28:26-31; Lef 23:39-43. “Huseenge Esidyaalo sy'Ekesa ni muchaaka ohukesa ebilime byeeng'we.

“Huseenge Esidyaalo sy'Ebikaali mu siminyu, nimunoka ebyaamo mu mikuunda ch'enduli neende ech'emichuungwa. 17Buli mwaaka nimuli mu bidyaalo bino bidatu, abaandu b'esisaacha beeng'we boosi, bahoyere ohwiichaanga ohunyinamira, ese Omwaami Nasaae weeng'we.

18“Mutayaanaangayo emigaati kideeheerwe alala neende emere nimuba nimuyaanaayo esisolo syoosi yi ndi. Amasinya koosi ak'ebisolo bi baanyaaniire mu bidyaalo bino byoosi haba sikahoyere ohulehwao kaakona bwaahya echuli.

19 # Amal 26:2; Hut 34:26; Amal 14:21. “Buli mwaaka, leteenge eyiri enyuumba y'Omwaami Nasaae weeng'we, eemere yi muchaakiraho ohukesa.

“Muteetaanga mudeeha ekoondi doto, oba embusi meeme ebisinuuna.

Ebisuubise neende ebilagiiriro

20“Ese njia ohutuma malaika achie mu moni weeng'we, abaliindeenge nimuba nimukeenda abayire aboose abuundu yindatekeha. 21Mumwewuunjeenge haandi mumuwulireenge. Mutamuhayuhaho daawe, olwohuba ese niise omutumire, mani haba saacha ohuleheraho ohuhayuha ohwo. 22Nae nimumufunihira, mani mwaahola buli siindu siindagira, mba njia ohubalwaanisira abasuku beeng'we. 23Malaika waange achia ohubeemirira mani nyale ohubayira mbeengise mu loba ly'Abaamoori, Abahiiti, Abaperisi, Abakanani, Abahiifi, neende Abayebbusi, haandi njia ohubasihirisa. 24Mutasigamiraanga banasaae baabwe oba ohubeenamiraanga, haandi mutaloondaanga ebiima by'ediini chaabwe. Sihiriseenge banasaae baabwe mani mumala mulikula mukwiisa esiiro ndafu chaabwe ch'amakina. 25Nimuunyinamira, ese Omwaami, Nasaae weeng'we, mba njia ohubaberesa ehabi munyoole ebyohulya, neende amaachi haandi mbamaleho amalwaae keeng'we koosi. 26Mu loba lyeeng'we, abulao omuhasi yeesi ochia otuluuchangaho omwaana, oba ohuba omukuumba. Njia ohubaberesa obulamu buleeyi.

27“Njia ohutiisa abaandu bahuyiinganianga; njia ohuleetao obudoondobanu mu baandu ba muchia ohulwaaniaanga, haandi njia ohuhola abasuku beeng'we boosi bakaluuhane mani babeeruhe. 28Njia ohuta oluteengo mu basuku beeng'we; njia ohwiirusamo Abahiifi, Abakanani, neende Abahiiti nimubayinduula. 29Haba siinja ohubeerusamo mu mwaaka mulala; olwohuba niihola endyo, eloba liba lichia ohudoong'a sa ekuunda, mani ebisolo byomuusiino bibi binabasaabaalire. 30Ataali ao, njia ohubeerusaangamo sya badiidi-badiidi, ohwoola lu muliingiya mwoola ohuswaana esyaalo esyo syoosi. 31Njia ohuhola enjaho ch'eloba lyeeng'we chemeede chitulire elalira hu sigulu sya Akabba ohwoolera elalira hu Enyaanja Hoongo ya Mediterania, haandi ohutulira elalira hu siparara ohwoolera elalira hu Mwaalo kwa Ewufuraate. Njia ohubaberesa amaani muyiingire abeene loba abo, mani mu bayinduule nimwiingiramo. 32Mutaholaangaho endagaano yoosi nabo, oba kata neende banasaae baabwe abo. 33Mutalehaanga abaandu abo nibamenyaho mu syaalo syeeng'we; nimuhola mutyo, abeene abo baba bachia ohukera eng'we mwesi muungosere. Nimwiinamira banasaae baabwe abo, biba bicha ohuba omuteego mubi muno yi muli.”

Currently Selected:

Ohutula 23: SAMDC

Highlight

Copy

Compare