Nimlivolivon 11
11
Ononongan na ni Pite o vazay na do Yelosaleng
1O nipamnekan ni Yeso a omlivolivon no ciriciring na kano aro a sinjya do Yotay am mamizing da o beken a tao do Yotay a omanoyong rana do ciriciring na ni Ama ta do to. 2Meysinaoli si Pite do Yelosaleng am nioya da no tey makdeng a omahap so iwawalam da no tao do Yotay. 3Maniring sira am, “Ikongo o yamo nisan do vahay da no beken a tao do Yotay. Ikongo mo ipacihanghang jira.” 4Karahan am ononongan na rana jira o niyapoyapwan no akman sang a vazay.
5Maniring jira am, “Meynozi ko do Yepey am nimakacita ko so apo ji Ama ta do to a milakayob a tontonen da apo do teyngato. 6Citahen ko am amyan do sahad na so meycyamadadayan a omalalam a kano volay a kano meyyasasalap, 7a kapakamizing ko so macisirsiring jyaken. Maniring am, ‘Mo Pite, peytatanek rana kapanzakat mo so yakan mo.’ 8Am maniring ko am, ‘Mo Panirsirngen, taosya, ta ji ko nikoman so sang, ta ji namen ngangana ori a tao do Yotay.’ 9Pirwa na so kapanci na nya jyaken am maniring am, ‘O ipanci ni Ama ta do to a apya kanen am ji mo mancyan a ji ngangana.’ 10O akman rana sang a vazay am ipitlo a mavahangso a kahap da rana sya do hanit. 11Todey macinao sira makasasnad do nisanan ko a vahay o tatlo a ka beken a tao do Yotay a nitovoy da apo do Kaysadiya a nikomala jyaken. 12So nipancyan na nyaken no Seyzi so kaji ko ratan so kapacihza ko jira. O ananem eya akma tey kakteh do cinai a mina kararay ko a nyo macita eya am nipehza ko sira jyaken a mangay do Kaysadiya kasdep namen do vahay da Kenaylyo. 13Ipanci na jyamen ni Kenaylyo o nimacita na asa ka tinsi a nimeytatanek do vahay da. Maniring jya am, ‘Manovoy ka so tao a mangay do Yepey a manci no asa ka tao a meyngaran si Simong Pite a mai jya. 14Ta yamyan so na ipanci jinyo a omagaz do kapatazadang na jinyo do teyngato ni Ama ta do to a asa ka vahay.’ 15Nanawen ko sira am to meyhekas jira o Seyzi akman no ka ori pa so kapeyhekas na jyaten no Seyzi. 16Ori o nipakanakman ko so mina ciring na no Panirsirngen ta a si Yeso. Maniring am, ‘Si Yowani rana am nitaktakan na inyo no ranom. Am do kadadayan no araraw am meyhekas jinyo o Seyzi.’ 17So nikanoyong ni Ama ta do to a yatomoro no Seyzi do beken a tao do Yotay, akman jyaten a nipanta na so Seyzi no kanoyong ta ji Yeso Kizisto a Panirsirngen ta. A yako ikongo a kato ko makazazatan do vazay ni Ama ta do to.”
18Mamizing da o ciring na jira am ji da rana namwada, ta isaray da si Ama ta do to. Maniring sira am, “Yamanoyong si Ama ta do to a yamarilaw no beken a tao do Yotay a nimamlis rana a na torwan no to meyyonong a ikavyay no pahad da.”
Amraralay ni Yeso a tao do Antia
19Wakwaken da si Setiven am peyvwaken da na o omraralay ni Yeso a tao. Am ori o nikarwan da do Yelosaleng a mangay tomayo do Vongnise a kado Saypolose a kado Antia a kapeylimwang da no ciriciring na ni Ama ta do to do tao do Yotay. 20Am o tatasa ka tao do Saypolose a pongso a kado Cidinay am nimangay sira do Antia a meylimwang no ciriciring ni Yeso do beken a Yotay. 21Amyan jira o oyowyat ni Ama ta do to. Am ori o nipeyparo da no tao a omraralay ni Yeso. 22Mamizing da no omraralay ni Yeso do Yelosaleng o akman sang a vazay am tovoin da si Parnapo a mangay do Antia. 23Makaranes rana am tey masaray, ta nimacita na o aryarilaw na sira ni Ama ta do to. Ori o nipaitan na sira to ngotokot so nakenakem ji Yeso. 24Si Parnapo rana am tey yapya o nakenakem na, ta nioyatan no Seyzi. Am ori o ikakdeng na meyhanhan ni Ama ta do to. Ori nipeyparo da no tao a omanoyong ji Yeso.
25Meyratateng am mangay rana si Parnapo do Tasose a komala si Sawlo. 26Makala na rana am palolwen na mangay do Antia. So nipakasa kawan da macikaop do aro a sinjya amnanao sira. Nimacipinda no kano nang o kangaran da rana jira a “omraralay ni Kizisto” do Antia.
27No kanang rana am amyan so manoyonoyo so ciring ni Ama ta do to a apo do Yelosaleng a mangay do Antia. 28Amyan jira so asa ka tao a meyngaran si Acyapo. Maniring do aro a tao am, “Nipaziman na jyaken no Seyzi o keyyan no omanam a rako a abcil do karawan.” (So nipangononong no ciring na no kapeypanirsirngen da si Kelawti.) 29Am ori o nikamimin da no amraralay ni Yeso a tao a mapeysinsinmo so nizpi a itoro da do akma dey kakteh do cinai a meyvahay do Yotay. To da palololwa do karwaro no nizpi da o panaoben da. 30O nilovot da na nizpi am nipahanhan da si Parnapo a kani Sawlo a mangay nya do panipanirsirngen da do kyokay do Yelosaleng.
Currently Selected:
Nimlivolivon 11: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
