kolinto 1 8

e'usnu to oho sʉ'teni to uacoua ci 'oanʉ

1e'usnu to ohcu titha sʉ'tʉ to uacoua ci 'oanʉ, imza ta'unano <mito acʉhʉ yaa mau'to'tohʉngʉ tan'e>. a'ʉmtʉsi, 'emo maica ci mau'to'tohʉngʉ lac'o i'hozi no iachi biepe bobitano 'e cou, inac'o himngonghi nate meelʉ koa ohsuhcu ta cou. 2i'ola micinanaeno pano isi co'cohivi ci cuma, a'ʉmtʉsi o'amocu isi cohivi 'o ntesi anana'va cohivi. 3at'inghi, i'ola himngonghi to hamo ci cou 'aisieno honga to hamo.

4homo maica, e'usna no bonʉ to oho titha sʉ'tʉ to uacoua ci 'oanʉ, ito cohivi, 'o uacoua o'aisi tamza no mio a'ʉmtʉ yayo ci a'a'ausna; ito yaeza cohivi, moc'o cihi na hamo. 5e'vono ta pepe ho ceoa panola yainca <hamo>, (man'i ci <hamo> ho man'i ci <nooe'oca>), 6at'inghi hoci mi'usnu a'to moc'o cihi ci hamo, 'ai'oeno amopepe, mosola mooyai ta acʉcʉhʉ; mito nomio to hamo ho yaansoua. a'vinano, moc'o cihi ci nooe'oca, 'ai'oeno iesu kilisto; 'e acʉcʉhʉ ci macucuma isi ieni to kilisto ho teyai, ito ieni 'o kilisto ho yayo.

7at'inghi'so, ma'i moc'oso acʉhʉ yaa maica ci mau'to'tohʉngʉ. pantola asonghoi at'ocʉ m'ohkuyu to uacoua, ko'koeno ac'ʉhʉ maitan'e, cono hola bonʉ tamo maica ci 'oanʉ, la conino ma'unano mo bonʉ no 'oanʉ no uacoua. 'o 'tohʉngʉhe la anana'o yoz'u, la h'unano ma'unano mo ma'caca'i homo bonʉ tamo maicaci 'oanʉ. 8a'ʉmtʉsi, 'e 'oanʉ o'ate koa asuhcu ʉmnʉ na teto natʉ'ca 'o hamo; hoci o'te bonʉ uk'a cite nama payo'a, hoci bonʉ uk'a cite nama tov'oha.

9at'inghi, la bumemealʉ, 'otes'a i'mi ho imu titha na iachi ziu ho poa peiskuisi 'omo yoz'u 'o singkoo ci cou. 10hoci pano mo yonta mo conci hi'hioa ho yoz'u na 'tohʉngʉ, aiti 'e mimu yaa <atngaso no mau'to'tohʉngʉ> ci cou homo yonta vio no uacoua ho bonʉ ho mimo, o'amos'aeno mais'a isi poucufna ho poa bonʉ ta oho sʉ'teni to uacoua ci 'oanʉ? 11hoci maica, 'emo yoz'u ci sinto, 'ai'o ohsieno mcoineni to kilisto ci cou, tena i'mi ta <mau'to'tohʉngʉsu> hocu meaapayo'ʉ. 12hoci maica na hioamu, cu alonga 'o sinto, alonga namo yoz'u ho ʉmnʉ ci 'tohʉngʉ, yaeza alonga 'o kilisto. 13ko'koeno, hoci i'mizi no peiskuisi ta sinto na 'oanʉ, 'auesiesi 'anate'o bonʉ no fou, ci tes'a koa peismi no kuisi to sinto.

Currently Selected:

kolinto 1 8: bsnfe

Highlight

Copy