Leviticus 2
2
Onátsias Tkaʼiéston
1Nónen ne ónhkak tsi nítsion iaháthate nonátsias ahontaháiesʼte rahonháke ne Roiá꞉ner, ónenk niáreʼkwe tsi ensétʼtheʼte nasatʼthenserónhni. Ónenk tsi iakenieʼwátha kénhie enteshá꞉weron tánon ne kanetanóron 2tánon iatsiawíten ne Aaronite ratsihénsthaʼtsi. Né roterihwatsʼteríston sehwatshána enharáko nothésehra tánon ne iakeniewátha kénhie tánon akwékon ne iontsienkwahronhniaʼthákwa tánon enhátʼtsahathe thóh ne ietsienharákwahke né꞉ne tahonthontenakeráston nètho tsi akwékon Roiá꞉ner thonwá꞉wi. Ne tewenhserateʼníhons ne ká꞉khwa ne iewatkáwenh tsi rawerientiʼióstha ne Roiá꞉ner. 3Ne iothaténron nonátsias ne tkaiéston ratsihénsthatsi né rahówenk; kwáh iotokénhti, tsioríhwa tsi thoʼnónhwe nikaráhkwenh né꞉ne Roiá꞉ner thonwáwi.
4Tó꞉ka kaná꞉tharo tkaiéston tánon né꞉ne tsi iontenatharonhtákwa watenatharónhte, ónenk tsi iáh né thaʼtakaiéstonhke ne iontʼthenkwáhtha. Ahónton nakaténhsonhke né nothésehra né꞉ne iakeniewátha kénhie takaiéstonhke tó꞉ka ó꞉ni né norahwístha né꞉ne iakeniewátha kénhie ká꞉ron.
5Tó꞉ka ne tkaʼiéston kanátharo íken tánon otsienháke tsi karíhton, ónenk tsi né enhionhníhake né꞉ne iakeniewátha kénhie tenhkaiésthonke nothenésehra ók tsi iáh né thaʼtakaiéstonhke ne watʼthenkwáhtha. 6Tesenataʼrárit tánon kénhie éhneken thashá꞉weron nónen ne enthé꞉sesʼthe.
7Tó꞉ka ne tkaiéston kanátaro ienatsaráhkwahke tsi karíʼton, né enhionhniátonhke nothésehra tánon iakenhiewátha kénhie tenhkaiésthonke. 8Thasehwáhaf tsi ne atsítsion ne Roiá꞉ner tánon ratsihénsthatsi tatʼtsítsion, rahónha ietsienharáhkwahke nienháhaʼwe. 9Né ratsihénsthatsi enhatsiátaren tsi né enwenésthonke tsi oriwakwékon Roiá꞉ner ronhwáwi, tánon thóh enhátsahaʼthe ietsienharáhkwahke. Tsi tewenhsehratheníhons ne káhkhwa ne rawerientiʼióstha ne Roiá꞉ner. 10Né kenhiotsétons ne iewatká꞉wen ratsihénsthatsi né rahó꞉wenk; kwáh íken tsi iotokénti, tsioríhwa tsi thóh nónhwe nitká꞉ha ne ká꞉khwa né tsi Roiá꞉ner ronhwawíhon.
11Iáh thahó꞉tens ne onátsias iewatʼká꞉wen né tsiáwi ne Roiá꞉ner né꞉ne ahionhniáton ne watʼtenhkwáhtha; tó꞉sa nonhwénhton ne ísatst ne watʼtenhkwáhtha tó꞉ka ó꞉ni ne otsinakonhthakwáhne rahotiʼtsikhétha takaiéstonhke ne ká꞉khwa ná꞉tsion ne Roiá꞉ner. 12Ne entèshiesʼthe nenhtewaʼtsiérenthe ensentwáko nonátsa né iaʼtehiosehráke ientsawíten ne Roiá꞉ner, ók iáh kíʼ ientsienharáhkwahke tahontsahatónhake. 13Thaʼshahiotsistónhti akwékon nonátsas entéshiesʼthe, tsioríhwa ne tsiohiótsis ne wenéstha naterihwasehronniátshera tsi naʼtetsiátere níse tánon ne Rawenni꞉io. (Ónenk tsi akwékon teshiotsistáro ne thènen entéshiesʼte.) 14Nónenh entetiawíten ne Roiá꞉ner nátsion nentewatsárenhthe enshientwáko nonátsa, ne thátion ne kanatsakeríton tó꞉ka ó꞉ni ne katʼtheserónhni. 15Iakeniewátha kénhie tétiest tánon onètha éhneken tashá꞉ti. 16Ne ratsiʼhénsthatsi enhátsahathe nètho kákʼkhwa tánon ne kénhie né꞉ne enweʼnésthaʼkwe, tánon akwékon ne onètha, né kákʼkhwa enwatená꞉thonkwe tsi enhónhion ne Roiá꞉ner.
Currently Selected:
Leviticus 2: MHK
Highlight
Copy
Compare
Share
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
