Kessa 30
30
Ixaane Yarshiya Bessi
(Kessa 37:25-28)
1“Ixaane cuyisiya bessaa soqala mithafe medha. 2Iyaw oyddu maazaney de7o. Adussatethaynne gompay issi issi wadha, geesay nam7u wadha gido. Oyddu maazaniyan de7iya kaceti iyara oyketidi oosetonna. 3Iyaw bolla baggaa, iya oyddu maazanetanne iya kaceta walahi bayna worqan lanxa. Iya yuushuwaka worqan lanxa. 4Nam7u worqa sagaayota oothada, xarpheeza tookanaw maaddiya kaso mithata aathanaw goossaas nam7u baggara oytha. 5Kaso mithata soqala mithafe kessada, enta worqan lanxa. 6He ixaane yarsho xarpheezaa, Caaqo Taabotiya sinthan kaqetida magarajuwafe kare baggara wotha. Yan taani neera gahetana.
7“Aaroni wonta wonta xompeta giigisanaw yaa wode, sawiya ixaane yarshiya bessan cuyiso. 8Hessada, Aaroni omarsi xompeta xompiya wodeka ixaane cuyiso. He ixaaniya yarshoy yaana laytha ubban Godaa sinthan cuyo. 9Ha yarsho bessan hara digetida ixaane, katha yarsho, mehe yarshonne woyne yarsho yarshofa. 10Aaroni, nagaraa atotethas laythafe issi toho shuketiya mehiya suuthaafe ekidi, he yarsho bessa maazaneta bolla de7iya kaceta wothidi geeshsho wogaa polo. Ha wogay sinthara yaana wode ubban laythan laythan poleto. He yarsho bessay geeshshi gidiya gisho Godaas dummatis” yaagis.
Nagara Atotetha Miishe
11Hessafe guye, Goday Museko haysada yaagis; 12“Neeni Isra7eele asaa taybiya wode, issi issi asi ba shempuwa wozanaw Godaas miishe qanxo. Yaatiko neeni enta taybiya wode gadoy enta bolla yeenna. 13Taybon geliya asi oonika huuphen huuphen geeshsha dunkaanen eretida mizaane ginan bira ciggo. Issi issi asi hessa taw yarsho oothidi immo. 14Taybon geliya asi oonika laythi laatamanne iyape bolla gidida ubbay Godaas hessa eho. 15Enti banta shempuwa wozanaw Godaas imota immiya wode, dureyka manqoyka issi gina immofe attishin, durey darsidi woyko manqoy guuthidi immofo. 16He miishiya Isra7eele asaape ekada, Geeshsha Dunkaaniya naaganaw peeshsha. He miishey enta shempuwa wozanawunne ta enta naagana mela qofisiyaba gidana” yaagis.
Meecha Kere
17Goday Museko haysada yaagis; 18“Meecha keriyanne iya tohuwa naase biratape medha. Iyan haathe tigada Geeshsha Dunkaaniyapenne yarsho bessaafe giddon wotha.#Kessa 38:8. 19Aaroninne iya nayti banta kushiyanne banta tohuwa yan meeceto. 20Enti Geeshsha Dunkaaniya gelanaapenne yarsho yarshanaape sinthe hessa oothanaw bessees. Hessa enti oothiko hayqope attoosona. 21Enti hayqonna mela, banta kushiyanne banta tohuwa meecetanaw bessees. Hessi Aaronasinne iya sheeshatas, yaa yeletetha ubbaas merinaa woga gidana” yaagis.
Shuumatetha Zayte
22Goday Museko haysada yaagis; 23“Geeshsha sawota, hessatika; usupun kilo giraame gukiya karbe, heedzu kilo giraame sawiya qarafa, heedzu kilo giraame sawiya maata, 24usupun kilo giraame burgude eka. He ubbayka geeshsha dunkaanen eretida mizaaniya gina gido. Hessata bolla oyddu litiro zayte guja. 25Hessata shittoda walakada, sawiya geeshsha zayte oothada, 26Geeshsha Dunkaaniyanne Caaqo Taabotiya tiya. 27Xarpheezanne iya miisheta, xompe wothiya kocaanne iya miisheta, ixaane cuyisiya xarpheezaa, 28xuussa yarsho bessinne iyan bolla de7iya miisheta ubba, meecha keriyanne iya tohuwa tiya. 29Enti polo geeshshi gidana mela enta dummaya. Enta bochiya oonika geeshshi gidana.
30“Hessafe guye, Aaroninne iya nayti kahine gididi taw haggaazana mela enta tiyada dummaya. 31Isra7eele asaas, ‘Haysi Geeshsha shuumatetha zaytey yaa yeletethaas tana haggaazanaw maaddiya zayte gido. 32He zaytiya coo asa bolla gussofa; qassi ay zayteka iya oothida ogiyan oothofa. Zaytey geeshshi gidida gisho, hinteka iya geeshshatetha erite. 33He shittuwa giigisiya asi, woyko kahine gidonna hara asi tiyiya oonika ta asaa giddofe hileto’ yaaga” yaagis.
Ixaane
34Goday Museko haysada yaagis; “Geeshsha sawota, xokiya mitha made, dhaadhe keethan de7iya shitto, sawiya madenne sawiya ixaane eka; enta ubbaa mizaaney issi gina gido. 35Shittoda walahetida ixaane oothada enta go7eta. Walahi baynanne geeshshi gidana mela iyan maxine yegga. 36Iyape guuthara ekada liiqisa caddada, taani neera gahetiya Geeshsha Dunkaaniya giddon, Caaqo Taabotiya sinthan wurxa. He ixaaney new polo geeshshi gido. 37Hintew go7etanaw he ixaaniya ay ogenka giigisopite. Hessi taw dummatidaysa gideysa erite. 38Hessatho oothidi, iya sawuwa singidi ufaytanaw koyiya oonika, ta asaa giddofe dhayana” yaagis.
Currently Selected:
Kessa 30: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
