Kessa 27
27
Yarsho Bessi
1“Soqala mithafe yarsho bessi ootha. Adussatethaynne gompay oyddu wadhanne takadho, geesay heedzu wadha gidida oyddu maazanera de7iya yarsho bessi ootha. 2Oyddu maazaneta bolla kace daaniyaba kessa; kaceti yarsho bessaara issino gididi ooseto. Yaatada, yarsho bessa ubbaa naase biratan laxa. 3Iyaw go7etiya miisheta; bido kessiya kereta, akaafata, baldeta, asho qaphetanne cooceta ubbaa naase biratape ootha. 4Yaatada, naase biratape zarzare daaniyaba oothada, iyaw oyddu maazaneta bolla oyddu sagaayota giigisa. 5He zarzariya yarsho bessa goossaafe garsan yarsho bessaas bagga zawa gathada wotha. 6Soqala mithafe yarsho bessa tookiya kaso mithata kessada, naase biratan lanxa. 7Yarsho bessaa tookiya wode maaddana mela he kaso mithata nam7u miyera de7iya sagaayotan aatha. 8Taani nena zumaa bolla bessidaysada yarsho bessi xawulape oothada, gidduwa kaysi ootha.”
Geeshsha Dunkaane Dabaaba
9“Geeshsha Dunkaaniya dabaaba gechanaw al7o liinope magarajo giigisa. Geshetas adussatethay dugeha baggara xeetu wadha gido. 10Iyaw kate gidana mela naase biratape oosetida laatamu tuussatanne laatamu tohota ootha. Enta bolla bira biratape oosetida xam7atanne kaceta ootha. 11Dabaabas pudeha baggaraka hessada ootha.
12“Dabaabas wuloha bagga adussatethay ishatamu wadha gidida gesheti oosetidi, entaw tammu tohoy de7iya tuussati de7o. 13Geliya wulay de7iya, doloha bagga dabaaba gompay ishatamu wadha gido. 14Dabaaba pengiyafe issi baggara adussatethay tammanne ichashu wadha gidiya gesheti de7o; entaw heedzu tohoy de7iya heedzu tuussati de7o. 15Hanko baggara de7iya geshetika hessada ooseto.
16“Dabaaba geliya wulaas adussatethay laatamu wadha gidiya, al7o liinope magarajo giigisada, kaalose, ocha teera daaneysaninne zo7o qacinan daddada alleeqisa. Enti iyan zempana mela oyddu tohora de7iya oyddu tuussata giigisa. 17Dabaaba yuushuwan de7iya tuussati ubbay bira biratape oosetida xam7atan oyketo; enta kaceti bira biratape, enta tohoti naase biratape ooseto. 18Dabaaba adussatethay xeetu wadha, gompay oytamu wadha, geesay ichashu wadha gido. Magarajoti al7o liinope, enta tohotika naase biratape ooseto.
19“Geeshsha Dunkaaniyan go7etiya miishe ubbay, dunkaaniyanne dabaaba dhisheti ubbay naase biratape ooseto.
Xompe Zayte
20“Xompey qamma poo7ishe aqana mela gum7i xillisida shamaho zayte new ehana mela Isra7eele asaa kiita. 21Aaroninne iya nayti, poo7oy, Godaa sinthan omarsafe wonta gakanaw poo7ana mela Geeshsha Dunkaaniya giddon, Marka Taabotiya sinthan de7iya magarajuwafe kare baggara eetho. Hessi Isra7eele asaas merina woga gididi de7o.
Currently Selected:
Kessa 27: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
