Kessa 25

Xoossa Keethaas Imetida Imuwa

1Goday Museko haysada yaagis; 2“Taw imota ehana mela Isra7eeletas oda. Iya wozani iya imma imma gidaba immiya imota asa ubbaafe taw eka. 3Hinte entafe ekana imotay, worqaa, bira, naase birata, 4kaalose qacina, ocha teera daaniya qacina, zo7o qacinanne al7o liino, deesha ikise, 5haashetidi zo7o qalamen tiyetida dorsa ite, lo77o do7a ite, soqala mithi, 6xompes maaddiya shamaho zayte, shuumatetha zayteninne ixaanen guzhetiya sawota, 7Kahine halaqay ma7iya efuude geetetiya ma7uwa bollanne iya tiran wosetiya margide geetetiya al7o shuchaanne hara alleeqo shuchata eho. 8Taani enta giddon daana mela enti tana goyinniya bessi giigiso.” 9Dunkaaniyanne iya giddon de7iya miisheta ubbaa ta nena bessiya maaran ootha.

Caaqo Taabote

(Kessa 37:1-9)

10“Soqala mithafe, adussatethay nam7u wadhanne takadho, gompay issi wadhanne takadho, geesay issi wadhanne takadho gidiya saaxine oothite. 11Gaathaanne kariya walahi bayna worqan kamma; iya yuushuwaka worqan lanxa. 12He Taabotiyas oyddu worqa sagaayota oothada; oyddu gedata bolla issi baggara nam7u sagaayota, qassi hanko baggara nam7u sagaayota aathada gasetha. 13Taabotiya tookiya kaso mithata soqala mithafe kessada worqan lanxa. 14Taabotiya tookanaw iya miyen de7iya sagaayotan kaso mithata aatha. 15Tookiya kaso mithati Taabotiya sagaayota giddon de7o; enti yaape keyopo. 16Taabotiya giddon taani new immiya, tammu kiitati xaafetida nam7u loche shuchata wotha.

17“Walahi bayna worqafe adussatethay nam7u wadhanne takadho, gompay issi wadhanne takadho gidiya nagara atotetha kama ootha. 18Qefera de7iya nam7u kiruubeta worqafe qoxada ootha. 19Issi kiruubiya issi bagga gaxan, nam7antho kiruubiya hanko bagga gaxan wothada nam7aa Taabotiya guphiyara oythada ootha. 20Kiruubeti woliko simmi uttidi, banta qefiya denthidi, atotetha kamaa kammo. 21Taani new immiya loche shucha bolla xaafetida tammu kiitata Taabotiya giddon wotha. Yaatada, guphiya Taabotiya bolla wotha. 22Taabotiya guphiya bolla de7iya nam7u kiruubetape giddon gidada taani neera gahetana. Isra7eele asaas immiya kiita ubbaa taani yan new immana.”

Uytha Xarpheeza

23“Soqala mithafe adussatethay nam7u wadha, gompay issi wadha, geesay issi wadhanne takadho gidiya issi xarpheeza ootha. 24Yaatada, walahi bayna worqan lanxa; iya yuushuwaka worqan lanxa. 25Hessadaka, gompay takadho gidiya goossa iya bolla yuushsha aatha. Yaatada, iya yuushuwa worqan lanxa. 26He xarpheezas oyddu worqa sagaayota oothada, xarpheezaa oyddu tohotara oytha. 27Xarpheezaa tookanaw kaso mithata aathiya sagaayoti xarpheeza goossaa matan shiiqidi de7o. 28He tookiya kasota soqala mithafe kessada, worqan lanxa. 29Hessadaka, shaatetanne cilpata, woyne yarshuwa duuqiya miishetanne xuu7ata walahi bayna worqafe ootha. 30Xarpheezay Taabotiyas sintha baggara utto. Ta sinthan uttiya geeshsha uythay ubba wode xarpheezaa bollafe dhayopo.”

Xompe Wothiya Kocaa

(Kessa 37:17-24)

31“Xompe wothiya kocaa walahi bayna worqafe ootha. He kocay eqiya tohuwanne tooma worqafe qoxada ootha. Alleeqos oosetiya wallaxati, gambuthatinne ciishshati ubbay issino gididi oosetanaw bessees. 32Nam7u baggara, heedzu heedzu tasheta iyaw kessa. 33Usupun tashetas xeeran xeeran heedzu heedzu alleeqo gambuthatinne ciishshati de7iya lawuze mitha ciishshe daaniyabay de7o. 34Xompiya wothiya kocaa giddon de7iya tooma xeeran oyddu alleeqo gambuthatinne ciishshati de7iya lawuze mitha ciishshe daaniyabay de7o. 35Tashetape garsan, nam7u tasheti gahetiya bessan issi issi gambuthi de7o. 36Gambuthay, tasheynne xompiya wothiya kocay issino gididi, walahi bayna worqafe qoxetidi ooseto.

37“Xompe wothiya kocaa bolla laapun xompeta giigisada, enti sinthe poo7ana mela dhoqu oothada wotha. 38Xompiya naaganaw maaddiya Qaphetanne enta wothiyabata walahi bayna worqafe ootha. 39Xompe wothiya kocaynne iya miisheti ubbay hastamanne ichashu kilo giraame gidiya walahi bayna worqafe ooseto. 40Taani nena zumaa bolla bessida leemisuwa kaallada, akeekada ootha.”

Currently Selected:

Kessa 25: GFBLVF

Highlight

Copy

Compare