APOCALIPSIS 3
3
Amya'a kélápháseso apchakneykekxexa énxet tegma apwányam Sardis
1“Etáxéses nahan xép Dios apchásenneykha nak ma'a apchakneykekxexa nak énxet tegma apwányam Sardis: ‘Keso aptahakxa nak appeywa apyetna nak siete espíritus apkeñama Dios se'e, cham'a apyetna nak han siete yaw'a: Ekya'ásegkok ko'o ekyókxoho aksok apkelané nak xép, ekya'ásegkok nahan apketsapma exchep, kélanagkamchek eykhe keynnakték apyempehek neyseksók apha. 2Exatakha, elmeyásekxa' makham elyennakte m'a aksok ekyetna nak makham xép, cham'a peya nak kalmassegwók, hakte ekwet'ak ko'o megkapéwo makham aptahakxa exchep nápakto' Dios ahagkok. 3Kaxén apwáxok ma'a nelxekmowásamáxche kélxekmósa axta exchep; néyensem aksa xa, eyakmagkas apwáxok ey'ókxa m'a Dios. Apténawok sat agkok xép, máxa apmenyexma sat atnehek ay'ótak xép neyseksók melhaxneykha.#Mt 24.43-44; Lc 12.39-40; Ap 16.15. 4Yetneyk eyke nápakha énxet melpeysegkeso apkelnakta xa Sardis; selxegexma'a sat ko'o atnehek yetlo nelántaxneykekxa apáwa apkelmopé, hakte payhawók elántaxnekxak xa énxet'ák nak. 5Enxet'ák ektahakxa enxoho apkelmalanma, apkelmopé sat etnahagkok apkelnakta, mamasésesek sat nahan apkelwesey m'a weykcha'áhak eknaktáxésamaxko nak apkelwesey m'a peya nak elxawagkok elyennakte apnenya'ák,#Ex 32.32-33; Sal 69.28; Ap 20.12. axének sat nahan ko'o selyekpelchawo nápakto' ma'a Táta, tén han nápakto' ma'a apkelásenneykha apkeleñama nak néten.#Mt 10.32; Lc 12.8. 6¡Kélheyk'ák agkok eghak kéxegke, kóleyxho apxeyenma nak Espíritu kélakneykekxexa!’
Amya'a kélápháseso énxet'ák apchakneykekxexa tegma apwányam Filadelfia
7“Etáxéses nahan Dios apchásenneykha nak ma'a apchakneykekxexa nak énxet tegma apwányam Filadelfia: ‘Keso aptahakxa nak appeywa m'a aptaha nak aptakmalma, aptaha nak han apmámnaksoho, cham'a apmeykencha'a nak wese' apwányam David ketchesama átog apagkok, cham'a magmowána nak agápekxa' apmeykesa enxoho m'a, magwanchek nahan agmeykesek apchapeykxo enxoho;#Is 22.22; Job 12.14. 8Ekya'ásegkok ko'o ekyókxoho aksok apkelané nak xép; elano, ekmeykesek ko'o átog apmonye exchep magmowána nak agápekxa', asexto' eykhe exchep apyennakte, apkelyahakxók eyke sekpeywa, apxénchek nahan sekwesey. 9Wának sat ko'o eltekxekwók aptapnák nápakto' xép#Is 49.23; 60.14. ma'a énxet'ák apkeleñama nak kélakneykekxexa kélpeykesamo Satanás, cham'a apkelmopwána amya'a nak, apkeltemesásamákpo nak judíos, háwe eyke nakso', yakwayam enxoho anhan elya'ásegwomhok sektéma ko'o seyásekhayo exchep.#Is 43.4. 10Apkelanak axta exchep seltémókxa etnehek, cham'a meyensakmo nak. Ekeso eñamakxa sekmoko nak ko'o amyók xép ekwa'a sat ma'a ekhem ekyawe nenlegeykegkoho keso náxop, yakwayam enxoho keykkónek apyókxoho énxet'ák apheykha nak keso náxop. 11Kaxwo' sat awata'. Etakmelches xa aptémakxa nak cha'a, yakwayam enxoho méko keymentók ma'a aksok apxawé naksa nak xép. 12Enxet'ák ektahakxa enxoho apkelmalanma, atnésesek sat ko'o elámha Dios tegma appagkanamap apagkok, melantépekxók sat cha'a m'a; ataxaksek sat ko'o Dios ahagkok apwesey xa énxet'ák nak, tén han ataxaksek ma'a Dios tegma apwányam apagkok nak apwesey, cham'a kaxwé Jerusalén apkeñama nak néten, apkeñama nak ma'a Dios ahagkok;#Ap 21.2. ataxaksek sat nahan ko'o kaxwé sekwesey xa énxet'ák nak.#Is 62.2; 65.15. 13¡Kéxegke ekha nak kélheyk'ák, kóleyxho apxeyenma nak Espíritu kélakneykekxexa!’
Amya'a kélápháseso énxet'ák apchakneykekxexa tegma apwányam Laodicea
14“Etáxéses nahan Dios apchásenneykha nak ma'a apchakneykekxexa nak énxet tegma apwányam Laodicea: ‘Keso aptahakxa nak appeywa aptaha nak apmámnaksoho s'e, aptaha nak han meyeykháseykegkoho appeywa, ekmámnaksoho agko' nahan etnehek appeywa, aptaha nak han eñamakxa ekyókxoho aksok ektaha axta Dios apkelané:#Pr 8.22-31; Jn 1.3; Col 1.15,18. 15Ekya'ásegkok ko'o ekyókxoho aksok apkelané nak xép. Ekya'ásegkok nahan aptaha exchep yáma semamenyého ko'o, tén han yáma mehemamenyého. Etnoho anna exchep mehemamenyého apagko', esenhan etnehek semamenyého apagko'. 16Ataknók sat xép ektémol'a agyekxek antaknók aksok, hakte yáma semamenyého aptahak, yáma mehemamenyého nahan aptahak. 17Apxénchek xép aptaha ekxákma aksok apagkok, tén han apxéna ektakmela apha, apxénchek nahan xép méko eyéméxchexa xama aksok; akke ékpelchak xép aptaha megyásekhamap, tén han aptaha apmopyósa apagko', tén han meyke aksok apagkok, meyke apakta'ák, tén han aptaha meyke apáwa. 18Ekeso eñamakxa seltennasa nak xép seltamho etegyek sawo ekyátekto elyenma ekmomnáwa kélyamasmol'a neyseksa táxa yakwayam kólyenmaksek, eñama nak ko'o, yakwayam enxoho etnehek xép ekmámnaksoho ekxákma aksok apagkok; emenyék nahan ko'o etegyek xép aptaxno apmopé apkeñama nak ko'o, yakwayam enxoho etaxnekxa', yakwayam enxoho nahan kamaskok etnehek xép meyke apáwa segmegkasamo nak, emenyék nahan ko'o etegyek panakte eñama nak ko'o, yakwayam enxoho eltexnagkok apakta'ák keñe étekxak makháxma exchep. 19Agkéshok cha'a ko'o sekpeywa apyókxoho ektaha nak selásekhayo, altennásekxohok nahan cha'a ekyetna enxoho megyakhémo aptahakxa.#Pr 3.12; He 12.6. Etne exchep ekmáheyo agko' apwáxok, eyakmagkas apwáxok, ey'ókxa Dios. 20Kóllano, átog ko'o enmáha selwónencha'a kéxegke, kéxegke ektahakxa enxoho kéllegé sekpeywa, keñe kólmeykesek átog, keñe sat ko'o atxek kañe' kélxagkok, apasmok sat nahan kélto taxnam kéxegke. 21Enxet'ák ektahakxa enxoho apkelmalanma, agkések sat ko'o yakwayam exek nekha sektáhano sekhamakxa nak, ekhawo ektémakxa axta ko'o xa sekmalanmá,#Jn 16.33; Ap 5.5. ekhákxek axta m'a nekha aphamakxa nak Táta. 22¡Kéxegke ekha nak kélheyk'ák kóleyxho apxeyenma nak Espíritu kélakneykekxexa!’ ”
Currently Selected:
APOCALIPSIS 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
