2 Kɔrintinima 10

Pool zab’ o tuma zuɣu

1Man’ Pool n-nyɛ ninvuɣ’ so shɛb’ ni yɛli ni n siɣisiri mmaŋa n yi ti be yi sani, amaa ka lee ti ka yi sani ka wuhiri dɔbilim la. N suhiri ya Masia tarimtali min’ o baalimtali puuni 2ni yi di chɛ ka n ti be yi sani ka yi muɣisi ma ni n wuhi dɔbilim, dama m mi ni n ni tooi wuhi n dɔbilim ni nyɛ shɛm ninvuɣ’ shɛb’ bɛn tɛhiri ni ti dolila dunia ŋɔ biɛhigu soli ka mal’ li kuuni la sani. 3Ti ni be dunia ŋɔ ni maa zaa yoli, ti bi zabiri dunia ŋɔ zabili, 4dama ti bidibbina pala dunia ŋɔ bidibbina, amaa di nyɛla din mali Naawuni yiko di ni, ka daari tinsi goon’ kara luhira. 5Ti saɣindi naŋgbankpeeni mini binshɛɣukam din duhiri dimaŋa ka nyɛ din guri Naawuni baŋsim sol’ la; ka gbahiri tɛha kam n-niŋdi li fukumsi ni ti chɛ ka di deei Masia noli. 6Ka yi nɔdeebo yi ti niŋ pali, ti mali shili ni ti darigi bɛn tumdi nɔzaɣisibo tuma la tibili.

7Yi lihirila binyara niŋgbuŋkom. So be yi ni n-tɛhi ni o nyɛla Masia nira? Di simdi ni dilan’ teeg’ omaŋa ni ti gba nyɛla Masia niriba kaman o ni nyɛ Masia nir’ shɛm. 8Hal n yi nyu bara yaɣi di ni simdi ni n nyu bara maa shɛm zuɣu zaŋ chaŋ fukumsi shɛli ti Duuma ni zaŋ niŋ ti nuu ni la polo, vi ku mali ma di zuɣu, dama di nyɛla fukumsi shɛli din yɛn mɛnya zali, ka pa ni din yɛn daai ya luhi. 9M bi bɔri ni di be kaman n sabirila gbana ni n kpɛhi ya dabiɛm. 10Shɛb’ yɛra, “Pool gbana puuni yɛtɔɣa nyɛla yɛl’ kpɛma ni din mali yiko, amaa o yi ti be ti sani o niŋgbuŋ biɛhigu ni, o nyɛla ninvuɣ’ gbariŋ ka o yɛtɔɣa bi ŋmani shɛli.” 11Di niŋ kamaata ni bɛn tɛhi lala baŋ ni ti ni yɛri shɛm ti gbana puuni maa, lala ka ti ni niŋ ti yi ti be yi sani gba.

12Ti bi mali timaŋa ŋ-ŋmahindi bee m-buɣisiri ninvuɣ’ shɛb’ bɛn paɣiri bɛmaŋ’ la. Bɛ yi mali bɛmaŋ’ maɣisiri taba, ka mali bɛmaŋ’ buɣisiri taba, bɛ bela ʒilinsi ni. 13Amaa tinim’ kul ku nyu bara yaɣi di ni simdi ni ti nyu bara shɛm tariga; ti kul ni ʒiɛla Naawuni ni zali ti ni ti tum shɛm tariga la puuni hal ni zaŋ chaŋ yi gba sani. 14Ti bi yaɣi Naawuni ni zali ti shɛm tariga ti ni daa ka yi sanna la puuni; dama tinima n-nyɛ bɛn daa tuui zaŋ Masia lahibal’ suŋ na ti tin ya. 15Ti bi nyuri bara n-yaɣiri di ni simdi ni ti nyu bara shɛm tariga ninvuɣ’ shɛb’ tuma zuɣu, amaa ti tahima nyɛla ni yi yɛda yi zooi pahi, ti tuma soya gba ni yɛligi yi sani, 16ka di chɛ ka ti tooi yihi lahibal’ suŋ waazu tin’ shɛŋa din be yi tooni la ha, ka di chɛ ka ti ku nyu bara ninvuɣ’ shɛb’ ni pun tum shɛm luɣ’ shɛŋa polo la zuɣu.

17 # Jɛr 9.24 Di bemi kaman di ni sab’ shɛm la: “Ŋunkam yɛn nyu bara, ŋun’ nyum’ li la ti Duuma zuɣu.” 18Dama di pala ŋun paɣ’ omaŋa n-nyari paɣibu, amaa ti Duuma ni paɣ’ so n-nyari paɣibu.

Currently Selected:

2 Kɔrintinima 10: DBwDB

Highlight

Copy