1 Timoti 1

1Man’ Pool ŋun nyɛ Yisa Masia tumo Naawuni ŋun nyɛ ti Tiligira ŋɔ mini Yisa Masia ŋun nyɛ ti tahima la ni zal’ li shɛm la puuni n-sabiri gbaŋ ŋɔ 2#Tuma 16.1 tiri Timoti ŋun nyɛ m bi’ maŋli ti daadiini soli yɛda niŋbu ni la. Ti Ba Naawuni mini ti Duuma Yisa Masia zom’ a nambɔɣu, ka niŋ alibarika niŋ a ni, ka ti a suhudoo!

Zuɣu ni kpahibu zaŋ chaŋ ʒiri wuhibu polo

3N kpamd’ a jaande ni a kul kpalimmi be Ɛfɛsus kaman n ni daa gariti chani Masidɔnia ka yɛl’ a shɛm la, ka di chɛ ka a kpahi ninvuɣ’ shɛb’ bɛn wuhiri ʒiri wuhibu la zuɣu ni ka bɛ chɛ li. 4Yɛlim’ ba ni bɛ chɛli kurimbuni ha lahibal’ shɛŋa din pa yɛlimaŋli mini dɔɣirikpamba yuya din ka tariga la yɛla bɔhimbu, dama di nyɛla din kul tahiri yɛla zaŋ buɣisi tab’ na kɔŋko, ka pa ni Naawuni ni zali wuhibu maŋli shɛli din kpaŋsiri adiini soli yɛda niŋbu la. 5Ti ni tɔɣisiri zuɣu ni kpahibu yɛl’ shɛŋa yɛla ŋɔ daliri nyɛla ni di kpaŋsi yurilim din yiri suhu din ka daɣiri mini suhu ni tɛha din ka galimi ni yɛda niŋbu maŋli ni na. 6Ninvuɣ’ shɛb’ bɛn ŋmaligi ka chɛ dimbɔŋɔnim’ leela bɛn birigi yɛtɔɣ’ chɔɣima tɔɣisibu puuni. 7Bɛ suhuri kul yɛmi ni bɛ leei Naawuni zaligu karimbanima, amaa ka lee bi baŋdi bɛ ni mali yɛtɔɣ’ shɛŋa n-tɔɣisiri maa gbinni bee m-mi bɛ ni niŋ binshɛŋa naani ka tɔɣisiri di yɛla maa ni nyɛ shɛli.

8Ti mi ni Naawuni fukumsi zaligu nyɛla zaɣ’ viɛlli, nir’ yi dol’ li n-tum di ni wuhi shɛm. 9Ka di niŋ kamaata ni ti baŋ ni Naawuni bi zali o zaligunim’ la ninvuɣ’ shɛb’ bɛn tumdi din tuhi zuɣu, amaa o zal’ li la zaliguzaɣisiriba mini tipawumlinima ni bɛn bi luri Naawuni sizuura ni alahichinim’ zuɣu. O lan zal’ li la bɛn biɛhigu bi be kasi ka bɛ baɣa ka Naawuni yɛla ni la mini bɛn kuri bɛ banima bee bɛ manim’ la ni ninvuɣ’ kuriba 10zaŋ tabili bɛn tumdi niŋgbuŋ kɔre tuma mini dɔbba bɛn gɔndi bɛ dɔtaba bee paɣiba bɛn gɔndi bɛ paɣitaba ni bɛn zaŋdi muɣisigu gbahiri niriba ni ʒiŋmariba ni bɛn zaa niŋdi din chihiri wuhibu maŋa la zuɣu. 11Wuhibu maa bela lahibal’ sun shɛli Naawuni ŋun nyɛ jilimalana mini alibarikalan’ ŋɔ ni zaŋ niŋ n nuu ni ni m mol’ li la puuni.

Naawuni paɣibu o nambɔzɔbo zuɣu

12M paɣiri ti Duuma Yisa Masia ŋun ti ma yaa ni n tum ŋɔ. M paɣir’ o o ni lihi ma ka n simdi ni o pii ma ka n tum o tuma, 13#Tuma 8.3; 9.4-5 hal n ni nyɛla ŋun daa yɛr’ o zilima ka niŋd’ o alaka ka tur’ o la zaa yoli. Amaa Naawuni daa zo ma nambɔɣu, dama n daa niŋ li la ʒilinsi ni n ni daa na bi niŋ yɛda la zuɣu. 14Di saha maa ka ti Duuma daa niŋ anfaani din galisi pam niŋ n ni, ka ti ma yɛda mini yurilim din be Yisa Masia ni la. 15Yɛtɔɣili ŋɔ nyɛla yɛlimaŋli, ka simdi ni nir’ dee’ li zaa. Dina n-nyɛ: Yisa Masia daa ka dunia ŋɔ ni na ni o ti tiligila alahichinima; mani mi n-nyɛ alahichilana n-gari sokam. 16Amaa Naawuni daa zo ma nambɔɣu ni di chɛ ka Yisa Masia wuh’ o suɣilɔdibo zaa ni nyɛ shɛm man’ ŋun nyɛ alahichilana n-gari sokam zaa ŋɔ sani; ka di leei ninvuɣ’ shɛb’ bɛn na yɛn niŋ o yɛda n-nya nyɛvili din ka bahigu la ni ni doli so’ shɛli. 17Paɣimiya Naawuni ŋun nyɛ ʒiɛmani kam Naa, ka nyɛ ŋun kul be, ka nyɛ ninsalinim’ nini ni ku tooi nya so, ka lan nyɛ ŋun kɔŋko kul nyɛ Naawuni, ka simdi tibigibu mini jilima tibu ŋɔ hal ni saha din ka bahigu! Ami!

18M bia Timoti, n zaŋ niriba zuɣu ni kpahibu yɛla ŋɔ niŋ a nuu ni. Di nyɛla anabitali yɛtɔɣa ni yɛli shɛm zaŋ chaŋ a polo. Chɛ ka di yɛtɔɣa maa leeg’ a bidibbina ka a zaŋ li tuhi tuhiri suŋ. 19Gbib’ a yɛda niŋbu min’ a suhu ni tɛha ka di ku mali galimi. Ninvuɣ’ shɛb’ ni bi doli suhu ni tɛha ŋɔ tatabo ni wuhi shɛm zuɣu chɛ ka bɛ yɛda niŋbu saɣim. 20Bɛ ni shɛba n-nyɛ Haimɛnaius mini Alikizanda bɛn nyɛ n ni zaŋ shɛb’ niŋ Sintani nuu ni bɛmaŋmaŋ’ sɔŋsim nyabu zuɣu ni di chɛ ka bɛ baŋ ni di bi simdi ni bɛ mo Naawuni la.

Currently Selected:

1 Timoti 1: DBwDB

Highlight

Copy