MATEO 5
AYOPD

MATEO 5

5
III. JESUSAN QULLUN YATICHATAPA#5.0 Jesusan nayrïr yatichäwipa.
(5.1—7.29)
1Jesusax walja jaqinak uñjasinxa, mä qulluruw makhatäna ukat qunt'asïna.#5.1 Ukat qunt'asïna: Kamachi yatichirinakax qunt'atapuniw yatichapxirïna. Ukatsti yatiqirinakapax jupan ukaruw jak'achasipxäna, 2Jesusasti akham sasaw yatichañ qalltäna:
Kusisïwinaka
(Lc 6.20-23)
3“Kusisiñanïpxiw Tatitur taqi chuyma alkatirinakaxa,
jupanakankiw Diosan qhapaq markapaxa.
4“Kusisiñanïpxiw t'aqhisirinakaxa,#5.4 T'aqhisirinaka: jan ukax jachirinaka; Sal 126.5-6; Is 57.18; 61.2-3.
jupanakax chuymachatäpxaniwa.
5“Kusisiñanïpxiw llamp'u chuymaninakaxa,
jupanakax mä suma uraq katuqapxani.
6“Kusisiñanïpxiw aski kankañ utjañap munirinakaxa,
jupanakax phuqhat uk katuqapxani.
7“Kusisiñanïpxiw khuyapayirinakaxa,
Diosasti jupanakarux khuyapayarakiniwa.
8“Kusisiñanïpxiw q'uma chuymaninakaxa,
jupanakax Diosaruw uñjapxani.
9“Kusisiñanïpxiw sumankañ utjañapatak ch'amachirinakaxa,#5.9 Sal 34.14 (15); Pr 12.20.
jupanakax Diosan wawanakap satäpxaniwa.
10“Kusisiñanïpxiw aski kankañ layku t'aqhisirinakaxa,
jupanakankiw Diosan qhapaq markapaxa.
11“Kusisipxam kunapachatix jaqinakax nayar arkapxatam layku tuqipxätam, usuchjapxätam, k'arintapxätam ukkhaxa.#5.11 1 P 4.14. 12Kusisitak jakasipxam, jumanakasti alaxpach markan jach'a churäwi katuqapxäta; jumanakat nayra profetanakarux kipkarak uñisipxäna.#5.12 2 Cr 36.16; Hch 7.52.
Akapach jayumpita, qhanampita
(Mc 9.50; Lc 14.34-35)
13“Jumanakax akapach jayüpxtawa. Ukampis jayutix ch'aphaqar tukuspaxa, ¿kunampirak jayunchasispasti? Janiw kunatakis askïkxaspati, jan ukasti jaqin takisiñapatak anqar wartatakïxaspawa.
14“Jumanakax akapach qhanäpxtawa. Mä qullu patankir markax janiw imantaskaspati. 15Janirakiw mä micha qhanas jamas manqhar uchañatak aqtayatäkaspati, jan ukasti, alay chiqar uchatäñapawa uta manqhankirinakar sum qhantañapataki.#5.15 Mc 4.21; Lc 8.16; 11.33. 16Uka pachpay jumanakan qhanamax jaqinak nayraqatan qhantpan, ukhamat aski luräwinakam uñjasin Dios Awkimar taqpachan yupaychañapataki.#5.16 1 P 2.12.
Jesusax kamachi phuqhañxat yatichi
17“Jan jumanakax amuyapxamti, nayax Moisesan kamachinakapa, profetanakan yatichäwinakap chhaqhayiris jutkirista ukhama; janiw uk apaqirit jutktxa, jan ukasti, kuntix yatichañ munkistu uk phuqhiriw jutta.#5.17 Ro 3.31. 18Qhanak sapxsma, akapachampi alaxpachampi tukusiñapkamax, uka kamachinakatxa janiw mä jisk'a arusa, mä jisk'a qillqasa apaqatäkaniti, taqi ukanak phuqhasiñapkama. 19Ukatpï sapxsmaxa, khititix uka kamachinakat mä jisk'a kamachikïkchi ukasa jan phuqkani, janirak jaqinakarus ukarjam sarnaqañapatak yatichkani ukaxa, jupasti alaxpach markan mä jisk'at uñt'atakïniwa. Ukampis khititix kamachi phuqhani, ukat yaqhanakar ukham phuqhañapatak yaticharakini ukasti, alaxpach markan jach'at uñt'atäniwa.
Jesusax chiqpach luräwit yatichi
20“Nayax sapxsmawa: Janitix sarnaqäwinakamax kamachi yatichirinakata, fariseonakat#5.20 Fariseonaka: kamachinak sum phuqhirinakäpxänwa. sipan askïkchi ukaxa, janiw Diosan qhapaq markapar mantapkätati.
1. Jesusax jaqi jiwayañan jan askïtapat yatichi
(Lc 12.57-59)
21“Jumanakax nayra awkinakamar akham satäkänsa uk ist'apxtawa: ‘Janiw jiwayätati,#5.21 Ex 20.13; Dt 5.17. jiwayirix juchañchatäniwa’ sasa. 22Nayasti sapxsmawa, khititix jilapampi phiñasinixa, jupax juchañchatäniwa. Khititix jilapar tuqxani ukasti, Jach'a Tantachasïwinkir jilïrinakan juchañchatäniwa; khititix jilapar ñanqha arunakampi ñanqhachani ukasti, nina infiernor jaquntatäniwa.#5.22 1 Jn 3.15.
23“Ukhamasti, jumatix luqtäwim altarar apkasin jilamampi jan walinkatam amtasïta ukaxa, 24uka luqtäwim altar nayraqatar jaytawayasin jilamampi sumankthapir saram. Ukat uka luqtäwim altaran churir kutt'anïta.
25“Maynitix ‘jan wal lurista’ sas tumpantätam ukaxa, jumasti janïr kunäkipan jupamp sumar mantxam, ukhamat taripirin ukar jan apatäñamataki; jan ukhamäkan ukasti, taripirix katuntirinakar katuyasin carcelt'ayätam. 26Qhanak sisma, janiw ukatxa taqpach qullqi churañamkam mistkätati.#5.26 Lc 12.58-59.
2. Jesusax wachuq juchxat yatichi
27“Jumanakasti ist'apxaraktawa: ‘Janiw wachuq jucha lurätati’#5.27 Ex 20.14; Dt 5.18. satäkänsa ukxa. 28Ukampis nayax sapxsmawa, khititix mä warmir munapayañatak uñtixa, niyaw chuymapan jupampix wachuq jucha lurxi.
29“Ukhamasti, kupi nayramatix juchar puriyirjamästamxa, apsusin jayar liwtam; walïspawa mä nayrama janchiman chhaqhañapaki, taqpach janchima infiernor jaquntatäñat sipana. 30Jan ukax kupi amparamatix jan walir puriyirjamästamxa, khariqasim ukat jayar liwtam; walïspawa mä amparama janchiman chhaqhañapaki, taqpach janchima infiernor jaquntatäñat sipana.
3. Jesusax chacha warmi jaljtañxat yatichi
(Mt 19.9; Mc 10.11-12; Lc 16.18)
31“Satarakïnwa: ‘Khititix warmipampi jaljtanixa, jaljtañ qillqat churxpan’ sasa.#5.31 Dt 24.1-4; Mt 19.7; Mc 10.4. 32Ukampis nayax sapxsmawa, mä chachax warmipan wachuq jucha luratapatak jaljtaspaxa, jan ukhamäkaspa ukasti, jaljtatapampix warmipan juchar puriñap wakichi. Khititix jaljtat warmimpi jaqichaskani ukasti, wachuq jucha luri.
4. Jesusax juramento lurañxat yatichi
33“Jumanakax nayra awkinakamar satäkatayna uk ist'apxaraktawa: ‘Kuntix lurañatak Tatitu nayraqatan juramentompi arskta uk phuqhapunim’ sasa.#5.33 Lv 19.12; Nm 30.2 (3); Dt 23.21 (22). 34Ukampis nayax sapxsmawa, janipun kunäkipansa juramento lurapxamti. Alaxpach laykus jan lurapxamti, ukax Diosan qunuñapawa; 35akapach laykusa, ukax Diosan kayunakapan takt'äwipawa, janirak Jerusalén laykusa, ukasti jach'a Reyin markapawa. 36Janipun p'iqim laykus juramento luramti, janiw jumax mä ñik'utsa, janq'uta ch'iyäraru tukuykasmati. 37Jumanakan arsuñamax akakïñapawa, ‘Jïsa’, jan ukax ‘janiwa’ sasa. Ukat juk'amp yaqha arux supayat jutiriwa.#5.37 Stg 5.12.
5. Jesusax phuqsusiñxat yatichi
(Lc 6.29-30)
38“Kunatix satäkän uk ist'apxaraktawa: ‘Uñkatatax, uñkatarakim; tuqxatasti, tuqxarakim’ sasa. 39Ukampis nayax sapxsmawa: Jan wal lurktam uka jaqirux, jan kutkatamti; jan ukasti, maynitix maysa ajanut t'axllintätamxa, maysa ajanumppach uñacht'ayam. 40Maynitix ch'axwampi isim aparañ munstamxa, patxa isimamppach churawayxam. 41Mä soldadotix khayakam q'ipirapita sätamxa, jumax juk'amp khurikam q'ipirapim. 42Mä kunsa maynix mayïtam ukarux churam; jumat mayt'asiñ muniritakisti, jan maysa uñtamti.
6. Jesusax uñisirinakar munasiñxat yatichi
(Lc 6.27-28,32-36)
43“Kunatix satäkän uk ist'apxaraktawa: ‘Jaqi masimar munasïtawa, timamarusti uñisïtawa’ sasa. 44Ukampis nayax sapxsmawa: Uñisirinakamar munasipxam, ñanqhachirinakamatakisti Tatitut mayirapipxam.#5.44 Ex 23.4-5; Pr 25.21; Ro 12.14-20; 13.8-10. 45Ukhamat jumanakax alaxpachankir Awkiman wawanakapäpxäta; jupaw inti jalsuyani jan wali jaqinakatakisa, aski jaqinakatakisa, juparakiw jallu apayani, aski jaqinakatakisa, jan wali jaqinakatakisa. 46Jumanakatix munasipktam ukanakaruki munapxsta ukaxa, ¿kuna askirak katuqapxätasti? Roma markatak qullqi apthapirinakas uka kipka lurapxaraki. 47Jilanakamaruk aruntapxäta ukasti, ¿kuna askirak lurapxtasti? Diosar jan uñt'irinakas ukham lurapxaraki. 48Jumanakax askïpxam, kunjämatix alaxpachankir Awkimax askïki ukhama.

Biblia Aymara ©Sociedad Bíblica Boliviana 1997.

Mapas ©Sociedades Bíblicas Unidas, 1996


Learn More About Qullan Arunaka DC