SAN MATEO 5
QCHSB

SAN MATEO 5

5
Jesús orqopi yachachin
1Jesús ashkha runasta rikuspa orqoman wicharerqa. Chaypi tiyaykukojtintaj yachachisqasnin payman qayllaykorqanku. 2Chantá Jesús yachachiyta qallarerqa ajinata:
Kusikuyniyojkuna
(Lc 6.20-23)
3Kusikuyniyoj kanku wajcha sonqoyojkunaqa, imaraykuchus paykunajta janaj pacha reinoqa. 4Kusikuyniyoj kanku waqajkunaqa, imaraykuchus paykunataqa Dios sonqochanqa. 5Kusikuyniyoj kanku llamp'u sonqoyojkunaqa, imaraykuchus paykuna jallp'ata chayaqenkupaj jap'enqanku. 6Kusikuyniyoj kanku cheqan kausaymanta yarqhachikojkunaqa, ch'ankichikojkunapis, imaraykuchus paykuna sajsachisqas kanqanku. 7Kusikuyniyoj kanku khuyakojkunapis, imaraykuchus paykunaqa khuyakuyta tarenqanku. 8Kusikuyniyoj kanku llimphu sonqoyojkunaqa, imaraykuchus paykunaqa Diosta rikonqanku. 9Kusikuyniyoj kanku allinyachejkunaqa, imaraykuchus paykunaqa Diospa wawasnin kanqanku. 10Kusikuyniyoj kanku cheqan kausayrayku ñak'arejkunaqa imaraykuchus janaj pacha reinoqa paykunajta kanqa. 11Kusikuyniyoj kankichej runakuna noqarayku qankunapaj rimajtinku, chejnispa ñak'arichisojtinku, tukuy imatataj llullakuspa contraykichejpi nejtinku ima. 12Kusikuychej jatun kusiywan, imaraykuchus jatunmin janaj pachapi t'inkaykichejqa. Ajinallatataj qankunamanta ñaupajta jamoj profetastapis, chejnispa ñak'aricherqanku.
Mundoj kachin, k'anchaynintaj
(Mr 9.50; Lc 14.34-35)
13Qankunaqa mundopaj kachi jina kankichej. Kachichus laqayanman chayqa, imawantaj kachichakonqari? Mana imapaj walejñachu; manachayqa jawaman wijch'unallapajña, runa sarunampajtaj.
14Qankunaqa mundopaj k'anchay kankichej. Orqo patapi ruwasqa llajtaqa, mana pakasqa kayta atinchu. 15Nillataj pipis k'anchayta jap'ichinchu wich'iwan k'umpuykunampaj. Pillapis k'anchayta jap'ichispaqa pataman churan, wasipi tukuy kajkunata k'anchanampaj. 16Ajinallatataj k'anchayniykichejqa k'anchachun runaspa ñaupaqempi. Paykunapis allin ruwasqaykichejta rikuspa, janaj pachapi kashaj Tataykichejta yupaychanankupaj.
Jesús leymanta yachachin
17Ama qankunaqa yuyaychejchu Moisespa leyninta chinkachej jamusqayta, chayrí, profetaspa yachachisqankuta. Mana chaykunata chinkachejchu jamuni, astawampis junt'aj jamuni. 18Chayrayku cheqamanta niykichej: Ñaupajtaraj cielopis mundopis tukukuyta atinku; leymantataj mana uj juch'uy letra, ni uj ch'iñi rayallapis chinkanqachu, kay tukuy junt'akunankama. 19Pillapis kay kamachiykunamanta aswan juch'uy kajllatapis p'akinman, kikillantataj wajkunamampis yachachinman chayqa, janaj pacha reinopeqa ancha juch'uypaj qhawasqa kanqa. Ajinallatataj pillapis chay kamachiykunata ruwanqa, wajkunamampis maychus kasqanta yachachenqa chayqa, chaymá sumaj jatumpaj qhawasqa kanqa janaj pacha Diospa reinompeqa. 20Chayrayku qankunaman niykichej, manachus cheqan kayniykichej qelqerispamanta, fariseospamantawan aswan allin kanqa chayqa, mana yaykunkichejchu janaj pacha reinoman.
Mana phiñakunamanta
(Lc 12.57-59)
21Qankuna uyarerqankichej ñaupa runasman imachus nisqa kasqanta: Ama wañuchinkichu; pillapis wañuchejqa, juiciopi juchachasqa kanqa, nispa. 22Noqataj niykichej: Pillapis wauqempaj phiñakun chayqa, juchachasqa kanqa juiciopaj. Pichus wauqenta wampu nejpis, jatun juntapi juchachasqa kanqa; chantá pichus wauqenta opa ninman chayqa, infierno nina larwayman wijch'usqa kanqa.
23-24Chayrayku altarman rikuchikuykita apashaspachus yuyarikuwaj, wauqeyki qampaj phiñasqa kasqanta chayqa, altarpa ñaupaqenman rikuchikuykita saqellay. Riyraj ñaupajta wauqeykiwan allinyakamoj. Chaymanta kutimusparaj, rikuchikuykita Diosman jaywanki.
25Piwanchus phiñasqa kanki chayqa, paywan usqhayta ñanllataraj rishaspa allinyakuy, ama enemigoyki juezwan jap'ichisunampaj, jueztajrí soldadoswan, soldadostaj ama carcelman wisq'asunankupaj. 26Cheqatapuni niyki, mana jaqaymantaqa llojsimuwajchu tukuy phataykita paganaykikama.
Mana qhenchachakunamanta
27Qankuna uyarerqankichejña nisqa kasqanta: Ama qhenchachakunkichu. 28Noqatajrí niykichej: Pillapis uj warmita qhawan munapayaspa chayqa, ñapis paywan sonqompi qhenchachakunña.
29Chayrayku paña ñawiyki juchaman urmachinayasojtenqa, sik'ispa wijch'uy; imaraykuchus aswan allin kanqa uj ñawillayki chinkanan, tukuy ukhuyki nina larwayman enqhasqa kananmantaqa. 30Ajinallatataj paña makiyki juchaman urmachinayasojtenqa, khuchuspa wijch'uy. Aswan allin kanqa uj makillayki chinkanan, tukuy ukhuyki nina larwayman wijch'usqa kananmantaqa.
Mana t'aqanakunachu
(Mt 19.9; Mr 10.11-12; Lc 16.18)
31Ajinallatataj ñaupajta nisqa karqa: Pillapis warminmanta t'aqakojqa, divorcio papelta qopuchun. 32Noqataj niykichej: Pillapis warminmanta t'aqakun mana wasanchajtillan chayqa, warminta adulterio juchaman urmachin; pitajchus chay warmiwan casarajpis, adulterio juchaman urmallantaj.
Ama Diospa sutimpi juranachu
33Uyarillarqankichejtaj ñaupa runasman nisqa kasqanta: Ama llullakuspa, qhasimanta Diospa sutimpi jurankichu; Diospa ñaupaqempi imatachus jurasqaykita junt'anki. 34Noqataj niykichej: Amapuni jurankichejchu janaj pacharaykupis, imaraykuchus Diospa trononmin. 35Nitaj mundoraykupis jurankichejchu, imaraykuchus Diospa chakisnimpa sarunanmin. Nillataj Jerusalenraykupis, imaraykuchus jatun reypa llajtanmin. 36Amallataj umaykiraykupis jurankichu, imaraykuchus mana uj chujchallatapis yurajyachiyta nitaj yanayachiyta atiwajchu. 37Chayrayku parlayniykichejqa kay jina kachun: Arí, arí, nispa; chayrí, mana, mana, nispa. Kaymanta astawanqa sajramanta jamun.
Mana kutichikunamanta
(Lc 6.29-30)
38Ñaupajta uyarerqankichej: Ñawimanta ñawi, kirumanta kiru, nisqa kasqanta. 39Noqataj niykichej: Sajra runamanqa ama kutichikuychejchu; pillapis paña uyaykipi laq'asojtenqa, lloq'e uyaykitawan kutirichiy. 40Pichá munan pleiteasuyta p'achaykita qhechusunampaj chayqa, ponchoykitawan saqepuy. 41Pillapis uj kilometrota paywan rinaykita munan chayqa, uj jinatawan riy. 42Pillapis imata mañakusojtenqa qoriy; manukusuyta munajmampis, ama, mana niychu.
Enemigosta munakunamanta
(Lc 6.27-28, 32-36)
43Uyarerqankichej nisqa kasqanta: Runa masiykita munakunki, enemigosniykitataj chejninki. 44Noqataj niykichej: Enemigosniykichejta munakuychej; [maldicisojkunaman allinta kutichiychej; chejnisojkunapaj allin kajta ruwapuychej; rimasojkunapaj,] qhatiykachasojkunapaj ima Diosmanta mañapuychej. 45Ajinata ruwaspaqa, janaj pachapi kashaj Tataykichejpa wawasnin kankichej. Payqa, sajra runaspaj, k'acha runaspajpis intita llojsichimun. Kikillantataj parachimun tukuypaj; allin runaspaj, sajra runaspaj ima. 46Munakusojkunallatachus munakuwajchej chayqa, ima t'inkayojtaj kawajchejrí? Manachu publicanospis kikillantataj ruwanku? 47Wauqesnillaykichejtachus napaykuwajchej chayqa, ima aswan allintataj ruwankichejri? Manachu gentilespis kikillantataj ruwanku? 48Imaynatachus janaj pachapi kashaj Tataykichej cabal, ajinallatataj qankunapis cabal kaychej.

Qheshwa Biblia DC © Sociedades Bíblicas Unidas, 1986.

Learn More About Qheshwa Biblia DC