ECLESIÁSTICO 43
43
1May k'acha llimphutaj janaj pachaqa! Ch'askasta rikuspaqa t'ukunchej.
2Inti lliphipin, ruphasqantaj tukuyman chayan. Señorpa ruwasqanqa sumajpuni.
3Chaupi p'unchayta inteqa kay pachata ruphan. Pitaj chay ruphaymanta ayqenmanri?
4Imaynachus ninaqa titita unuyachin, ajinallataj inteqa orqosta ruphachin. K'ajaj wausita rikhurichimun inteqa. K'anchaynintaj ñawista wisq'achin.
5May jatunmin intita ruwaj Señormin. Señor nisqanrayku inteqa puririn.
6Señorqa llojsichimullantaj killata, kamachisqanman jina. Killaqa tiemposta señalampuni.
7Paynejta yachanchej mayk'ajchus fiestas jamunku. Purikunan kasqanta tukuytawanqa, pisilla k'anchaynin.
8Sapa kinsa chunka p'unchaytaj, killaqa watejmanta rikhurimun. Chayrayku, kinsa chunka p'unchayqa, killallataj sutinchakun. Chay wañusqantaj, chay paqarimusqantaj t'ukunapajmin. Muyuynimpi runas jina sayanku ch'askasqa.
9Ch'askasqa k'achitullataj. Ch'askasniyoj cieloqa runaj sonqonta kusirichin. K'anchayninku patapi lliphipin.
10Diosninchej nisqanrayku chay patapi sayasqankupuni. Chaypipuni kashanku, mana sayk'uspalla.
11K'uwichitapis rikuspa. chay k'uwichita ruwajta yupaychay. K'acha kaynenqa t'ukunapajmin.
12Uj puntamantapacha uj puntakama chayan k'uwicheqa lliphirispa. Diosqa chay jinata makinwan mast'aykun.
13Diosqa atiyninwan lliuj lliujwampis rikurichin ñanta. Kachaykuntaj phukuyninwan qhon qhonta.
14Phiñasqa kaspa kicharimullantaj janaj pacha qochasta. Ajinallataj phuyusta phawachin suwintusta jina.
15Diosqa atiyninwan phuyusta rikhurichimun, urmaykuchintaj chijchista rumista jina.
16Diosqa orqosta kuyurichin, ikhaykuchintaj jallp'ata.
17Munayninta kasuspa, ura wayra phukuykun. Ajinallataj, sinch'i pata wayrapis.
18Rit'itapis urmaykuchillantaj, phawaj p'isqosta jina. Rit'itaj chayamun langosta jina. Rit'ej lliphipiynin ñawita ciegoyachin. Rikuspa rit'ita urmashajta, runaj sonqon wawayarin.
19Chhullunkataqa t'akaykun kachita jina, t'ikarichintaj lliphipej rumita jina.
20Diosqa phukuykuchin patamanta jamoj chiri wayrata. Qhasamantaj tukuchintaj juturi yakuta. Tukuy qochas patapi qhasaqa rikhurimun, yakuta qhataspa.
21Chay qhasaqa nina jina ruphaykuchin ch'akichintaj orqo qhorastataj, pampa ch'ikistataj.
22Phuyusmanta jamoj chhullataj tukuy imata sumajyachin, joq'ochantaj ch'akisqa jallp'ata.
23Diosqa yachayninwan thasnuchin jatun qochaj phiñakuyninta, churantaj jallp'asta qochas chaupiman.
24Yakupi rejkuna willanku maymanchus jatun qocha chayasqanta. Nisqankuta uyarispataj t'ukunchej.
25Chaypimá t'ukuna ruwasqasnin. Chaypi tukuy ima laya kausayniyojkuna.
26Diosnejta tukuy ima allinman tukun. Paypa nisqasninrayku tukuy ima pachampi kakushan.
27Mana astawan nisajñachu. Paymin aswan jatun tukuy imamanta nisqaqa.
28Yupaychanapuni Diospa jatun kayninta. Paypa ruwasqasninmantaqa, paymin aswan sumaj.
29Diosmanta manchachikuna. Atiynenqa may jatun.
30Payta yupaychaychej qhaparispa. Sinch'ita qhaparejtiykichejpis, astawampuni yupaychana paytaqa. Watejmanta kallpachakuspa yupaychaychej payta. Ama sayk'uychejchu. Paytaqa yupaychanapuni.
31Pitaj payta rikunri willanampaj imaynachus pay kasqanta? Pitaj atinman paypa jatun kayninta yupaychayta maychus kajman jina?
32Pakasqa kajtaj aswan jatumpuni. Ruwasqasninmantaqa pisillata rikuni noqaqa.
33Señorqa tukuy imata ruwarqa. Payta qhatikojkunaman yachayta qon.
Currently Selected:
ECLESIÁSTICO 43: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.