ECLESIÁSTICO 41
41
Wañuymanta
1Wañuy, qanmanta yuyarikuspaqa, runa pichus walejllata kausakun wasimpi, sonqonta nanachikun. Payqa mana llakiyniyoj kasharqa. Tukuy ima allinta rej payman. Kallpampis kallanraj kusikunampaj kausaynimpi.
2Wañuy, runapaj pichus ñak'arishan mana kallpayoj, may munasqa kanki. Chay runaqa sapa kuti misk'ashanña urmaykushantaj. Llakiyniyojmin kashan, mana ni imataña suyaspa.
3Ama llakikuychu wañuy watukushanmanta. Ajinapuni karqa qanmanta ñaupajta. Ajinallataj kanqa qhepaykipipis.
4Diosninchej nerqa tukuy runas wañupunankuta. Imapajtaj oqharikunkiri patapi kaj Diospa contrampi? Wañusqas ukhupi mana tapunakunkuchu mayk'ajtachus sapa uj kausakorqa, chunka watatachus, pachaj watatachus, chayri waranqa watatachus.
Rumi sonqoyojkunamanta
5Qhesachakunapaj jina kanku juchasapaspa wawasninku. Sajra runaj ayllunmanta kajkuna mana umayojchu kanku.
6Juchasapaspa wawasninkoqa mana ni imata saqenqankuchu. Chayaqenku chinkaponqapacha. Qhepankupi jamojkunapis p'enqayniyojllataj qhepakonqanku.
7Sajra runataqa wawasninkupis maldicinku. Paypa juchanrayku p'enqaypi kashanku.
8Waqankichej, Diosmanta karunchasqas kajkuna, Diospa kamachisqasninta saqerparisqaykichejrayku.
9Wawasniyoj kankichej chayqa, chay wawasniykichejqa llakichisonqachej. Qankuna urmajtiykichej, tukuy runas kusikonqanku. Wañupojtiykichejtaj, tukuy maldicisonqanku.
10Mana ni imamanta jamojqa, mana ni imaman kutipullanqataj. Ajinallataj, Diosmanta karunchakojqa, ch'usajmanta llojsispa ch'usajman ripun.
11Runasqa llakikunku sapa yuyajtinku wañupunanku kasqanta. Sutisninkupis chinkasqa kanqa, sajras kasqankurayku.
12Sutiykitaqa llimphuta waqaychay. Sutiyki aswan sumaj waranqa qorimanta nisqaqa.
13Kuseyqa mana unaytachu. Sumaj sutitaj wiñaypaj kakullan.
14Pakasqa yachaytaj, pakasqa qolqetaj, imapaj walej?
15Mana ni imata yachasqaykimanta ch'in kakullay. Amataj pakaychu yachayniyoj kasqaykita.
P'enqaymanta
16Uyariwaychej, wawasníy, imatachus nisqaykichej p'enqakuymanta. Yachachisqaykichej imachus runataqa p'enqaypi rikhurichin. Ama p'enqakuychejchu imallamantapis. Runasqa mana ujllatachu yuyanku p'enqaymanta, imachus kasqanmanta.
17Tata mamaykej ñaupaqempi p'enqakuy millayta kausakusqaykimanta. Kamachejpa ñaupaqempitaj p'enqakuy llullakusqaykimanta.
18Juezpa ñaupaqempi p'enqakuy mana allin kajta ruwasqaykimanta. Tukuy runaspa ñaupaqempitaj p'enqakuy sajra ruwasqasniykimanta.
19Amigoykej ñaupaqempi p'enqakuy wasanchasqaykimanta. Vecinoykej ñaupaqempi p'enqakuy rimasqaykimanta.
20P'enqakuy trato ruwasqaykita p'akisqaykimanta. P'enqakuytaj khuchi jina mikhusqaykimanta.
21P'enqakuy mana ni imata qosqaykimanta mañakusojtinku. P'enqakuy ch'in kakusqaykimanta parlapayasojtinku.
22P'enqakuy juchallikoj warmita munapayasqaykimanta. P'enqakuy amigoykita qhesachasqaykimanta.
23P'enqakuy wajpa kapuyninta qechusqaykimanta. P'enqakuy casarasqa warmita qhawasqaykimanta.
24P'enqakuy warmi kamachiykiwan juchallikusqaykimanta. Ama puñunanman qayllaychu.
25P'enqakuy amigoykita rimasqaykimanta. Imallatapis qoytawantaj, ama k'amiychu.
26P'enqakuy imatachus uyarisqaykita willasqaykimanta. P'enqakuy pakasqa kajta sut'inchasqaykimanta.
27Tukuy chayta ruwaymanta p'enqakunaykipuni. Chayta ruwanki chayqa, tukuy munakusonqanku.
Currently Selected:
ECLESIÁSTICO 41: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.